شهید کرب و بلا شهریار دینه سلام
عزیز حضرت زهرا آقام حسینه سلام
سلام او شخصه که مهر و قمر دونر باشینا
ویرالّا بوسه طلوعیله قبرینون داشینا
فدا اولوم آقاما آغلیان گوزون یاشینا
دَیَر جهانون او گوزیاشی کلّ داش قاشینا
غریق معصیته ای گوزل سفینه سلام
غریب دشت بلا شاهکار صنع حقه
سبب غائی ایجاد کلّ ما خلقه
بوغازینون قانی مدرکدی سرخی شفقه
آدینا نوشدی جان دولتیم اولا صدقه
کلیم مهلکه ی عشق مه جبینه سلام
حسینه یتمیش ایکی پاسدار حبل اللّه
طفیل درگه عالی تبار آل اللّه
مطیع امر اولوالامر فی سبیل اللّه
هره سی بیر نفر ابراهیم خلیل اللّه
من حقیردن اول جمع بی قرینه سلام
حسین فاطمیه صدقله عزا دوتانا
قرا گینلره غم بسترینده قان اوتانا
محرّم آیی غبار مصیبته باتانا
قانین حسین قانینا شوق و ذوقله قاتانا
عزا دوتانلارا زهرایه نور عینه سلام
بُریر و شوذب و حرّ و حبیب با نسبه
جُنادة بن حَرث بُشر عابس و وهبه
زُهیر و رافع و جُندَب و سیف با ادبه
تمام جان به کف انصار فخر جدّ و اَبه
هِلال و جابر حریت آفرینه سلام
بزه دی اوّل حسین شاه کربلا بالاسین
دئدی گئت اوغلوم آنون لیلی زلفوی داراسین
سیاه طرّه وی ردّ ایله گورسون آی پاراسین
تحمّلی اولا بلکه گورنده باش یاراسین
منیم دیلیمجه آپار، صوندا یا و سینه سلام
علی اصغر شش ماهه شمع محفل عشق
آلیب قوجاقه حسین اولدی زیب منزل عشق
دَیوب بوغازینه اوخ پرپر اولدی چون گل عشق
بویاندی قانینه جنّتده تاپدی ساحل عشق
سالان آناسینی غوغای شور شینه سلام
حسن نشانه سی شهزاده تازه داماده
اون اوچ یاشیندا جوان عزیز نا شاده
دوشن جنازه سی میداندا قانلو دریاده
عروسینی قویان حسرتده حجله بر باده
حناسی قانه دونن قاسم حزینه سلام
کنار نهرده قولسوز دوشن علمداره
حسینه کرب و بلاده وفالی سرداره
سپر وجودین ائدن سخت وقتی قزلاره
گئدن یارالی باشی نوک نیده بازاره
گوزی نشانه اولان تیر اهل کینه سلام
الهی کاش گورم آلتی گوشه لی قبرین
چتیندی سینه ده حبس ائتمک آرزو صبرین
نقدر گوز توکه بو غمده بارش ابرین
حقیقی عشق زمانون "صفا" پوزار جبرین
گئدیب دیرسن حسین ای گُل مدینه سلام
- دوشنبه
- 4
- مرداد
- 1400
- ساعت
- 16:37
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه