عالم تانیور معدن غیرتدی اباالفضل
سرمست می جام ولایتدی اباالفضل
گوز آچدیقی گوندن بو جهانه او گل یاس
مدیون اوزینی رهبر دینه ائدیب احساس
علّت اودوکی کرب و بلا دشتینه عبّاس
سویلردی بو توفیق سعادتدی اباالفضل
جان بذل ائده عاشور بلاده تلسوردی
نوبت یتیشه عشق جهاد اوسته اسوردی
توسن اودی سرعتله ئولوم بزمینه سوردی
چون دیدی شهادتده عبادتدی اباالفضل
شاهون ائله کی گوردی پراکنده دی فکری
نیلوم نجه ایلومدی دمادم سوزی ذکری
وار سویلدی عبّاسوون ای شاه بو شکری
غم چکمه هله صاقدی سلامتدی اباالفضل
اهل حرمون تشنه دی گورّم نگران سان
سقّایه دئمورسن نیه بس اشک روان سان
قوی من اوتانیم سن نیه خیمونده نهان سان
سندنده بالونداندا خجالتدی اباالفضل
مایلدی اورک تشنه لروندن اولا دلجو
قورخوم بودی مندن دیل آچیب ایستیه لر سو
مشکی قوری عطشان دولانور بیر سوری آهو
غیرتدن ئولوم جامینه حسرتدی اباالفضل
رخصت منه لطف ایله اولوم جنگه مهیّا
اکبر مثلی منده اولوم قانیله حمرا
جام الده سوسوزلار منه ایلولّه تماشا
یعنی دور ایاقه سویا حاجتدی اباالفضل
فریاد ائلدیکجه منی عطشانلار عمو جان
دنیا دونالوب باشیمه اولدی اورگیم قان
ای کاش دوشوم تئز منیده قانیمه غلطان
اعلان اولونا غرق جراحتدی اباالفضل
گئتسم ئولومه تکدی نوامیس الهی
مندن صورا یوخ اوزگه حسینونده سپاهی
آزاده لرون تک منم امّید و پناهی
عهدون ولی دین اوسته شهادتدی اباالفضل
آماده دی جام می شیرین شهادت
حاشا اولا هر مِی ده بو طعم و بو حلاوت
گئت نوش ایله وار قزلاردا فیض اسارت
زینبده مهیّای اسارتدی اباالفضل
دوتدی نظرینده گینه ده آل عبانی
بیر حمله ده تسخیر ایلدی آب روانی
میل ایلمدی اصغره خاطر او جوانی
باخ گور نقدر مرد مروّتدی اباالفضل
چوخ لشکری قعر سقره ایلدی واصل
بیر لحظه امام امری دوشوب یادینه حاصل
سست اولدی ایکی قولّاری اول ماه شمایل
فکر ائتدی عدو خسته ی محنتدی اباالفضل
بیر خصم زبون فرصت او ساعت اَله سالدی
عباسی او نامرد چتین مشکله سالدی
قولّاری دوشوب فُلک وجودین گِله سالدی
نوفل دئدی ایندی منه فرصتدی اباالفضل
قالخزدی گویه قهریله اوز آهن عمودین
دوتدی هدف عبّاسین آچیخ رأس وجودین
فکر ایله اوزون نیلدی گور پیکر جودین
زهرانی او صحرایه حزین گتدی اباالفضل
آتدان یره عبّاسی یخیلدی یوزی اوسته
بیر تیر سه شعبه اوتوموشدی گوزی اوسته
قولّار قلمیدی گینه دوردی سوزی اوسته
حیدر بالاسی روح شهامتدی اباالفضل
بیر گوز یارا بیر گوزده اولوب قانیله حمرا
بیر یاندا دوشوب مشکی دوشوب بیر یانا سقّا
قانلی علم آغوشده ایلوردی تقاضا
بو پرچمه باش گئتسه ضمانتدی اباالفضل
باش کاسه سی سینمیشدی آخوردی یره قانی
گئتموشدی سراپا یارالی جسم توانی
زهرا دایانیب گوردی ولی قدّی کمانی
جان جان بالا سویلر بو نه حالتدی اباالفضل
یا فاطمه عبّاس رشید اوغلووا خاطر
بیر گونکی اولار جسم "صفا" قبره مسافر
گوندر باشیمون اوسته اباالفضل اولا حاضر
چون باب کرم باب شفاعتدی اباالفضل
آی بزم عزاخانه ی عبّاسه گلنلر
آی هیئتینی درده شفاخانه بیلنلر
گولسون بیزه قوی عاریه دنیاده گولنلر
بیلموللر عزیز در رحمتدی اباالفضل
بیر مخلص عربدن بو سوزی ایلدیم ادراک
وحشی عرب الاندا آدیندان ایلیور باک
قورخار حرمیندن کچه هر بنده ی ناپاک
به به نه گوزل صاحب حشمتدی اباالفضل
بیر بنده کی آللّه اونی ذکر ایلیه صالح
شأن و شرفینده اولا پیغمبری مادح
ایسته سنه عشقون اولا بو امرده ناصح
عقلون گوجی چاتماز نجه نعمتدی اباالفضل
هر کیم نه نه سیندن صود امیب بزم عزاده
عبّاس آدی گلسه گله جک شوریله داده
یاد ایلسون هر گون نه نه سین ذکر و دعاده
محشرده گورر گوهر عصمتدی اباالفضل
- دوشنبه
- 4
- مرداد
- 1400
- ساعت
- 20:53
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه