مشهوردی بو قصّه محبّان آراسندا
کوچ اُسرادن دل سوزان آراسندا
فوج اُسرا ناقه لر اوسته قولی باغلی
سرگرمدیلر ناله و افغان آراسندا
سر قافله گوز یاشلی اوره ک داغلی باخوردی
مبهوت اتوروب ورطه ی طوفان آراسندا
هر دم گوز آچور قزلارون آمارینه باخسون
گورسون نجه گوز دیده ی گریان آراسندا
بیردن گوزی دوشدی سر شاه شهدایه
ایتمور حرکت گوردی بیابان آراسندا
حسّ ایلدی اعدانی دوشوب جوش و خروشه
مرعوبدیلر جلوه ی ایمان آراسندا
غافل نه بیلر مشکل عرفانی جهاندا
جاهل یاشیار جهلده دوران آراسندا
زین اب ئوزین شاخص خوبانه یتوردی
قارداش ندی دردون دیدی عدوان آراسندا
قانیله دولان گوزلری رمزیله سوروشدی
یوخ نازلی رقیّم باجی طفلان آراسندا
ایستکلی بالام اولمیا یولّاردا دوشوبدی
گور هاردا قالوب یوخدی اسیران آراسندا
وحشتلی بیابانده قالسا قیز اوشاقی
تشویشه دوشر وهمله ایقان آراسندا
بیر دسته گلیدی سنه تاپشوردیم امانت
سالدون نیه گوزدن بو گلستان آراسندا
ساخلاردیم او دُردانه نی ایللر گوزوم اوسته
ساخلار نجه مادر بالاسین جان آراسندا
حتماً بالاجا قلبنی موج غم آلوبدی
تنها یخلوب وادی احزان آراسندا
بیر واقعه دن خردا بالامدان نگرانم
نیلر قالا بیر دن نچه دونان آراسندا
جانیندن اوشاق اولسا دفاع ایلیه بیلمز
عرشه اوجالار ناله سی طغیان آراسندا
آللّه سن اوزون رحم ایله بیچاره ربابه
نشر اولمیا بو حادثه نسوان آراسندا
کلثومله ال باشدا دوشوب چوللره زینب
سرعتله قاچور خار مغیلان آراسندا
باخمور یولا داشدی دره یا سمّی تیکاندی
یا اینکه قاچورلار گل و ریحان آراسندا
قویمازدیلا پرنده ده قاچسون گوز اویندن
فرش و فلک اوسته مه تابان آراسندا
هر دم بری سسلردی رقیه بالا گلدوک
سس ویر بیزه یاتما غم هجران آراسندا
یورقون بالا سس ویر سسوه جان دیسون عمّون
گل باغریمی غم یاردی بو زندان آراسندا
یاددان بالا هر دردی فراموش ایلدیم من
ئولدیم بو قصوریمدن عزیزان آراسندا
بلبل هوس ایلر گزه گُلّر سراقیندا
پائیز جفاسیله زمستان آراسندا
بیر لحظه بابوندان ساری گتمزدون اوزاقه
تصدیق ایلدیم عشقوی میدان آراسندا
ای بلبل باغ علوی هاردا یاتوبسان
گوگلوم دارخور موج خروشان آراسندا
آغوشیمه گل گوزلرون حسرتیم من
ساخلار سنی عمّون داخی مژگان آراسندا
ایستور سنی مندن بابون ای نور دو عینم
گتمور دایانوب فوج یتیمان آراسندا
صولدان ساغا ساغدان صولا چوخ گزدیله ناگه
بیر سایه گوروندی گوزه اذهان آراسندا
آغوشینه چکموشدی ستمدیده بالانی
سالموشدی یرین بستر احسان آراسندا
ال باشینه چکدیگجه دیردی بالا جانی
یوخدور بله گُل روضه ی رضوان آراسندا
الان دیرم عمّه لرون فوری گللّر
گت شامده قور خیمه غریبان آراسندا
منده ایله قورخما نه نوم سنده بالامسان
صحبت ایله هر دم لب عطشان آراسندا
زهرانی خانم قزلاری گورجک دیدی یا رب
آیا بو ملکدور یاشور انسان آراسندا
کیمسن دیدیلر آی خانم عورت ندی دردون
حفظ ایلیوسن بو قزی دامان آراسندا
گتدی دیله زهرانی بو سوزلر دیدی بیردن
اغیاره یاراشماز اولا یاران آراسندا
زهرانی بهشتدن بو قزون ناله سی گتدی
هر یرده وارام عترت قرآن آراسندا
غافل اولا بیلمز نه نه دیلسیز بالالاردان
وار عزّتمیز دولت امکان آراسندا
منده سیزیلن کوفه و شاماتی دولانّام
جمع اسرا و شه مردان آراسندا
توکمه یره بیهوده "صفا" عشق متاعین
قوی گوهر عشقون قالا مرجان آراسندا
یا ربّی حسینون گل خندانینه خاطر
روح اللّهی حفظ ایله جماران آراسندا
قویما اونی حق لشگرینی زحمته دوشسون
باشین اوجالاندیر بیزه ایران آراسندا
- دوشنبه
- 4
- مرداد
- 1400
- ساعت
- 16:44
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه