دولانوب دایره ی عشقده غم پرگاری
تاپدی رونق گینه فرزانه لرون بازاری
یاتان احساسلره ویردی عواطف الهام
اویادوب ماه محرّمده دل اخیاری
سیطره تاپدی بو آی قرمزی قان شمشیره
بورونوب قانه شفق نشر ایلیور اخباری
کیم محبّ علویدور گینه قاره گرک
چکه میدانه شکوه و شرف ایثاری
ویره بیر حال معزّا ئوزونه شیعه ی ناب
دولانا اللّری قوینوندا گرک انظاری
سیل اشکین ایده رخسارینه شوقیله روان
یوا طومار گناهین گهر ابصاری
سالا بیر یادینه قبرین او قرانلوق گیجه سین
هامی بی شبهه ملاقات ایدروک اجباری
یاتما غفلتده عزیزیم بو جهان فانیدور
سنده گز تاپ عرفا مثلی دل بیداری
مکنت و مال و حشمدن الوی اوزملیسن
بیلمسون بیل بو قوانین حق داداری
آغلا بیر گون اوزوه تا نقدر فرصت وار
گج اویانسون اولاجاق خفّتون سرشاری
الوی باغلاما احسان ایله آللّهه گوره
قبره گلمز سنلن پولّارون دیناری
هر نه تکلیف قویوب بوینوا دین نبوی
واجب الطّاعتدی هر تک تکی یوخ انکاری
حکم قرآنیله تنظیم ایله هر مسئلوی
بوشلا دیو هوسی مسلک استکباری
خواهش نفسوی چک سلسله ی زنجیره
نهی از منکر ایله اوز اوزوی تکراری
صله ارحامی فراموش ایلمه دنیاده
طول عمرونده وضوحاً گورونر اثماری
بوشلاما دینوی دنیایه گوره ای عاقل
قویما شیطان چکه بیراهه لره افساری
گل بو ایّام عزا توشه ی عقبا قازاناق
دوز حسینی چاغیراق ایلده بیز اون گون باری
دگول اغراق دیسم قاره چکور حورالر
وا حسیندور اولاریندا دیلنون اذکاری
بعضی نادانه معمّادی بو تجدید عزا
برد اندیشه سی درک ایلمیور اسراری
بیر حسین کی کچه حق اوسته شیرین جانیندن
بیر به بیر جان ویره دین اوسته هامی انصاری
نجه انصاردی یتمیش ایکی ممتاز بشر
عبد صالح آدی عبّاسدی پرچمداری
نهری تسخیر ایلیوب ویرمادی سو لبلرینه
گوردی چون تشنه دی مخیمده حسین قزلاری
ایله سلطان شهیدانه وفاداریدی
تشنه جان ویردی حسینون او گوزل سرداری
منصب باب الحوائج یازیلوبدور آدینا
وسعت لطفینون آری یوخیدور مقداری
اودی هر کیم دوشه بیر مشکله دیلدن چاغیرار
یتیش امدادیمه ای شیعه لرون غمخواری
وار یری ذکر اولا بیر قدرت اعجازیندن
مستند مسئله دن واقف ایدیم حضّاری
مجلس ختمدی تهرانیده بیر منزلده
واریدی نچّه نفر الده دگول آماری
ذاکر عترت اطهاردی چون صاحب عزا
نوحه خوان شاعر حسینچیدی گلن چوخلاری
ذاکرین علوی اوخشادیلار آغلادیلار
اوره ک آئینه لریندن سیلنوب زنگاری
بلمدیم نولدی دونوب سوزلری عبّاس آدینا
بیری مجلسده دوروب باشلادی بو گفتاری
ساکنم من دیدی بو شهرده بیر منطقه ده
بیر مسیحی منه همسایه دی یوخ آزاری
بیر مریض اوغلی وار آرتین آدی بیماریدی
سارالان یاپراقا دونموشدی گوزل رخساری
لا علاجیدی او بیچاره اوشاقون مرضی
سرطان دکتر مخصوصی دمیشدی واری
دوقّوز ماه محرّم کی اولا تاسوعا
ایلدیم عزم عیادت گورم اول بیماری
آتاسین گورجک اوشاقین دیدیم آرتین نجه دی
دیدی ظاهردی وجودینده ئولوم آثاری
گوزلریم دولدی منیمده اوره گیم یاندی اونا
سویلدیم صبر ایله باخ گور هله نیلر تاری
بیری مشهوردی غرق اولسا اگر دریاده
کوپوگه گورسه الین تز آتار اولسون یاری
باخیشیندان بله احساس ایلدیم والده سی
یالواروردی منه شدّتله ایدم همکاری
نا خداگاه سوروشدیم نیه بیلمم بو سوزی
اعتقادوز کیمه وار کشف ایله استخباری
دیدی بیز حضرت عبّاس آقوزی چوخ سُوَروک
ارمنی لر آرا وار شهرت استمراری
نه نه سی سفره ی عبّاس آچاجاق نذر ایلیوب
گر شفا تاپسا بالام اولدی منه اقراری
بس دیدیم تز گوتور آرتینی گیدگ من آپاروم
مجلس یاسیدی عبّاسون اولاق زوّاری
عزم راسخله تز آلدیم بالانی آغوشه
دیدیم عباس گوزوم یاشینی ایتدیم جاری
بیر عزاخانیه گتدوک سولدیم احوالین
نوحه خوان باشلادی بو مطلبه استغفاری
لطف عبّاسدن ای شیعه اوشاق تاپدی شفا
قوشدی اخیاره کرم کانی او گون اغیاری
حیف لقمانه الیم چاتمادی بیر گون سوروشام
بو نه حکمتدی تحیّرده قویوب ادواری
ال دوتان شخصون الین فتنه ی دوران باغلور
تنگناده قویور انسانلاری زشت اطواری
گره کور ابوالفضلون آدینا آچیلور
آیا حرمت قازانیب شعشعه ی انواری
اوزی مین مشکلنن اولدی مواجه بیلسوز
گوزی اوخلاندی قلم اولدی ایکی قولّاری
باشینی یاره لدی ضربه ی سنگین عمود
یره آتدان یخیلیب صورت اولوب گلناری
یوخیدی قولّاری آهسته دوشه مرکبدن
یوزی اوسته یره گلدی چاغیروب دلداری
گل طبیبانه گور عباسوی بیرده گوروشک
آپاریم قلبده تا خاطره ی دیداری
آل قوجاقه منی سن منده اوپوم گل یوزوی
عطرون دولتی ویرسون منه عزّت باری
گورسه لر یاره لی نعشیمدن حسین عطری گلور
بو حسین نوکرینون قابل اولار معیاری
سنه خاطر بیلوسن ما ملکیمدن کچدیم
حمد اولا خالقه اولدیم ئلیمون فخّاری
اوغلوم عبدالّهی قوشدوم آتاسیزلار صفینه
قبریمون اوسته گلوب آغلیوب اولسون قاری
دورد اوغول داغی چکیلدی آنامون سینه سینه
بوکولوب قدّی آنون فاطمه نون اوخشاری
خدمتیم مورد تقدیس و پسندیده دی گر
گل دعا ایلیک اوتدان قوتاراق احراری
سن دعا ایله حسین من یارالی لبلریلن
دیوم آمین خدا عفو ایلسون ابراری
چوخ عزادار گلر حشره ولی شرمنده
ایسته شامل اولا الطاف حق غفاری
گلون ای شیعه اولاق بیزده دخیل عبّاسه
چاغیراق صدقله مستوفی حق درباری
ارمنی دن بیزی کمتر دوتا انصاف دگل
شیعه دن باش دوتا حاشا فرق زنّاری
وار بیزیمده سولیک قلبده گزلین سوزمیز
کیمه اظهار ایده بیلّوک بو غم بسیاری
سنی زهرا یتیش امدادمیزه قبر ایچره
قویما چکسون بو عزاداری یامان گون خواری
وار "صفا" نوندا تمناسی ئوزون لطف ایده سن
گوزل اولسون گونی گوندن یازیلان اشعاری
- دوشنبه
- 4
- مرداد
- 1400
- ساعت
- 12:30
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه