خوش دگول بیهوده جاری اولسا مرده گوز یاشی
چوخ دگر آخسا حسین بزمینده درده گوز یاشی
کسمه بو توفیقی بیزدن ای خدای مهربان
گلسه هر یرده حسینون آدی چکسون شعله جان
آب زمزم تک عذاره اشکمیز اولسون روان
چون گزر زهرا خانم جام بصرده گوز یاشی
آغلا ای گوز هاردا گوردون وار حسینون مجلسی
قوی زر نابه دولانسین قلبوون قابل مسی
دادرس اولسون سنه آل عبانون خامسی
ایلر اعجاز هر حسینی محتضرده گوز یاشی
قودیلار بیر اشتباهه آدمی فردوسدن
دورد یوز ایل اشک ندامت توکدی گوزلردن علن
امر اولوب آغلا حسینه تاپ نجات ای ممتحن
گور کیمه مشکل گشا اولدی ظفرده گوز یاشی
هشتمین معصوم امام جعفر صادق آقا
مژده وئردی بیر حسینی شاعره مزد عزا
کیم حسینون مجلسینده آغلیا یا آغلادا
واجب الجنّتدی گور نیلر قدرده گوز یاشی
بیر روایت چوخ مناسبدی یازیم گوز یاشینه
گور نلر آللّه یازیب گوز یاشینون پاداشینه
آی حسینه آغلیانلارون دونوم من باشینه
بهره وئردی گور نئجه روز خطرده گوز یاشی
نقل ائدور راوی گوروبدور خوابده بیر متّقی
روز محشردی اولوب برپا قیامت بیدقی
آیریلور سرعتله افراد مسلماندان شقی
یوخدی صحبت وار هله یا یوخ نظرده گوز یاشی
بیر نفر گوردوم دیور فریاد واغوثا چکور
گردنینده سلسله مأمور دوزخدن اسور
گل جهنّمدور یرون مأمورلر تئز تئز دیور
وحشتیندن خشک اولوب عاصی بشرده گوزیاشی
منده مبهوت و هراسانم او دوزخ شامله
بیر زمان گوردوم یتیشدی بیر ملک گلدی دیله
چکمیون سرعتله بو شخصی جهیم سافله
فانی دنیاده واریمیش بختورده گوز یاشی
آلدی مأموران دوزخدن گنهکار آدمی
آل دئدی بو درّی قصد ایله جوار خاتمی
باخدی پیغمبر بویوردی گور علی اعلمی
دردوه دگدی بو وحشتلی سفرده گوز یاشی
گلدی سرعتله علیده درّی گوردی از قضا
ناگران اولما بویوردی گئت وئره زهرا بها
بو گران تکلیفی زهرایه عطا ایلوب خدا
لطف زهرادن گناهه چکدی پرده گوز یاشی
گتدیلر زهرای اطهر گورجکین اول فائقی
امر قیلدی شادمان اول آی حسینون عاشقی
بو منوّر درّ گوزیاشوندی جنّت لایقی
جانوی قورتاردی اوتدان وار خبرده گوز یاشی
فاطمه فرمایش ایلوب دوزخون عمّالینه
صاحب درّی رها ایلون قویون اوز حالینه
بو عزادار حسیندی چاتدی خوش آمالینه
یاندیرانماز دوزخ اولسا هر نفرده گوز یاشی
آغلیوبسان سن منیم تشنه وئرن جان اوغلوما
منده برگ مغفرت آلدیم سنه ای باوفا
قویمارام حاشا سنی نار جهنّم یاندیرا
سیم و زردن معتبردی تیره یرده گوز یاشی
هاردا گوردون وار حسینه آی حسینی لر عزا
گئت اوتور بیر یا حسین سسله تاپا روحون صفا
قوی سنی یازسون عزادارانیدن عبّاس آقا
تیغدن کسگیندی واللّهی کسرده گوز یاشی
گوز یاشیلا یاز حسینه صادقانه عرض حال
گر خلوصون اولسا واللّه ایلیور رفع ملال
گزمه اوزگه باب حاجت ای مریض بی ریال
درد بی درمانه درماندی اثرده گوز یاشی
بیر حسین کی دینون اوسته مال و جانیندن کئچیب
اوز الیلن شاهزاده اوغلینا خلعت بیچیب
سو کنارینده سوسوزدان سو یرینه قان ایچیب
وار یری اولسون حسینی نوحه گرده گوز یاشی
بیر حسین کی اونی زهرای اطهر بسلدی
هر زمان مادر دئدی زهرا اونا جان سسلدی
شمر باشین کسدی تشنه قیزلارین زار ایلدی
گوز بولاقینده اولوب قان صود امرده گوز یاشی
بیر حسین کی اونا عرش و سما قان آغلادی
نعشی اوسته عترتی باش یولدی سینه داغلادی
جان وئرینجه باجیلار باشه قراسین باغلادی
قبره گئتدی خواهر خونین جگرده گوز یاشی
نصّ قرآندی جوارح شاهد اعمالدی
بو سؤزه خاطر همیشه قلب ائوی خوشحالدی
شکر ائله بختون "صفا" دنیاده نیک اقبالدی
یا حسین دیلده واروندی چشم ترده گوز یاشی
- دوشنبه
- 4
- مرداد
- 1400
- ساعت
- 16:29
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه