یا فاطمه حسینون باشلاندی بزم یاسی
گل سنده بو عزایه ای غملر آشناسی
اولسون گرک شهیدون ختمینده والدینی
گلسون فغانه چیخسون افلاکه شور و شینی
زهرا بو اعتقاده اوخشار اوزی حسینی
ناظردی بو عزاده باشینده وار قراسی
بو موسم عزاده یاران پاک و ساده
هر ایل قرا گینّوک گلّوک فغان و درده
قان آغلیار حسینه هر فرد پاکزاده
آغلار گوزون الهی گلسون منه قاداسی
ای شیعه آغلا سنده بو ماتم و محنده
عطشان اولن حسینه هر یاندا سو ایچنده
یا بیر غریبی گورسون غربتده جان ویرنده
یاد ایلیون حسینی مظلوملر آقاسی
اولسون خبر عموم محتاج و مستمنده
بیمار و قرض داره معلول و دردمنده
گلسون بو آستانه هر کیم دوشوبدی بنده
واردور حسینی سسله دست گره گشاسی
خوش حالینه اولارکی اشکین عذاره باغلار
زهرا سرشک چشمین روز معاده ساخلار
یوم بلاده واللّه بیر بیر سیزی سوراخلار
ویزا ویرر بهشته گوز یاشوون بهاسی
فخر ایلسون حسینی بو عشق پر بهایه
وابسته دور حریم اولاد مصطفایه
یوم المعاد روحی دوشمز یقین بلایه
عشّاقدن حمایت ایلر حقون فداسی
آی کربلا غریبی ادرکنی یا حبیبی
اولماز ندن مزارون غمکشلرون نصیبی
قالموب بو آرزوده احبابلر شکیبی
دیللرده او تباکا هم شور من بکاسی
ای نور عین زهرا ای روح و جان طاها
یا افضل البرایا وی احسن السجایا
بیزدن حمایت ایله ساخلا قاپوندا قوما
حتی بهشتون اولماز سنسیز بیزه صفاسی
سن میر مقتداسن سن پور هل اتی سن
میدان کربلایه تشنه دوشن فداسن
باشون کسیلدی دالدان مقتول اشقیاسن
محراب عشقه دوشدون سینونده اوخ یاراسی
گودال قتلگاهه ال باشدا گلدی زینب
تنها گوروب حسینی میداندا گلدی زینب
ساعات آخرین طوفاندا گلدی زینب
باتموشدی قانه گوردی افسوس مه لقاسی
زینب گلوب فغانه بر پا ایدیب قیامت
سسلندی ای گروه گمراه بی عدالت
آخر قوناقه هاردا جایزدی بو خیانت
بو بی کسون نییدی آیا دیون خطاسی
یوز دوتدی آسمانه خلاق لامکانه
اللّه دیدی حسینیم ذبح اولدی باتدی قانه
سس گلدی قارداشیندان ویر مژده شیعیانه
آغلار حسینه هر کیم فردوسدی جزاسی
مندن حسینیانه ویر بو گران پیامی
امیدوار اولسون هشت و چهار امامی
صادق حسینچی لردن اولّام همیشه حامی
غم چکمه سین "صفا" ده وار بیلّم التماسی
- دوشنبه
- 4
- مرداد
- 1400
- ساعت
- 16:13
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه