گینه قورولدی عزا حسینه
اولیدی جانلار فدا حسینه
محرّم آیی گلیب دوباره
گیندی شیعه لباس قاره
سرشک ماتم توکر عذاره
هامی حسین وای گلر شعاره
اولاندا نوحه سرا حسینه
حسینه گوگده ملکلر آغلار
اولاردا سینه حسینه داغلار
جماله اشک ملالی باغلار
سولار گلستان یانار بوداقلار
عزا دوتار نه سما حسینه
وار احتیاجی کیمون دوایه
دچار اولوبدی اگر بلایه
دخیل گلسون بو گون عزایه
بلند ائتسون الین دعایه
دئسون سوزین با سخا حسینه
خبر وئرون هر مریضه گلسون
حسینه یازسون عریضه گلسون
بو امری بیلسون فریضه گلسون
ئوزون قوشوب اشکریزه گلسون
دخیل دوشسون آقا حسینه
بو آیدا قانه دونوب فراتی
قالوب حسینون سوسوز بناتی
یانوب سوسوزدان مخدّراتی
آچیب محبّه در نجاتی
بیزی باغشلار خدا حسینه
گلر فغانه بو آیدا داغ داش
اولاردا گوزدن توکلّه قان یاش
بشر مثالی اولولّا خون پاش
اینانماسون باخ کتابه قارداش
وئروبدی حق چوخ بها حسینه
سولار آخاندا دیر حسین جان
منی خجالت ائدوبدی دوران
من آخموشام سن قالیبسان عطشان
سو اوسته باشون کسیلدی دالدان
گرک ائدم من نوا حسینه
عزاسی تجدید اولاندا هر ئیل
گلر آناسی اورکده نسگل
یقین ائدر کربلاده منزل
دیور بالام وای او مه شمایل
واری اونوندا وفا حسینه
حسینُ منّی دیوب پیمبر
اوپوب بوغازین حبیب داور
دیردی جان جان اونا مکرّر
وئرر سوسوز جان عزیز مادر
کفن اولار بوریا حسینه
چیخار حسینون باشی جدایه
یارالی باش دیل آچار دعایه
اولارکی حاضر اولوب عزایه
الهی حاشا دوشه بلایه
باغشلا روز جزا حسینه
اولار بالامون وضوسی قاندان
سالار یارالار حسینی جاندان
نمازون اوسته وئرر سوسوز جان
حسینیانی قوتارسون اوتدان
اودورکی آغلار "صفا" حسینه
- دوشنبه
- 4
- مرداد
- 1400
- ساعت
- 16:23
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه