گل عزادارون ابوالفضل اوره گی قان دولانور
سندن ایستور هامی ئوز دردینه درمان دولانور
یتیشیب ماه محرّم گینه باشلاندی عزا
گوز یاشیلان گیوب عبّاسه گوره شیعه قرا
سسلیور داده سنی ملّت آزاده آقا
الی قوینیندا آدون دیلده پریشان دولانور
بیر نظر سال سنی زهرا دل ناشادمیزه
یوخدی سیزدن سورا بیر کس چاتا فریادمیزه
آقالیق ایله یامان گوندی یتیش دادمیزه
اهل ایران نجه گور بی سر و سامان دولانور
واردی بیر عدّه ساتیب دینیله دنیانی پولا
چکوب ابلیس اولاری مکریله شیطانی یولا
آل ویری نرخ دلاریله دی نفعی چوخ اولا
نامسلمان کیشی ظاهرده مسلمان دولانور
نفس امّاره ایدیب عقللری بی مایه
دمیور کیمسه گوروم آجدی یا توخ همسایه
قبره فکر ایلمیور جمع ایلیور سرمایه
قویوب ئوز آدینی بلمم نجه انسان دولانور
چوخی مشغولدی جمع ایلمکه مال و منال
قارشیب بیر بیرینه ایندی حرامیله حلال
حظّ آسایشه شاملدی فقط اهل ریال
فقرانی سایا سالمور بری هاردان دولانور
لُقمه پاک اولماسا اولادون اولار اهل خطا
بیر خطا کارده هاردان تاپیلار شرم و حیا
سلب ایدر جامعه دن نعمت ارزانی خدا
هرزه خار و علفه صحن گلستان دولانور
من ئوزوم ایلمیشم ئوز ئوزومی خانه خراب
یوخسا آللّه بیزی خلق ایلمیوب ویرسون عذاب
آدمیز شیعه دی امّا نه حساب و نه کتاب
مونس جاندی مسلمانلارا شیطان دولانور
نقدر ویرسون عزیزیم عقلالر بیزه پند
قویما ابلیسی سالا بوینوا دنیاده کمند
احتکار ایلمه ارزاقی دگول عامّه پسند
گورموسن هیچ بو جماعت نجه ویلان دولانور
شرع دین نبویده بودی آئین و قرار
سود هر بیع و شرا روشن اولوب آینه وار
تومنی مین تومنه ساتما پشیمانلیقی وار
خام فکرونده نه اندازه بو رجحان دولانور
گل تباه ایلمه آز عمری هوای هوسه
قورخ او گوندن کی دوشه تند شمارش نفسه
گله بیلمز کیمی فریاد ایلسون اوندا سسه
نعشون اوسته حرمون جمله هراسان دولانور
ایندی کی خالق عالم بیزه ایلوبدی عطا
حُبّ اولاد علی عشق شه کرب و بلا
چالیشاق ویرمیه بیزدن داخی باش جرم و خطا
گور نجه جنّته بو کشور ایران دولانور
آچ بصیرت گوزوی سیر ایله تاریخی گوزوم
من نصیحت ایدورم نفسیمی یوخ سنده سوزوم
سلب اولور یادیمه دوشدوگجه ئولوم منده دوزوم
گوز قباقینده گلور عالم نیران دولانور
بیر تجسّم ایله کیملر یارانیب کیملر اولوب
ایشدوبسن نقدر شاه و قوی پیکر اولوب
فتح ایدیب عالمی چنگیز هم اسکندر اولوب
سنلنده بو ئولوم غم یمه پنهان دولانور
سوزی بوردان گینه قوی دوندریم عبّاس آدینا
بی گمان آرتیرار عبّاس آدی شعرین دادینا
آغلیاق بیز اونا سالسون بیزی زهرا یادینا
اونداکی امّتی آزاد ایده اوتّدان دولانور
عبد صالحدی واریدی نچه منصب آقامون
ال آتار دامنینه صاحب مطلب آقامون
کیم آدین ایلسه صدقیله مخاطب آقامون
تاپاجاق دردینه هر کیمسه کی درمان دولانور
بیز حسین نوکری اولسوق او حسین عاشقیدی
بو حسین عشقینون عبّاس فقط لایقیدی
نجه آتّدان یخلیب شاهد اونا خالقیدی
ایندیده مهدی اونا چوللّری گریان دولانور
گلدی شیطان کیمی شمر ایستدی ایتسون اونی خوار
دیدی گل قوی آپاریم من سنی تاپ عزّ و وقار
اوپ یزیدون الینی شهرت دنیانی آپار
گوزی یولّاردا قالیب اوغلوی نالان دولانور
ئوزُوی سالما بو اندازه بلا و خطره
دگولم راضی قرابت دولانا دردسره
یوز نفر نیلیه جک جنگده یوز مین نفره
دور گیدک باشوه باخ گور نچه اصلان دولانور
بیر امان نامه دی گتّدیم سنه عنوان کمک
دوغما قارداشلاروی سعی ایله امنیّته چک
ترک ایدوز سیز بو حسینی قالا ئوز باشینه تک
سحر ئوز قانینه باخ گور نجه غلطان دولانور
توش اولوب مین غمه عبّاسون او هنگامه باشی
غیضدن بیر بیره سُرعتله گره لندی قاشی
دوندی بیر خیمه لره باخدی یوزه آخدی یاشی
گوردی تل اوسته خانم زینبی نالان دولانور
سالدی نفرتله او ملعونه نظر اشجع ناس
قشقریب باشینه شمرون بدنی دوتدی هراس
یوم دیدی آغزوی ای ارذل دون حق نشناس
دیلون آغزوندا دیور هرزه و هذیان دولانور
من ابوالفضلم ابا صالح علینون خلفی
ویرمرم هرزه امان نامیه الدن شرفی
دوز حسینون یولیدی واردی الهی هدفی
عمردی باشینه قربان اولا بو جان دولانور
ال آتیب جیردی امان نامه نی عبّاس جوان
بویوروب شمر لعینه قید ای هرزه روان
آل امان نامه وی ردّ اول قاباغیمدان نادان
نگران خیمه ده مندن شه خوبان دولانور
نجه من ایندی الهی قیدیم خیمه لره
نیلرم منتشر اولسا بو خبر تشنه لره
خردا قیزلار سیخلیب ایندی یقین عمّه لره
قورخوسیندان هامی ئوز باشینه حیران دولانور
فاطمه قزلاری الان اوره گی قانه دونوب
شعله ی آهلری آتش سوزانه دونوب
شمعلر فکر الیور عشقده پروانه دونوب
وصل موصوفده فرضیّه ی هجران دولانور
الغرض رجعت ایدیب خیمه سینه غملره توش
فضلدی عوندی عبّاس گلور دوش بدوش
یولون اوستونده دایانموشدی حسین مات و خموش
روشنیدی اونا چون عشق نه میزان دولانور
گوردی دیندیرمسه عبّاسی خجالت یخاجاق
منجنیق غم اونون قلبینی سوزیوخ سیخاجاق
بالا قزلارینون امّیدی الیندن چیخاجاق
لحظه حسّاسدی بیر سویگلی جانان دولانور
قویمادی ماه بنی هاشمه غم سایه سالا
پیش دستی ایلدی قارداشینون گوگلین آلا
گینه عبّاس گلیب نطقه که ای شمس ولا
بله فکر ایتمه بابام قویدوقی پیمان دولانور
وار یادیمدا شب بیست و یک ماه رمضان
اَل اَله ویردی بابام منله سنی ایتّدی بیان
گیدورم جنّته امّا هر ایکوزدن نگران
سنی اولا دیدی تا گردش دوران دولانور
بابام ایلوبدی وصیّت سنه من همدم اولام
هر مصیبت سنه اوز ویرسه شریک غم اولام
بیر بله گون سنه الده گوتورن پرچم اولام
غم یمه هر نقدر لشکر عدوان دولانور
بو اوزون قولّاری آخر سنه قربان دمیشم
شریانیمده کی قانی سنه احسان دمیشم
منه عباس دین لحظه ده جان جان دمیشم
ویر اجازه نجه گور صحنه ی میدان دولانور
قویموشام کفّه ی اخلاصه بعنوان صله
فخریله بو باشی قارداش قاباغیندا کسله
اوخ دگه کاشه ی چشمیمدن آخا قاره گله
گوزلریم گورمیه اوخ چلّه کماندان دولانور
بو قوشون یاغدیرا باران کیمی گوگدن منه اوخ
حاشه للّه دیم عشقونده گلن اوخلارا یوخ
نقدر یاره چوخ اولسا الیور اجریمی چوخ
عاشقون عشقی مگر یاره دن اوخدان دولانور
باش مهیّادی عمود آهنه شمشیره قولوم
سن گت آرام ایله قزلاروی قربانون اولوم
شکر اولا خالقه ساغدی هله ساقیله سولوم
ده باجیم زینبه عبّاسی نگهبان دولانور
بویور عبّاس وفا کانیدی آتماز ئلینی
مین امان نامیه ویرمز باجینون بیر تلینی
قیترر همّت مردانه سی دشمن سِلینی
هله ساغدی سیزلن دولت قرآن دولانور
باجی سنتک اودا بیر عمردی خواهانیمدی
قانی قانیمدی شیرین جانی منیم جانیمدی
هاردا بیر خیمه قورام اوردا نگهبانیمدی
اَله شمشیرین آلیب شاد و خرامان دولانور
دینه خاطر دگه مین یاره منه اوخ دیمرم
سینم اوستونده هر اوخ ایستسه یر یوخ دیمرم
غیبدن گلسه صدا آزدی یا چوخ چوخ دیمرم
گوره لر جاندا نجه قدرت ایمان دولانور
هامی عاشقدی سنون عشقوه ای کان وفا
ای ویرن چوخ سرطانی لره بیر آندا شفا
یازور آغلور سنه بیر عمردی غربتده "صفا"
داده گل اوندا کی بو گوزلریم احسان دولانور
- دوشنبه
- 4
- مرداد
- 1400
- ساعت
- 20:58
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه