بیلور اولارکی بو بزم عزایه حاضردور
شب شهادت شخص امام باقردور
آناسی فاطمه دور دختر امام حسن
آتاسی سیّد سجّادیدی اسیر فتن
آدی محمّد باقردی مبتلای محن
امام عصرده حتماً گلیبدی ناظردور
اورک گوزیله بو محفلده اگلشیب آغلا
تلاش ائله اوزوه توشه ی بقا باغلا
عزیز حضرت زهرایه سینوی داغلا
اوزیده وار بیزیلن بو عزاده حاضردور
سبب خلقت عالمدی چهارده معصوم
هاموسی لیک جهاندا اولوبدولار مظلوم
بویاندی قانینه بعضیسی چوخلاری مسموم
ائدوبله ترک بو دنیانی رنج خاطردور
گولی همیشه سالور نیش خار پیچ و خمه
امام اُمّتی اهل زمانه درد و غمه
شمار غصّه و اندوهی گلمیور رقمه
اینانمیور یارانان گئتمه لی مسافردور
گوروم بو میز خلافت جهاندا خوار اولسون
فساد نسلی گرک تختی تار و مار اولسون
سریر سلطنت حقّه اعتبار اولسون
رضای خاطر مخلوق و حیّ قادردور
نقدر حُبّ ریاست توکوبدی نا حق قان
وئروبدی آل علی دینه بیکران تاوان
امام عصرون الیله قورولماسا دیوان
قُوای دینه مسلط همیشه کافردور
همیشه زشتله زیبادی بیر بیرینه رقیب
نجه گئجیله گونوز بیر بیرین ائدر تعقیب
اولوب هر عصرده بیر نانجیبه توش نجیب
امام باقره عبدالملک معاصردور
رواج دینه نه اندازه ایلیوب کوشش
وئروبدی عالم اسلامه دانشی پوشش
همان تعلّم و تعلیمدی تاپوب جوشش
نتایج ثمری زمره ی مفاخردور
صفا وئروردی امامون تلاشی دورانه
فلک حسادت ائدیب نفسی گتدی جولانه
چکیبدی والی وقتی شرار نیرانه
تهیّه ایلدی بیر زین اسب خاسردور
او زین اسب کی باطنده زهرداریدی
به رسم هدیه امامه گله قراریدی
گلیبدی یثربه زینی که مرگباریدی
نه لر اولوب بیلسوز شهره ی منابردور
همان او زینیله مسموم اولوب امام هدا
بالاسی جعفر صادق امامه دوتدی عزا
جوار رحمتینه اوغلونی چکیب زهرا
قلوب شیعه ده دائم عزاسی دایردور
ایا امام زمان یا خلیفة الرّحمان
اولوب مُحبّلرون قلبی غصّه لردن قان
نقدر بیز سنی فریاد ائدک سنه قربان
نقدر قلب شریفون شکیب و صابردور
بیزیم کی سینه میزی تیر غم ائدیب آماج
مگر دوام ائلیور سنگ کین دگنده زجاج
مجابدی وئره هر شیعه گوز یاشیلا رواج
ائمّه بزمینه هر کیمسه ذاتی طاهردور
هره بهانه ائدیب بیر امامی دیل داغلار
سنون کیمی هامی جدّون حسینه چوخ آغلار
محرّمی صفری باشینه قرا باغلار
صفاده عمردی آغلار بو غمده ذاکردور
حسین غمینده گرک ایلیک فغان و نوا
توسّل ائتدی حسینه پیمبران خدا
خطرده نوح نبی آدم حضرت یحیی
حسینون آدی دوای دل اکابردور
- دوشنبه
- 4
- مرداد
- 1400
- ساعت
- 15:38
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه