کربلادن او گونکی واویلا
اُسرا کاروانی دوشدی یولا
خار الینده اسیر اولوب گوللر
رسمدی روزگاره بو معنا
نیزه باشینده ذبح اولان باشلار
باخوب آغلار او باشلارا اُسرا
هامی خستیدی جنگ و غارتدن
قاره پوشیدی عترت طاها
بیری اوخشاردی قارداشین دیلده
بیری آغلاردی دیلده وا ولدا
بیری قورخاردی ناقه دن دوشسون
الغیاث الغیاث ائدور نجوا
چونکی دستوریدی قشون فوراً
آپارا شامه باشلاری اعدا
سالدی بیراهه دن یولین لشکر
تئز چاتا مقصدینه قوم دغا
اُسرا قیرخ ضعیفه عورت اوشاق
سرگروهیدی اوردا زین العبا
سرپرستیدی خردا اطفاله
زین اب یادگار شیر خدا
گوز گوتورمزدی لحظه قزلاردان
گله بیر حادثه خجالت اولا
بیلمورم یانمادی نیه چرخون
اورگی زینبه ندن آیا
اودا یار اولدی لشکر شامه
آچدی آل عبایه دست جفا
ویردیلار بیر اوشاقی یولدا دوشوب
گئجه وقتیدی دشت ناپیدا
یورقونیدی ز بس رقیّه خانم
یوخلیوب دورمادی او ماه لقا
بیر زمان آچدی گوزلرین گوردی
بیر بیاباندی بیر اوزی تنها
ائتمدی باور ایتمگین اوّل
بیله فکر ایلدی گورر رؤیا
سیلدی بیر گوزلرین سالیبدی نظر
سسلدی عمّه ناز دانه بالا
گوردی سس یوخدی ال آتیب باشینا
سس چکیب آغلادی او مه سیما
هر نه اطرافینه نظر سالدی
الغرض یوخدی گوردی بیر یارا
اللرین قویدی باشینه بیردن
چکدی بیر آه جان گزا دیلدن
دئدی ای قانه غرق اولان بابا
یتیش امداده مهربان بابا
یاخجی تاپشیردون عمّمه گئتدون
اودا مندن کوسوب عیان بابا
هامی گوزدن سالیب بو رنجوری
یوخدی احوالیمه یانان بابا
بیلمورم کاروان سالیبدی منی
نه زمان ایلورم فغان بابا
چاتسا دامانوه الیم بیر ده
ایلرم شکوه بی کران بابا
سن منه مهربانیدون هامیدان
آتمادون گوزدن هئچ زمان بابا
یقین احوالیمه منیم سنده
اولموسان ایندی ناگران بابا
قورخورام بیلسه ئولدوره ئوزینی
آنام، ای روحیمه روان بابا
آتاسیز گوردی روزگار منی
محنته ایلدی نشان بابا
چولون آهولریله دمسازم
قوشلاری منله نغمه خوان بابا
قالموشام غم الینده آواره
در به در غملی آشیان بابا
هانی رأفتلی اللرون باشیما
اولا بو چولده سایبان بابا
قورخیدان پیکریم دوتوب رعشه
قالمیوب طاقت و توان بابا
گل منی بیر ده کاروانه یتیر
گلسه زجر ئولدورر عیان بابا
بسکی بی رحمدی گوزوم قورخوب
دیلی تلخیدی جان ستان بابا
ویردی بیر سیلی گورمدیم یولیمی
گوزومه دولدی لخته قان بابا
شل اولا اللری او ملعونین
منی ایلوبدی نیمه جان بابا
کاش تئز قورتارا قرا گئجه نی
روز روشنده وار امان بابا
یا قاچیب کاروانی تئز دوتارام
تاپارام یا بیر هم زبان بابا
شامه جن گر چی یاره دور ایاقیم
گلّم ای محنتی گران بابا
نقدر واردی جان دوداقیمده
قاچارام وار توان ایاقیمده
آغلادی آغلادی او بیچاره
دئدی ای چاره سیزلره چاره
بیر قیزام اوچ یاشیندا یا ربّی
قالمیشام چولده زار و آواره
یول قرانلوقدی گوزلریم گورمز
توخانور هی ایاقلاریم خاره
یورولوب اوتدی یوخلادی او خانم
آچدی گوز بیر زمان او مه پاره
بیر خانم گوردی رأفتله آلوب
باشین آغوشه بنزیور یاره
دئدی کیم سن خانم منه خاطر
بئله اشکون رواندی رخساره
گورورم چوخ جوانسن دیه سن
وار باشوندا نه علّته قاره
بیر گوزون قاندی صورتون نیلی
کیمدی باعث بو سوءِ رفتاره
سنیده اولما یولدا زجر ویریب
منی آگاه ایله بو اسراره
عمّه مه اوخشیور گوزل روشون
گل سن آللّه منیله گفتاره
دئدی زهرا سنه نه نون قربان
نه شیرین دیلسن ای شکر پاره
چکدی آغوشینه دوداقین اوپوب
دئدی جان جان دانیش من زاره
دگولم اوزگه باغری قان نه نوم
منده دوشدوم جهاندا آزاره
منی ثانی ویریب گوزوم قاندی
سینمی توش ائدیبدی مسماره
بیر قولوم تازیانه دن قالخماز
واردی جسمیمده ایندیده یاره
گله جک قان آلا بالام مهدی
سالاجاق اود وجود اشراره
غاصبان خلافتی چکه جک
ید قدرتله بند قهّاره
غم یمه سنده کاروانه چاتیب
یتیشرسن دوباره دیداره
آپارارسان منیم دیلیمجه سلام
اُسرای بنات اطهاره
اوپ حسینونده قانلی لبلرینی
مُزد اولا مام دیده خونباره
دیله دوتدی باشینا ال چکدی
گولوم اللّه دئدی نه گویچکدی
بیر سه ساله خانمدی دل نگران
گوزی اطرافینه باخور حیران
بویلانور هی باخور اویان بویانا
سسلیور عمّه ایلیور افغان
گلدی بیر سس قولاقینه ناگه
گاه اولوب شاد گاه اولوب گریان
دئدی امداد ایله خداوندا
اولمیا زجر پست و بی ایمان
ایکی آتلو سواره ظاهر اولوب
ولی اللرده تازیانه عیان
قورخوسیندان دوروب ایاقه خانم
اَل اَل اوسته سلامه آچدی زبان
اَل آتیب زجر تازیانه سینه
گوز یاشین ایلدی رقیّه روان
سارالیب رنگی کهربایه دونوب
ویرمیون سویلدی یوخومدی توان
دگسه بیر تازیانه ئوللم من
یولومی گوزلیور هامی طفلان
سیز سوروز آتلاروزی من گللم
ترکوزه مینمرم اولار عصیان
منه عمّم دیوب گناهدی چوخ
حفظ حجابین ائدنمسه نسوان
من حسین بن مرتضی قزیام
نصّ آیات عفت قرآن
بش ایل عمّم وئریبدی درس حجاب
کوفه نسوانینه وقیر زنان
قویدیلار یاخجی اوجینا مزدین
دوزوموزدان دادانلار ای دوران
بیر عموم واردی صاحب غیرت
بیلسه مندن کوسر او با ایمان
واردی بیر خردا خواهشیم سیزدن
نار غمدن اولوبدی قلبیم قان
گئتسه آهسته مرکبوز خوشدی
آچارام اجروزه دعایه لسان
یاره دور هر ایکی ایاقلاریم
بسکی خاره داشا اولوبدی نشان
تاپسا شدت ایاقدا یاره لریم
وار یقینیم بو چولده وئرّم جان
گرچه گلسه اجلده یالواررام
دیرم وئر منه بیر آزدا امان
سوز وئریب شامده بابام گلسون
اوردا، احوالیمی منیم بیلسون
گلدی القصّه شمع و پروانه
تاپدیلار بیر بیرین یانا یانه
زینبی گورجکین رقیّه آتیب
اوزین آغوش گرم جانانه
دئدی عمّه سنی چوخ اینجیتدیم
اودی قوشدون منی غریبانه
کیمون امّیدینه آتیب گئتدون
منی بو قورخولی بیابانه
زینبون جوشه گلدی غصّه لری
دئدی یاندیم بو درد پنهانه
منی بو غصّه ایلیردی هلاک
گلمسیدون بو جمع نالانه
سنی اکبر جانی باغشلا منی
پرده چک بو گلیلی عنوانه
بابوا مندن ایلمه شکوه
شرمدن گوز یاشیم دونر قانه
گل دئدی عمّه جانوه قربان
چکدی آغوشینه عزیزانه
دئدی دوشدون هایاندا محملدن
غرقیدی دیده اشک طوفانه
گئتمیوردی بابون دایانموشدی
نیزه لر اوسته مرد مردانه
گوزی قالمیشدی سن دوشن یولدا
لعل اشکین دوزردی مژگانه
هاردا بس دِیدی ناز دانه بالام
چوخ اشاریله بو پریشانه
کربلاده کفیل ائتمیشدی
منی چوخ قارداشیم اسیرانه
صحبت ایله منه گوروم دشمن
سنی یولّاردا اینجدیب یا نه
وئر نشان بیر باخوم ایاقلاروا
فکر ائدیم یاره اولسا درمانه
قویمارام دای یره قوجاقیمدن
غم یمه ای عزیز دُردانه
چکدی نازین محبتیله ویریب
توزلی تپراقلی زلفینه شانه
اوپدی قانلی یارالی لبلردن
ال چکیب باشینه طبیبانه
گوزیمون نوری ناگران اولما
بو قدر یانما نار هجرانه
بیزه حافظدی خالق سبحان
ایسته حقدن "صفایه" فیض جنان
- دوشنبه
- 4
- مرداد
- 1400
- ساعت
- 21:22
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه