گلزارده گُل یاخجیدی خوش باغلیان اولسا
ماتملیه تسکینیدی دل داغلیان اولسا
هیئت گل آچار نوحه خوانا آغلیان اولسا
وار زینتی هر مجلسون اوز شأنینه لایق
بو بزمده زینب کیمی گوز یاش توکر عاشق
هیئتده گرک شور عزا گوز یاشی اولسون
باخما اوخیان اوستا و یا کی ناشی اولسون
توک گوز یاشی تاریک ایوون یولداشی اولسون
مجلسده بُکا اولماسا اربابه یاراشماز
دوسون قاپسین سنده یامان گونده یار آچماز
بو بزم عزا صاحبی مهدی جواندی
معناده باخور بیزلره ظاهرده نهاندی
سنلن اوتوروب بوردا اودا اشک فشاندی
سیز گوز یاشی رخساره ائدن وقتده جاری
مهدیده اولار جدّی حسین تعزیه داری
نصب اولسا هارا پرچم سلطان شهیدان
زهرا او ایون صاحبیدی اشرف نسوان
کیم اوغلینا قان آغلاسا ایلر اونا احسان
جنّاتده سلمان چکر حسرت بو مکانه
عاشقدی حسین آدینا چون ذات یگانه
دوز گل بو حسین عاشقینون حرمتی واردی
درگاه الهیده بویوک قیمتی واردی
گوگلرده ملکلر بگنن شهرتی واردی
چوخ نادم و عاصی یاپشیب پاک اتکیندن
جانین قوتاریب ماحصل آللّه کوتکیندن
دوشدی یادیما بیر جریان خوشدی محلّی
تحقیق ائلیون تا سیزه آسان اولا حلّی
تبریزلی رسول آدلی جوان فسقده بللّی
میخوارمیش هر گون اونا اولموشدی بو عادت
مست ایلیوب انظارده ایلردی شرارت
شیطان اونی ائتموشدی جوامعده خجالت
ظاهرده بشر باطنی تندیس جهالت
مشهور رسول تُرک اونا سویلردی جماعت
بد نامیدی رؤیت ائلین جبهه آچاردی
هر حالده مخلوق اونی گورسیدی قاچاردی
اما نجه گور تاپدی او آلوده سعادت
بیر گون گینه مستیدی به اندیشه ی عادت
درک ائتدی حسین وای سسی تز دوردی او ساعت
آللّه بو نجه سسدی دئدی جانمی آلدی
عشق آتشینه سینه ی سوزانمی سالدی
آختاردی تاپیب بیر قره پرچم ائلیوب بوس
اذن ایستدی داخل اولا اولدی ولی مأیوس
خفّاشه یاراشماز دئدیلر مجلس طاووس
بیر کس رسولا سویلدی گل طالب پند اول
میخانه نی ترک ایله سورا روضه پسند اول
یالواردی رسول سویلدی هم نیّتوز اولّام
بوندان بئله منده گلیب هم هیئتوز اولّام
دورّام قاپی آغزیندا وفالی ایتوز اولّام
آلدی بو حسین وای سسی طاقت اورگیمدن
دوتسون آقوز ای کاش منیمده بیلگیمدن
بیچاره رسول هر قدر ایلوبدی تقاضا
داخل اولا هیئت بویوکی سویلدی حاشا
بو بزم عزادی اوتوروب حضرت زهرا
زهرا اوتوران بزمده اغیاره یر اولماز
حوریّه جوارینده تبهکاره یر اولماز
بو مجلس حسینوندی گلنلر قره باغلار
زهرا باش آچیب بوردا حسین وای دیوب آغلار
ترک ائت سنی قوی گورمیه پاکیزه قوناقلار
یوخ گوردی رسول چاره لذا خانه ی عشقی
ترک ایلدی گوز یاشلی شفاخانه ی عشقی
چون خون تشیّع وارمیش خون و رگینده
پوشیده ئیمش عشق حسین صاف اورگینده
آری چوخ اثر وار آتانون دوز چورگینده
حاصل رسولا سوز توخانیب تاپدی تولّا
غیرت قانی جوشدی اونا اورگتدی تبزّا
مأیوس و سر افکنده رسول فکری پریشان
سسلور منی ارشاد ائله ای شاه شهیدان
قویما منی تهمتده قالام گوزلری گریان
سن بیل آقا نهر اوسته یاتان قولسوز علمدار
لطف ایله منیمده آدیمی یازدیر عزادار
اکسیر محبّت قاریشا هاردا بلایه
هر کیمسه نی صید ائتسه چکر راه ولایه
ایلر بَدَل آلوده مس قلبی طلایه
ظلمات آراسیندان نجه گور تاپدی رسول نور
دوز سسلدی یا فاطمه اولدی بئله مشهور
القصه تاپیب خاتمه برنامه ی هیئت
دوردی هامی اوز منزلینه گلدی به سرعت
یاتدی یوخیدا دسته باشی ایلدی رؤیت
غلطان قانینا خیمه ده سالار شهیدان
بیر کلب سیه وار ولی سلطانه نگهبان
خادم دیوری تا آقامون قانلی عذارین
گوردوم آلیب الدن بو دل آزرده قرارین
یوخ میلی و لیکن منه اول یاره لی یارین
تز عرض سلامه دیل آچیب سسلدیم آقا
بیر پیر غلامم سنه من ای گل زهرا
کچدیم صولینا، صاقینا با دیده ی پر نم
هی سسلدیم آقا اله دیم اشک دمادم
گوردوم منه باخمور آقام اولدوم غمه همدم
ویردیم باشما سسلدیم ای شاه خجسته
کوسدون من بیچاره دن آیا نیون اوسته
ایللردی حسین جان قاپوون نوکریم من
نوکرلروون کمتری یا چاکریم من
قوسوندا گینه درگهوون کمتریم من
بیر یول دئدی التّوبه سن عفو ایلدون حُرّی
لطف ایله سالیم گردنیمه منده او دُرّی
زهرایه قسم وئرّم حسین قیل منه حالی
بیدار ائله بو عاشق آشفته خیالی
مأیوس ائلمه قوی قالا سینمده مدالی
سنسیز منه جنّت وئره لر دوزخ جاندی
کوثر سویی ایچسم دییَرم زهردی، قاندی
تا فاطمه نون اولدی آدی ظاهر او ساعت
دریای کرم ملتمسه قیلدی اجابت
قودون نیه اول شخصی سوروشدی شهِ اُمّت
گلمیشدی رسول کلب در خانه میز اولسون
مهمان سر سفره ی کاشانه میز اولسون
دوردی یوخیدان فوری سراسیمه و خونبار
سسلندی آقا عفو ائله من پیر خطا کار
بو علّته دوتدوم رسولا ایلدیم اخطار
توهین سیزه فرض ایلردیم شارب خمری
فکریم بوئیدی راضی ائدم صاحب عصری
سرعتله دوروب دوشدی یولا عاشق نادم
آختاردی رسول تُرکون ایوین تاپدی او خادم
سسلندی گل ای آهی اورک ملکینه هادم
آهون نجه گل گور منی طوفانه سالیبدی
درمان ائلیه دردیمه زهرایه قالیبدی
حاصل قاپیا چیخدی رسول مرد سعادت
گوردی اونا هیئتده ویران طعن و شماتت
گوزلرده ولی حلقه ویریب اشک ندامت
گورجک رسول اول پیری اولوب شاد و خرامان
شوقیله قوجاقلاشدی ایکی عاشق سوزان
آغلار گوزیله اوپدی رسولون ایاقیندان
سهو ایلمیشم عفو ایله توکدی دوداقیندان
اوپدی گه الین گاه لبین گه یاناقیندان
احسن دئدی سن فاقد ما و من میش سن
غم چکمه رسول جان دوز حسینچی سنمیش سن
بو قصّه رسول ترکی چکیب اوج فرازه
آغلار گوزیله باشلادی تز راز و نیازه
توبه ائلدی بد عملین دوردی نمازه
شدّتله اوجا صوتیله سسلندی حسین جان
قوشدون منی عشّاقوه جانیم سنه قربان
عاشق دگولم چیخسام اگر بیرده یولیمدان
دوتدون الوی وار اولا مردانه قولیمدان
یاغدیرسا فلک تیر بلا صاق و صولیمدان
عشقین اودینا عود کیمین شعله ده یانّام
اشک غمه عبّاس کیمین منده بویانّام
عباس اوکی میدانه اولان لحظه روانه
دشمنلر ائدیب مشکینی اوّلده بهانه
بیر عدّه شقی قولّارینی گتدی نشانه
تا پنجه لری حافظ مشک و علمیدی
آسوده خیاماتیده اهل حرمیدی
آل اللّهه محصور او زمان موج غم اولدی
عبّاسون اوزون قولّاری تندن قلم اولدی
گل قارداش حسین سسلدی ساقط علم اولدی
بیر یول دئدی ادرک اخی ای شاه خجسته
جان اوسته دی عبّاسُوی تز گل باشیم اوسته
زینب شهِ دینون نه گوروب رنگی سارالدی
بیر هاله ی غم زاده ی زهرا یوزین آلدی
امّیدیم حسین سسلدی زینب سنه قالدی
کسدی دیه سن قارداشیمون دشمن امانین
توکدی ایتی خنجرلر اونون حیدری قانین
سعی ایله قالا اورتولی بو حزن قضیّه
قویما بیله اصغر آناسی بیر ده رقیّه
قوی هر نه بیلور ایلسون اشرار امیّه
نشر اولسا بو سوز خیمه ده سس قوزاناجاقدی
داغلی آنالار حسرت اوتیندا یاناجاقدی
نهره ساری سرعتله گلیب شمس امامت
عبّاسی گزیب تاپدی او دریای کرامت
جسمینده گوروب حدّدن آرتیخدی جراحت
بیر اوخ توخانیب صاغ گوزونه قانی دایانمور
هی سسلدی عبّاس گوز آچ گوردی اویانمور
بیر حاله قالیب شکل و نماسی پوزولوبدی
صرصر دیه سن برگ گل یاسی یولوبدی
وار بیر گوزی سالم اودا قانیله دولوبدی
آخر نفس ایستوردی حسین کام دل آلسین
قولّاری یوخیدی گوتوروب بوینونا سالسین
شاه شهدا قویدی یوزین قانلی جماله
آغلار گوزیله جان دئدی دل آچدی سؤاله
قزلار دئدی دوزمز بیلورم گورسه بو حاله
ایکاش گلیدی دیلوی شرح کلامه
نهر اوسته یاتیسان آپارام یا کی خیامه
گوردوم منه گویا سوزی وار ایلور اشاره
قارداش منه خاطر اوزُوی سالم فشاره
سن گت قیل علی اصغر شش ماهوه چاره
قزلار منی آختارسا آخیدما یوزه اشکی
ده اوخلادیلار سو گتریدی سیزه مشکی
ای تشنه وئرن جان ایکی شطّون آراسیندا
آی یر وئرن اوخلاره قلجلار یاراسیندا
اصلاح ائله عیبین بو سوزون وار هارسیندا
قوی منّت ابوالفضل "صفا" رحلت ائدنده
بالینمه گل قابض الارواح گلنده
- دوشنبه
- 4
- مرداد
- 1400
- ساعت
- 12:14
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه