یاس قوروب زهرا امام صادقه قان آغلیور
گوز یاشین ایلور روان گیسو پریشان آغلیور
وای دیور زهر جفائیله اولان مسموم اوغول
زندگیدن ایلدی دشمن سنی محروم اوغول
گل جواریمده آنون ساخلار سنی مظلوم اوغول
حالوه من آغلادیقجا اهل رضوان آغلیور
غم یمه اعدا سنی آماج ائدیبدی تهمته
سالدیلار غربتده امواج بلا و محنته
خالقون وار لطف بی پایانی آل عصمته
تا جهان واردی غمونده هر مسلمان آغلیور
تنگه سالمیشدی مسلّم جانوی چوخ مشکلات
ناگوار اولدی سنه بیللم بالا حال حیات
قبر ائوینده استراحت گل ائله ای پاک ذات
زائرین حجّ قبرونده نوا خوان آغلیور
کاش زوّاری اولیدوخ بیزده الان قبرینه
تسلیت دیدوک بالاسی مهدی با صبرینه
بی گمان الان اودا گوزلرده اشکون ابرینه
اذن وئرمیش فاطمیله زار و نالان آغلیور
بیلمدوک آللّه بو نه اسراردی ادوارده
هئچ زمان کشف اولمادی مخفی اولوب استارده
گُللری دنیا اسیر ایلوبدی نیش خارده
مدرکیم شبنمدی اشک چشم ریحان آغلیور
صالح اشخاصی ائدر دائم دچار نا خلف
وار سند هابیلدن تا ایندیه جای اَسَف
سجده حالینده نجه باتدی قانا شاه نجف
حشر اولونجا بو عزاده مؤمن انسان آغلیور
گاه زهرانی گرفتار ایلیور ثانی پست
گه ویرور سیلی گهی پهلوسینی ایلور شکست
گه دیور بیعت الین وئرسون علی حق با من است
فکر سرگرداندی عقلیم مات و حیران آغلیور
گاه اولور هم عصر منصوری امام صادقه
برگ طوبانی هدف ایلور کأنّه صاعقه
تهمت کاذب ویرور کذّاب مرد وائقه
حجّت باری غمیندن عرش سبحان آغلیور
شهر یثربده رواج دینه ایلوردی تلاش
مکتب ایمانه رونق وئرمگه آچدی فِراش
لاجرم دورد مین نفر اطرافین آلدی کالفراش
کسب ائدنلر محضریندن فیض قرآن آغلیور
والی یثرب گزارش وئردی بو آرایشی
سلب اولوب منصور پستین بی سبب آرامشی
سوء تعبیر عبثدن اولمادی آسایشی
یازدی بیر پیمان امامه طرح فقدان آغلیور
توش اولوب حاصل امام الرحمه بی جا تهمته
صاحب عصری ائدیب احضار ظالم غربته
هم اوزی هم عترتی یاندی شرار فرقته
بو مسلّمدی غم اهلی شام هجران آغلیور
پرورش وئردی اورکده حضرته نسبت عناد
بارها قتلین اراده ایلدی فاسق نهاد
قویمادی اولسون موفّق حضرت ربّ العباد
یثربه گلدی عیالین گوردی پنهان آغلیور
حاکم شهر رسوله یازدی منصور دنی
مخفیانه حکم قتل نور چشم احمدی
زهرلن سوندور دئدی فوراً سراج سرمدی
یاز منه ایلور هامی اطهاری افغان آغلیور
زهر انگوریله دوشدی فخر عالم تابدن
ایلدی جنّاته هجرت آیریلوب اصحابدن
جدّینه ملحق اولوب سس قُوزانیب احبابدن
گوردیلر موسی بن جعفر دیده گریان آغلیور
رسمدور شهد شهادت ایچسه مولای زمن
اوغلی واجبدور آتاسین ایلیه غسل و کفن
حمل اولوب نعشی بقیعه دفن اولا یابن الحسن
وا اماما سسلیور هر سینه سوزان آغلیور
وار یری بوردا دوشه یاده غریب کربلا
قالدی اوچ گون گون قباقینده شهید نینوا
اولمادی دفن ایلین باشسیز بدن سایسیز یارا
ایندیده احوالینه هر اهل ایمان آغلیور
خیمه گاهین اوتدادی اهل فتن چکدی شرار
پا برهنه چولره اطفالی ایلوبدی فرار
باشسیز عورتدی اوشاقدی بی کمکدی بی قرار
آه و وا ویلا دیلینده جمله نسوان آغلیور
اللری باشدا گوزیندن هر بیری اشکین اَلور
سسلیور عمّه ولی فریادینه سیلی گلور
دوشدی نه غوغایه باشسیز قزلاری اللّه بیلور
قتلگاهیندن باخور شاه شهیدان آغلیور
صادق آل عبا ایّام حجّ هر ایل اوزی
یاس دوتوب جدّی حسینه سیل تک قانیاش گوزی
عارض آله توکردی ذکر ائدردی بو سؤزی
سو کنارینده وئرن ای تشنه لب جان آغلیور
- دوشنبه
- 4
- مرداد
- 1400
- ساعت
- 12:7
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه