یا حسین عشقون عجب شیعه لره نعمتدی
اسم اعظم آدوی ذکر ایلمک رحمتدی
نه گوزلدی بو قضا و قدرون منشوری
ذات حقدن بیزه بو نعمت اگر قسمتدی
دول غربده میلادمیز اولسیدی اگر
ایندی دیدوک نبوی شرعی بوتون بدعتدی
آری یردن گوه جن شکر ایلسوک واردی یری
قویوب آللّه بیزی بیر یولداکی پر قیمتدی
ملل حاضرون ادیانینی کیم ائتسه مرور
واردی چوخ هرزه مکاتب ثمری خفّتدی
بویوروب خالق عالم علناً قرآندا
بقره سوره سی بو مطلبیمه آیتدی
دیور هر کیمسه نی بیز ایستسوک ارشاد ائدروک
بو دلیله بیزه حقّون نظری رأفتدی
گینه بیر آیری مسلّم شعف انگیز خبر
کثرت رأفت حیّ احده علّتدی
خلعت حبّ ولایت هامی نعمتدن باش
عاصی اولسوقدا گوزل قلبمیزه زینتدی
چون کیمون اولماسا قلبینده علینون حبّی
ساحت حقّه اطاعاتی بلا حرمتدی
واللّه آللّه بیزی خوشبخت ایلیوب دنیاده
گلون عهد ایلیه گون قدر بیلک فرصتدی
بو فنا دهرون هوا و هوسین باشدان آتاق
گذری جاه و جلالی دئمیک حشمتدی
یاپیشاق فاطمه نون اوغلی حسینون اتکین
او حسینی کی ملائک درینه حسرتدی
قورتاریب فطرسی بیر دفعه خطردن بو آقا
دایانیب ایندیده قبرینده نئچه مدّتدی
آغلیوب اوخشار حسینی نقدر وار دنیا
نظری چونکی حسین زائرینه خدمتدی
آی حسین عاشقی گل سنده اگر دردون وار
دی حسینه سوزوی هاردا بنا هیئتدی
هئچ بیلورسن نقدر دردلره درمان ائلیوب
نه پول ایستر نه ده پارتی گلنه منّتدی
قاپوسی دائم احبّانون آچیقدی یوزینه
وقتی یوخ صبح اولا یا نیمه شب ظلمتدی
کیمه بیر نسخه یازا قید بلادن قوتارار
شرطی دوز سوزدی دوز اخلاصدی دوز بیعتدی
بنزمز مادّی اطبّایه وار آللّه صفتی
دگول آللّه رفقا رتبه سی ابدیتدی
ولی آللّه اونا اوز قدرتین ایلوب تفویض
بو همان مهر و محبّتدی غنی دولتدی
چاتمیوبدی بئله بیر دولته هئچ عبد و عبید
شهدا شاهی فقط صاحب بو نصرتدی
هم حسين دعوت اولوب گوگلره هم جدّى رسول
بو لبن خوار او چهل ساله يقين حكمتدى
آتاسين بير يارا مهمان ايلدى جنّاته
بالا ساى سيز يارا شرح اولسا آغير محنتدى
اودى هر ايل غمى ايل دونديگجه تازه لنور
ائله بيل تازه مصيبتدى گران رحلتدى
آللّه امريله سماواته چكوللر قاره
اَليور اشك عزا حور و ملك رخساره
بير حسين كى اونى سبحان بينيب معناده
اودى وار رتبه ى شايانى ايكى دنياده
ذبح اعظمدى آدى ثبتدى شاه شهدا
تانيور خلق اونى چون حاضر اولار ميعاده
هامى يارانى مكرّمدى اوشاقدان بويوكه
گره كورى آچار صودامرى چوخ ساده
بير به بير ماملكيندن كچيب آللّهه گوره
حرّدن اصغره پاينده دى كرمّناده
كيم خلوصيله على اصغرينون دامنينه
اَل آتا خردا الينن يتيشر امداده
آلتی آیدا بو بالا ایلدی تحصیل سلوک
دئمدی یوخ اوخا آچدی بوغازین صیّاده
ساحت حقّیده جان قویدی تقرّب تاپدی
محترم ساخلیوب آللّه اونی بو اسناده
معتبر بیر خبریم واردی مناسب سوزیمه
آقامون عشقی کمک ایلسه گر انشاده
راوی سلماندی همین مطلبه قال الباقر
بیری معصوم بیری شهرتی وار منّاده
وارمیش کشور ایراندا زمان سلمان
بیر ستمکار ملک مستیدی استبداده
آدی پرویزندی پادشه سفّاکون
دولتی توسعه وئرمیشدی عبث بیداده
مشی ذات ازلی اولدی مقدّر حاصل
مبتلا ایلیه سلطانی غم عظماده
بلی هر کیم ایکی دنیاده بیچر هر نه اکیب
خیری خیّر آپارار شرّ چاتار شدّاده
شاه پرویزنی بیر درده دچار ائتدی قضا
زندگی کامینه تلخ اولدی همین سوداده
بیر باش آغری شاها مستولی اولوب جان فرسا
قالمادی تاب تحمّل او قوی اعضاده
آلدی آرامشین الدن قوتاریب یاراسی
یخلیب بستره حال فزع و اغماده
یغدیلار کلّ اطباء جهانی باشینا
وئرمدی فایده سلطان چوبالور ایذاده
وحی اولوب ساحت پیغمبر عصره کیمیدی
یازمیوب کاتب مربوطه قالیب اخفاده
صورت حاذق اطبّاده گئده پیغمبر
پرس و جو حال ملکدن اولا اول مأواده
طبق فرمان خداوند طبابت ایلیه
شاه خوشبخت چاتا صحت استمداده
به به اول شاه روانشاد گرامی حالینا
گرچی بدکاردی باخ بخت دل ناشاده
نه طریقیله طبابت ایلسون شاهه نبی
درس وئرمیشدی احد واسطه ی ارشاده
لاجرم گلدی نبی مجری فرمان خدا
شاهدن قصد عیادت واریدی ایفاده
دئدی شاها نگران اولما علاج ایلیرم
باشوون آغریسی زایل اولا بو اثناده
وئردی سلطانه اورک غم یمه پوزما حالوی
دردوون منده دی درمانی اولا آماده
شه دیله گلدی بویور تئز منی قورتار غمدن
عجله ایله چیخور آز قالا جان سینمدن
او پیمبر کی حکیمیدی به ظاهر امّا
بیر رسولیدی گئدیب ایلیه حکمتله قضا
دئدی چوخ ساده دی درمانی بو دردون سلطان
ائدرم من سنی بو غصّه دن السّاعه رها
گتیرون بیر صودامر طفلی ولی شرطی بودور
والدینی وئره قلباً بو تمنّایه رضا
آنا اوز صودامرین ساخلیا آغوشینده
ذبح ائده باشینی شمشیریله رغبتله آتا
نئچه قطره او لبن خوارون آخان قانیندن
توکرم کاموه دردون تاپا فی الفوری شفا
شه دئدی یوخدی گمانیم وئره بو امره رضا
نه بئله بیر آنا اولماز نه بو جرئتده آتا
دئدی پیغمبر رحمت تاپیلا شاید اگر
سنده شایسته دی چوخ ایلیه سن بذل و عطا
اولمادی چاره چیخیب جار چکیب ایلچی لری
هامی شهر ایچره بو سوز اولدی کماکان افشا
تاپیلوب بیر بئله زوجین باخون اقباله
شدت فقردن ایلر دیله چوخ آه و نوا
دئدیلر بیر بیره هر چند چتین مسئله دی
فقری دفع ائتمگه بو طفلی وئرک شاهه فدا
گتیریبلر او ایکی مزدوجی درباره
آناسی صودامره گاه باخور گاه شاها
نه چتیندی آدامی تنگه سالا یوخسوللوق
بالاسین کیم ساتار آیا پولا خاطر رفقا
دوشنیب بزم مداوا هامی مات و مبهوت
امر ائدیب شاه وئریبلر نقدر سیم و طلا
ویردیلر بیر ایتی شمشیر آتانون اللرینه
گوزلریندن آنا گوزیاشی توکور لایُحصی'
برق شمشیری آنا گوردی دئدی وای بالاما
کمک ایله منه یا رب اورگیم دوندی قانا
ایستدی ذبح ائده باشین بالانون باباسی
آللّهون رحمی گلیب جوشه دیله گلدی بالا
اوز دوتوب شاه پریشانه بدادن صودامر
دئدی ای پادشه مُلک گرفتار بلا
نه گناهیله دیورسن منی ئولدورسون آتام
شیرخواره اوشاقام ایلمیشم من نه خطا
پوزولوب مجلس شاهانه اولوب آشفته
حکمت بارقه ی رحمت اولوب عقده گشا
شاه پرویزنی بیهوش دوشوب صندلدن
تیره قلبین بورودی نور طریق صلحا
خواب غفلتدن آیلدی دئدی التّوبه خدا
بیزه ده قسمت اولا کاش او فیض عظما
شامل لطف ائلدی بنده ی گمراهین حق
طفلی قورتاردی ئولومدن شه اولوب نیک سجا
ای قلم چک سوزی شش ماهه ی خونین دهنه
قوی اورکلر یانا دیلدن اوجالا واویلا
نیه بس گلمدی اصغر دیله آللّه گوره سن
نه دئدی حرملیه شرم ایله نه دیندی اوخا
دیل دوداقی قوروموشدی سوزه گلموردی یقین
یا اوزیندن گوروب عطشان باباسین ائتدی حیا
یا عزادارلرین حالینی آلدی نظره
دئدی قوی قانه باتیم شیعه تاپا باب رجا
یا گوروب قارداشینون پیکر صد پاره سینی
سویلدی صبر ائلیون منده گلیم آی شهدا
یا گوروب یوخدی ربابون صودی خجلتده قالیب
راضی اولمادی آنا آتش حرمانه یانا
یا گوروبدی بابانون یوخدی الیندن دوتانی
دئدی لبیک کمکسیز بابا قربان جانوا
یا ابوالفضل وفادار یرین بوش گوردی
وای دئدی لشگری بیر بیر بویانان قانه بابا
ایندی کی یوخدی نه عبّاس نه قاسم نه حبیب
اوچ پر اوخ گلسه آماندی منی وئر تئز قاباقا
سن منیم حالیمه یانما بابا اوز فکروه قال
خیمه ده گوزلری یولّاردا قالیب آل عبا
قوروموشدی گوزینون یاشی رقیّه باجیمون
سسلیوردی عمو بس هارداسان ای کان وفا
کاش قاسم کیمی امکانیم اولیدی جدله
منده فخریله یاخیدیم الیمه قانلی حنا
قالمیوبدی بابا اعوان و نه انصار سنه
لشکرون قاره لچکلردی گونی بختی قرا
گورورم من بو گونون عاقبت خونبارین
یانورام دیلده نوامیس مطهّر حالینا
دوغریبلار بابا اکبر کیمی رعنا قدوی
شاخ نیلوفروه رحم ائده دشمن حاشا
منده اکبر مثلی قانیمه غلطان اولّام
گیَرَم غملی قوجاقونده قمیص حمرا
بو گئجه منده آنام فاطمیه مهمانم
باغلانیب عالم معناده همین بیع و شرا
باغ وصلون هوسینده گئجه نی یاتماموشام
گه صودی گاه سوئی ایلمیشم رمز بُکا
سو بهانیدی گتیرسیدیله ده ایچمزدیم
نیّتیم چون بودی دین اوسته دوشم لاله قبا
آلیب اطرافوی دشمن نجه من ساکت اولوم
نجه انصافدی تنها قالاسان دشمن ارا
سن امام اوغلی اوزون مفترض الطاعه امام
تلسورلر سنی ئولدورمگه بو قوم دغا
یا حسین سن بیل علی اصغروون قانی چاغیر
قبروه زائر اولا اهل و عیالیله "صفا"
(حاج جوانشیر حبیبی) آقامون مدّاحی
منه بو فیضده یار اولدی اولا کامروا
دئدی یاز بیر سؤز اولا طشت گذاری هدفون
باشلادیم اصغرین آدیله مطوّل انشا
سسلدیم یا علی اصغر سن اوزون ایله کمک
راضی اولسون هم آنون هم اوزون ای ماه لقا
- دوشنبه
- 4
- مرداد
- 1400
- ساعت
- 15:57
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه