هیجده ساله جوان مظهر ذات داور
رشته ی طرّه سی آویز گل نیلوفر
جلوه ی نور جبینین ایلیوب قرص قمر
ایکی ابرولری گویا ایکی شمشیر دو سر
صف مژگانی نئچه لیلینی آردیجا چکر
گوزلری نرگس شهلا کیمی زیبا منظر
غنچه ی لعل لبی چشمه ی حوض کوثر
دولدیریب چاه زنخدانینه حق شیر و شَکر
یوسف مصر گوره حسنینی احسن سؤیلر
شهدا سیّدینون اوغلی علی اکبر
رخت رزمی گینوب جنگه اولوب آماده
قویدی دستار پیمبر باشینا شهزاده
آلدی رخصت گئده میدانه همان اثناده
سسلدی شاه شهیدان اوغول ای آزاده
گئت وداع ایله آنون لیلینی ده سال یاده
آنادی دل نگراندی بالا بو غوغاده
نقدر رنج گوروب سندن اوتور دنیاده
واجب الطاعه دی مادر بیلوسن اولاده
آیریلیق دردینی سانما آنوا چوخ ساده
گر چی مرسومدی بلبل غم هجرانی چکر
گلدی اکبر آناسین خیمه ده ایلوب رؤیت
گوردی غم دیزلری آغوشده غرق محنت
ایلشیب خیمه ده گوزدن توکر اشک حسرت
تئز سلام عرض ائلدی اکبر شیرین صحبت
گلمیشم من دئدی مادر سنه وقت هجرت
درد دل ایله نه اندازه واروندور فرصت
آخرین لحظه ی دیداردی آخر مهلت
بیرده اولماز بئله بیر لحظه بئله خوش ساعت
ایلیوب جنّته جدّیم منی الآن دعوت
گئدور اسماعیلوی سال یولا مثل هاجر
بزم تودیع اولوب کوته ایکی جانانه
گوردی اکبر آناسین عزم ائلدی میدانه
روبرو اولدی پیمبر نوه سی دونانه
رجز انشاد ائلیوب گتدی آتین جولانه
اکبرم من دئدی فرزند شه خوبانه
اودی شمع شهدا منده اونا پروانه
دولانیب باشینه گلدیم بویانام القانه
صدقه جانیمی احسان دئموشم قرآنه
ناطق صادق قرآندی بابام دورانه
حجّت حقدی واللّهی شه جنّ و بشر
لاجرم ایستدی میداندا مبارز او جوان
کیمدی میدانیمه گلسون دئدی اکبر اوجادان
هاردا پنهاندی عمر سعد لعین هرزه روان
هانی فرمانده لشکرلروز آی راهزنان
بیزی مهمان چاغیرانلار ندن اولموش پنهان
تشنه دی خیمه ده مهمانلاروز ایلولّه فغان
هره بیر جام دوتوب الده گزور تشنه لبان
صودامر اصغری آغوشده مادر نگران
گوزلیورلر آپارام خیمه لره آب روان
سسلسم گرچی سو پا بوسمه سیلاب گلر
تا عمر سعد قولاقینه یتیشدی بو صدا
دوتدی اندامین او ناپاک خبیثون پروا
سسلدی طارقی بی وقفه عمر سعد دغا
دئدی بس هارداسان ای دیو فتن پیر خطا
ایندی گل سنده یزیده ائله جبران عطا
بو جوانون بیزی شرّیندن ائله فوری رها
دئدی طارق گئدرم شرطی وار اولسون اجرا
حاکم موصل اولام ثبت اولا پاداش آدیما
گوسترم من بو جوانه ائله بیر برق بلا
ننه سی خیمه ده توکسون یوزینه اشک بصر
عاقبت قیلدی تقاضاسین عمر سعد قبول
قیدیب خیمه سنه طارق او دیوانه ی غول
غرق آهن ائلیوب هیکلین امثال جهول
چوخ غروریله گلیب ایلدی میداندا نزول
طبل جنگی چالنیب گتدیله جولانه خیول
باشلادی طارق علی اکبره پند معمول
دگولم راضی ننون ایلشه یاسونده ملول
دئدی اکبر اونا لال اول بو نه صحبتدی فضول
اکبرم من نوه ی حیدر کرّار و بتول
حق علینندی علیدی بیزه عالی رهبر
جنگه آماده اولوب حاصل ایکی جنگنده
بیری مسلمدی بیری شیطانا مخلص بنده
چکدی شمشیرینی طارق او قوی درّنده
بیلمدی اکبری عبّاس ائلیوب رزمنده
طارقون تیغینی رد ایلدی بیر ترفنده
حمله ور اولدی حسین اوغلی علی توفنده
بیر قلج ویردی باشیندان یخیلیب شرمنده
گلدی قارداشی اودا دوشدی کماکان بنده
طارقون اوغلی گلیب اولدی اودا بازنده
اوچ حریفین ائلدی طعمه ی نیران سقر
تیز پر قوش کیمی کرکسلری ایلوبدی شکار
دایانیب مرکز میداندا گینه حیدر وار
لشکر کفر قباقینده دوروب وئردی شعار
ایستدی شور غروریله حریف پیکار
گیزلنیب دالدا عمر سعد باخور ذلّت بار
بکر بن غانمی احضار ایلدی فاسقه یار
جنگه تحریک ائلدی بکری او روبه کردار
عجله ایله دئدی لشکریم ایلولّه فرار
زبده سرکرده لریم ئولدی ئوزیم اولدیم خوار
ذورق فکریمی بو غصّه ائدور زیر و زبر
جنگه راضی ائلدی بکری عمر سعد پلید
دئدی بکر ایندی اونا وئرّم اوزوم درس عنید
بویارام قانینه خوشحال اولا قصرینده یزید
آناسی سسلیه شهزاده بالام اولدی شهید
قیدیب خیمه سنه مردک ابلیس مرید
گینیب جامه ی رزم اولدی بدن ثقل حدید
گوتوروب ششپر و شمشیر و سپر اولدی پدید
مرکب اوستونده ئولوم دامینه یول سالدی شدید
مرحب خیبری فکر ائتدی اوزین بی تردید
بیلمیوردی وار حریفینده فنون حیدر
طبل و شیپوریله میدانه یریش گوتدی عدو
بدرقه ایلور او نامردی نئچه عربده جو
دشمن عُرّا چکور اکبرده دیور هو یاهو
بکرله حاصل علی اکبر اولوب رو در رو
اولدی هر تک تکی ارجوزه سرا معرکه پو
تن به تن جنگی شروع ائتدی ایکی تندر خو
قوریوب شدّت گرمادن آغیزلاردا گلو
یورولوب اکبر اوزی تشنه دی یوخ مشکده سو
دایانیب عرصه ده یالقوزدی پریشان گیسو
لبه ی تیغی ولی اود سر دونانه توکر
بکر بیر نعره چکیب ایلدی آهنگ ستیز
هی ویریب مرکب رهواری گوتوردی ایله خیز
جوّ میدان او همایشدن اولوب گرد آمیز
سویلدی اکبره ای طفل دبستان حجیز
بیرده اولماز سنه بو مهلکه دن راه گریز
حیفدی سالما بلایه باشوی وئر تمییز
گل گئدک منله جوان ایله جدلدن پرهیز
بویارام قانوه یوخسا نه بیلور ضربه ی تیز
بو جواندی هله طوی ایلمیوب دوتسون عزیز
یا کی شمشیروی چک دوت باشیوا فوری سپر
شادماندی او هیاهوده هله لشگر شام
بیر طرفده دایانیب دل نگران تشنه امام
چاغیریب زینبیده گلدی او بانوی گرام
گوردی زینب ولی شاهون دولانور حالی مدام
مضطرب حالدی تشویشه دوشوب مرد قیام
دئدی زینب نگرانسان ندن ای میر انام
دیله گلدی او زمان حضرت شایسته مقام
باجی بیر دیو چکیب اکبریمه ایندی حسام
چوخ خطرناکدی قلبیمدن آلیب تاب و دوام
نگرانم نئجه آرام اولا بیلّم خواهر
نشر اولوبدی بو خبر خیمه لره دوشدی هراس
توکولوب اهل حرم سسلدیلر یا عبّاس
گوردی شه لیلیده ناظردی او پژمرده اساس
امر ائدیب زینبه ای خواهر صاحب احساس
آپارون لیلینی اوز خیمه سین ائتسون اجلاس
آنادی گورسه تاپیب اوغلینا بیر تیغ تماس
یا یخیبلار یره قانه بویانیب شاخه ی یاس
دوزه بیلمز اورگی غصّه دن ایلر آماس
هاجریله ائله بیر لحظه بو محزونی قیاس
اَله هشیار اولا هر کیمسنه معیار گلر
بیرده لیلایه سفارش ائله ای محرم راز
خلوت ائتسون خیَّم طاهره سین فوری بیرآز
زلفین آلسین الینه غمزده بانوی حجاز
دود آهین الیه عرش معلّایه فراز
ساحت حقّه امیدیله آچا دست نیاز
ایستیه اوغلونی فاتح بویورا بنده نواز
بلکه بو مهلکه دن جان قوتارا اکبر ناز
چون حریفی یل پر زوردی مانند گراز
گرچی آللّه یولین هر کیمسه گئده خوار اولماز
چوخ مؤثّردی دعا قیلسا آنا وقت خطر
مشی صاحب زمنی لیلی گوروب امر مجاب
تئز اطاعتدن او بانو یوزینه سالدی نقاب
گلدی بیتوته ائدیب خیمه ده علیّه جناب
درگه حقّه یوزین دوتدی اولوب دیده پر آب
ایلدی صدقیله رحمت قاپوسین دق الباب
آغلیوب توکدی گل صورتینه درّ مذاب
دوت الیندن بالامون سویلدی اول سینه کباب
سنه خاطردی الهی دئدی بو سعی و صواب
او دعا ایلدی آمین دئدی گیزلینجه رباب
بیلمیور اکبره امّا نه یازیب لوح قدر
لاجرم باغلادیلار هر ایکیسی عزم جدل
بکر شمشیرینی چکدی ائلیوب حمله ازل
نئچه یول نیزه و شمشیر اولوب ردّ و بدل
وئرمدی فایده هر حمله ائدیب مرد دغل
یتشیب نوبه علی اکبره تعقیب عمل
حمله ایلوبدی علی شیر غضبناکه مثل
گوستریب اوج شجاعتده او ملعونه رَمل
گوردی شمشیرینه آماده دی خوش زیر بغل
ائله سرعتله ویریب سسلدی ویر گلدیم اَجل
لش مرداری نگونسار دوشوب مثل بقر
گورسنوب تا او شجاعت نبوی مظهردن
آفرین صوتی چخیب عرشه ایکی لشگردن
دئدی لشکر بو جوان ارث آپاریب حیدردن
چوخی ایستور قاچا بیراهه گزور صفلردن
اود ویریب غصّه عمر سعده باخور سنگردن
چاره جو اولدی نئچه حیله روش افسردن
امر اولوب شمر بد اندیشه و بد اختردن
تیر باران ائده لر اکبری هر معبردن
بلکه جان قورتارا اعدا یل نام آوردن
تک به تک جنگ ائلسوک یوخ بیزه امکان ظفر
گوردی اکبر اوخ آتانلار اونی ایلوبدی هدف
دشمنه حمله ائدیب سسلدی یا شاه نجف
توش اولوب سنگ جفاکارلره پاک صدف
بیلمیور امّت نادان ندی معیار شرف
نئجه گل شاخه سین آغوشه چکر هرزه علف
آلیب اطرافینی سای سیز قشون ایلولّه شعف
فکری دعواده دی هر دم باخوری تلّه طرف
هله وار اسلحه سی الده ویرور بیر بیره صف
قشونی تنگه گتیرموشدی او پاکیزه خلف
بیر نفر یاتدی کمینینده دوتوب الده کسر
منقذ شوم قسم یاد ائلیوب اولدی نهان
عربون وزر و وبالی منیم ایلوبدی بیان
یخماسام من بو جوانی یره آتدان الآن
بویارام قانینه اول قامت رعنانی عیان
بخته باخ اکبری ایلوب او کمینگاهه روان
دوردی منقذ ائله کی گوردی گلور شیر جوان
نقدر قدرت بازوسی واریدی دالیدن
ویردی بیر خنجر علی اکبره زهرا دئدی جان
لیلیده خیمه ده دیسگیندی اولوب دل نگران
دئدی اللّه گوره سن واردی بالامدان نه خبر
باش بولوندی قان آخور گوزلری گورمور گلنی
مرکب اوسته یخیلیب شبه رسول مدنی
پوزولوب شکلی چیخیب طرح و نمادن بدنی
بورونوب قانه اولوب مثل عقیق یمنی
دوره سین دشمن آلیب قان توکن اشرار دنی
دیور هر دم بابا گل دادیمه درک ایله منی
جان دوداقیمده زیارت ائلسم خوشدی سنی
ایستیور منقذ دون باشیمی کسسون علنی
قورخیام گئج گله سن محو اولا پوزقون چمنی
چونکی اعدا گورورم کسمگه باشیم تله سر
درک ائدیب اکبرین ادرک سسینی میر هدا
دولانیب رنگی خانم زینبی ایلوبدی صدا
باجی تئز گل بالامی یخدی یره قوم دغا
رحمسیز دشمن الینده قالا ایوای بالاما
مرکبین میندی شتابیله او دم دوشدی یولا
شیر تک ویردی اوزین لشگره شاه شهدا
میمنه میسره نی بیر بیرینه ویردی آقا
چاغیرور هر دم اوغول گاه دیور وا ولدا
هارداسان سس وئر آماندی منه سس جان بابا
بیر حزین سس اونی ناگاه ائلیوب جلب نظر
ناگهان میوه ی قلبین. شه محشر تاپدی
ایاق آلتیندا گل احمری پر پر تاپدی
بویانان قانینه بیر لاله ی احمر تاپدی
گینوب قرمزی گویا علی اکبر تاپدی
چکدی آغوشینه مه پیکری بستر تاپدی
دئدی جان جان بالا رقّت دل رهبر تاپدی
گوزلرین سیلدی رخی جلوه ی دیگر تاپدی
سسلدی وئرمدی سس نسگل او سرور تاپدی
گوزون آچ سویلدی یول قلبیمه اخگر تاپدی
وای دئدی جدّیمه بنذر بالا ای نور بصر
ایستدی خیمیه شهزاده نی سلطان آپارا
داغلیب عضولری گوردی یوخ امکان آپارا
سسلدی زینبی امداد ائده آسان آپارا
گلدی نسوان حرم تحفه ی شایان آپارا
بابا تئز آچدی عباسین یره قربان آپارا
دوره سین آلدی او دم بیر سوری جیران آپارا
دئدیلر لیلیه کیم مژده ی احسان آپارا
منتظردی آنیا قصّه ی هجران آپارا
بوییوب قانه الین صورت ریحان آپارا
گوزلمه اکبری دای ایلدی عقبایه سفر
گتدیلر خیمه قباقینده او بحرانی یره
قویدیلار ناله و افغانیله قربانی یره
گوردیلر دوغرانان اعضانون آخور قانی یره
قارداشین چکدی بلا کش باجی پنهانی یره
لیلی شرم ایلمسون گلسون او طوفانی یره
شه گئدیب تاپدی آنا فرصت شایانی یره
گلدی گوردی یخلیب سرو خرامانی یره
دئدی ایوای بالا توکدی دُر غلطانی یره
هاردا بو نوعی یخیبلار علی مهمانی یره
نئجه من ایندی گئدیم یثربه سنسیز اکبر
باشلادی عمّه سی طوی گورمین اکبر لایلای
جدّی پیمبره مه صورتی بنزر لایلای
سو کنارینده سوسوز ذبح مطهّر لایلای
صورتی سوره ی قرآنه مصوّر لایلای
قد رعناسی اولان لاله ی احمر لایلای
دوغرانان سرو سهی قامتی دلبر لایلای
ایاق آلتیندا اولان گل کیمی پرپر لایلای
آناسین ایلین آواره صنوبر لایلای
اوزی گویچک سوزی شیرین گُله مظهر لایلای
اوخشیوب عمّه "صفا" ناله ائدیب شمس و قمر
- دوشنبه
- 4
- مرداد
- 1400
- ساعت
- 16:41
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه