قورولدی بزم غم محنت اساسی
حسینون دایر اولدی بزم یاسی
آناسی فاطمه دارالشّفاسی
گلون وار بوردا هر دردون دواسی
دوشن ای درد بی درمانه شیعه
حسینی سسله گل افغانه شیعه
آچیب ال بو آقا احسانه شیعه
قویار حرمت گلن مهمانه شیعه
کریم الوالدین اهل کرمدی
مجیب الدعوه شاه محترمدی
حسین ایثارده سیندیردی سدّی
اودور وار صدر احبابینده ردّی
جنانه دوندرر نار اشدّی
بوغازیندن اوپوپ آغلاردی جدّی
بئله فرمایش ایلردی پیمبر
سنه جانیم فدا اولسون مکرّر
حسین قیلدی وفا قول و قراره
منای عشقده پروردگاره
فدا وئردی جوان و شیرخواره
گئدیب باشدان باشا یاره مزاره
قبول اولدی مقام امتحانی
قوتارسون بار غمدن عاشقانی
حسین آللّهلن ایلوبدی سودا
تاپوبدور قدرت حیّ توانا
کیمون دوتسا الین دلبند طاها
حمایت ایلور اوندان ذات یکتا
اورکدن یا حسین کیم قیلسا فریاد
قسم حقّه ائدر مشکلدن آزاد
یازولّار قیس هندون پادشاهی
واریدی بیر وزیر عبد جاهی
مسلمانیدی احمد شمع راهی
دیردی پادشاهه گاهگاهی
حسین بن علینون شوکتیندن
امامون وصف حال دولتیندن
وزیر از بس ائدیب سلطانه صحبت
یاراتدی قیس قلبینده محبّت
امامی خوابده ایلوبدی رؤیت
شه هندوستانِ با سعادت
شه دینون الینن کامه چاتدی
مرام و مسلک اسلامه چاتدی
قضا را قیس بیر گون آشکاره
اراده ایلدی چیخسون شکاره
اوزیلن گوتدی بیر عدّه سواره
چاتیبلار بیر مصفّا مرغزاره
گزوردی لشگریله شاه، هم سو
گوروبلر ناگهان بیر برّه آهو
دئدی قیس اول سپاه ارجمنده
سالون تئز برّه آهونی کمنده
فراره تاپماسین یول بو چمنده
کیمون قاچسا کناریندن رمنده
گرک گئتسون اوزی دوتسون گتیرسون
منه سالم همان آهونی وئرسون
احاطه ایلدی لشگر غزالی
مبادا قاچماقا اولسون مجالی
او حیواندا گزوردی جای خالی
گوروب شه خلقدن دورموش آرالی
همان یردن شتابیله پر آچدی
کنار قیسدن صحرایه قاچدی
اوزی قویموشدی سلطان چون قراری
اودور تئز میندی اسب راهواری
ائدیب تعقیب آهوی فراری
دوشوبدی جنگله ناگه گذاری
قاچیب جنگلده گیزلندی غزالی
ایتیردی قیس اونی جوشدی ملالی
تلاشیندن اولوب مأیوس سلطان
قیتسون ایستدی زار و پشیمان
نه گوردی ناگهان بیر شیر غرّان
قاباقدان اولدی القصّه نمایان
فراموش ائتدی وحشتدن شکاری
امیر هند اولوب شیرون دچاری
دئدی آللّه ندور بو یرده چاره
کمک یوخ بیر نفر من بی قراره
گرک اوز دوندرم غیبی نگاره
حسین گل سسلدی دوشدوم حصاره
چتین وقتیمدی شیره دستگیرم
آقا امداد ائله یالقوز اسیرم
حسینون آدی دیلدن اولجاقین فاش
گلور بیر آتلو گوردی جسمی خونپاش
ویروبلار بسکی خنجر نیزه اوخ داش
گوزون اوستونده قاندان گیزلنیب قاش
دوتوب قان صورت محنت فزاسین
پوزوب شمشیرلر شکل و نماسین
قویوب حیرتده قیس حکمرانی
حسینون یاره جسم خونفشانی
یادیندان چیخدی اوز درد گرانی
توکوب گوز یاشی اولدی نوحه خوانی
دئدی جان قورتاریب مهلک خطردن
ولی مشکل قوتارسین شیر نردن
باخوردی پادشاه هند حاصل
نه گوردی شیرلن دوردی مقابل
اشاره شیره قیلدی قان شمایل
او شیری بیشه زاره اولدی مایل
دوشوب تشویشدن قیسون خیالی
دئدی آللّه کیمیدی بو یارالی
عجب شخصیّت عظماسی واردی
مقام قرب اَو اَدناسی واردی
باشیندا بس ندن غوغاسی واردی
هایاندا قوی گوروم دعواسی واردی
قباقه گلدی تئز قیس پریشان
سلام ایلوب دئدی ای مرد ایمان
بویور کیمسن گوروم هاردان گلورسن
وحوشون رمز گفتارین بیلورسن
بو حشمتلن یارالی تک گزورسن
دونوب غرباله جسمون قان اَلورسن
نمایاندی جمالوندن جلالون
ندن قانه بویانمیش گول جمالون
بویوردی زاده ی زهرای اطهر
حسینم من ایکی دنیایه سرور
امامم سبط احمد پور حیدر
سلام ایلر منه گوگده ملکلر
چاغیردون سن منی امداده گلدیم
قویوب اطفالیمی بلواده گلدیم
گرفتار اولسا هر کیم هر مکاندا
امامین سسلسه بحرانی حالدا
یقین ساخلار اونی خط اماندا
چیخاردار ساحل امنه بیر آندا
ائله وار لطفی خالص دوستانه
گلر بغدادیدن هندوستانه
بیر عدّه امّت اهل شقاوت
منافق ضدّ دین ضدّ ولایت
رئوسینده یزید پست فطرت
امام عصریدن ایستوردی بیعت
چکیبلر اوستومه شمشیر بُرّا
غریبم کربلا آدلو مکاندا
علیّ اصغریم شش ماهه تیهو
آپاردیم رزمگاهه تا آلام سو
نه گوردیم گلدی بیر تیر سه پهلو
بویاندی قانه مرغ باغ مینو
قزل گُل مثلی غنچام پرپر اولدی
الیم اوستونده قربان اصغر اولدی
شبیه مصطفی' مه پیکر اوغلوم
سرور قلب لیلا اکبر اوغلوم
ملک منظر امید مادر اوغلوم
یاتیب القان ایچینده پرپر اوغلوم
خیامه خوشه ی پروین آپاردیم
عباده دوغرانان نعشین آپاردیم
واریدی قهرمان بیر قارداشیمدا
بیر اردو لشکریدی تک باشیمدا
هله آثاری واردی گوز یاشیمدا
یخاردی سدّ اولیدی بیر آشیمدا
اونون امّیدینه چیخدیم وطندن
بئلیم سیندی ابوالفضلیم ئولندن
واریدی بازوان زور مندی
کورکدن انلی هم قدّ بلندی
میننده رخش تندر خو سمندی
دیردون داغدی بس داغ اوسته اَندی
گوزل سرویدی خولّاری بیچیلدی
قلم قولّار اولوب اعضا کیچیلدی
دوتولدی قیس خوشبخت و گرامی
سوروشدی ای منه ارزنده حامی
نئدیم من ایندی ای عصرون امامی
اجازه وئر چکیم منده حسامی
گلیم اوز لشگریملن خدمتونده
آخا قانیم منیمده طاعتونده
و یا گل قیل مزیّن پای تختیم
بویوک منّتدی اولسا یار بختیم
سنه تاپسین تعلّق تاج و تختیم
دوای دردیم اولدون وقت سختیم
فراموش ائتمرم بو التفاتی
سنون سایونده تاپدیم من حیاتی
واریم حاذق اطبّا دولتیمده
مهیّا هر نه خوان نعمتیمده
سنه حرمت واریمدی نیّتیمده
خلوصیم وار آقا هر صحبتیمده
بیر آز خدمت ائدم یارون ساغالسین
چکیم لشکر قصاص اعدادن آلسین
گلیبدی یاره لی سلطان بیانه
امیر هند قیس حکمرانه
واروندی حسن نیّت صادقانه
محبّت گوزلدون چوخ عاشقانه
وارون گر عزم جبران مسلّم
عزادار اول منه هر ایل محرّم
تلاش ایله دایان عهد و وفاده
هر ایل بو موسم و ماه عزاده
قرا گی اگنوه ای پاکزاده
منی سال یاده آغلا فوق العاده
گلیب شوره سوله وای نور عینیم
حسینیم وای حسینیم وای حسینیم
یری واردی قلم ائتدوکجه ناله
گله شاه شهیداندان سؤاله
ندن بس زینب آشفته حاله
دوشنده جور اعدادن ملاله
باجون زینبدن ای شاه ولایت
نیه بس ائتمدون آیا حمایت
دوتاندا خیمه لر نار عداوت
قاچاندا چوللره آل طهارت
خیام طاهره اولدوقجا غارت
ویراندا بی حیا دشمن شماتت
گزیدی چاره سیزلر راه چاره
غرابه دستگیریدی هزاره
سمایه اوج ائدنده داد و آهی
گوریدون سن بنات بی پناهی
یوخیدی هئچ بیرینون دادخواهی
هره بیر یاندا سسلوردی الهی
بو داغلی سینه می غم تیری دلدی
نه قارداش نه بابام امداده گلدی
ندور آیا جوابی بو سؤالون
مگر قیسه دگول برتر حلالون
نیه بس اولمادی ممکن وصالون
دوشنده چوللره اهل و عیالون
هایاندیدون حسین قزلار دینده
بابا ادرکنی یاندوخ سسلینده
اولا وحشی عرب الده بهانه
مروّتسیز الینده تازیانه
حریفی نچّه یالقوز نازدانه
چیخار داد و نواسی کهکشانه
رقیّه سسلنردی عمّه یاندیم
یتیم اولماقیمه ایندی ایناندیم
یامان گونده دَیَرمیش درده یاری
اولا شخصون گوزلدی غمگساری
تک الدن سس دیرلر چیخماز آری
قولاقلاردان چیخاردان گوشواری
گوروب قیزلار تکدی تاپدی جرئت
بنات حقّه اولدی هتک حرمت
حسین جان کئچدی عمریم سنّ و سالیم
گنهکارم الیم بوش چوخ ملالیم
سنه خاطر واریم فعلاً جلالیم
سرافراز ایله وقت ارتحالیم
"صفانی" شامل لطف ایله مولا
قاپوندان بو قوجا وقتینده قوما
- دوشنبه
- 4
- مرداد
- 1400
- ساعت
- 15:36
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه