غربتده حسین مسلمی غم سالدی حصاره
مندن الون اوز سنده دولانما بو دیاره
وار کوفه نون اهلینده بو اندازه منیّت
دعوتلی قوناقلارینه ایلولّه اذیّت
مهمانه یازوب هاردا بو رفتاری شریعت
بیل باغلاما بو مردم بی عاره دوباره
پیمان شکن انسانلاری وار کوفیه گلمه
گِت رُومه فرنگه ولی بو حُومیه گلمه
گوز گورمسه دیل وصف ایلینمّز نیه گلمه
چون یوخدی وفاسی بولارین قول و قراره
اوّل گونی چوخلار منه اولدی گرویده
جاسوسلری ویردی خبر فوری یزیده
مأمور ایلدی ابن زیادی او شقیده
آماده اولوب قتلیمه بیر عدّه سواره
هانی نون ایوینده ایلدیم عزم اقامت
مندن اونی شرمنده ایدیب اهل شقاوت
توکموشدیله بیر مندن اوتور طرح جنایت
احوالیمه قان آغلیا گلشنده هزاره
چوخداندی دیدیم اهل عیالیمدن اوزاقم
یول گوزلینیم واردی گرفتار فراقم
اولدورمیون آخر سیزه غربتده قوناقم
قویمون منی حسرت حرم و ایل تباره
مولا منی تک گوردیله بو قوم بد اختر
تک جانیمه بش یوز نفر الده ایتی خنجر
کچدی اورگیمدن او زمان قاسم و اکبر
حسرتدن اوره ک قانی روان اولدی عذاره
حیلیله منی سالدیلا گوداله یخلدیم
اود توکدیله باشیمه من اودلاره سیخلدیم
شمشیریله داشیله سنانیله ویریلدیم
اولقدر ویران واریدی گلموردی شماره
وای حالینه اوغلانلاریمون قالدی اراده
صبح ایلیه جکلر گجه نی هانسی سراده
یا ربی اسیر اولمیالار ابن زیاده
رحم ایله اوزون اول ایکی طفلان نزاره
ای باد صبا سویله حسینه بو غمیمدن
اوزدیم سنه خاطر الیم اهل حرمیمدن
اللّهه گوره سنده بو نوعی دوت الیمدن
قویما باتا زلفی قزیمون گرد و غباره
بیر ده اونا باش سالیغی ویر چوخ نگراندی
گوردوم دینن اعضاسینی باشدان باشا قاندی
بیر جسمیدی مین اسلحه و تیره نشاندی
سالسون باشینا عترت یاسین داخی قاره
چکمیشدیله بام اوستونه اول مرد خدانی
فوّاره کیمین باشدان آخوردی یوزه قانی
گیتمشدی قوای بدنی تاب و توانی
جان قصدینی جلاد ایدیب ای اهل اشاره
یاندیردی یانان قلبیمی بو عمده مصیبت
لطف ایله "صفا" ده تاپا بیر چشم بصیرت
مسلمده اولان عشق حسین عشق حقیقت
قلبنده هویدا اولا تا یانمیا ناره
- دوشنبه
- 4
- مرداد
- 1400
- ساعت
- 15:44
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه