رقیّه دل بیلوسن دل ربادن آیریلماز
بیریسی غربت آرا آشنادن آیریلماز
گتیرموشم سنی من شامه جن قوجاقیمده
سفرده هئچ بالا عمّه آنادن آیریلماز
گئدور آنون باجون عمّه لرون عراقه ولی
اورک نه چاره بو غملی بنادن آیریلماز
گلین باجون آلیب آغوشه خردا مرقدوی
توکر جمالینه اشک عزادن آیریلماز
ربابون اوخشاماسی ایلیوب کباب هامونی
آنادی قان اورگی ابتلادن آیریلماز
یارالی قلبینون اوسته ایکی بالا داغی وار
او داغ ئولونجه بو بختی قرادن آیریلماز
ایاقی گلمیور آیریلماقا مزاروندن
آنا شیرین دیل اولان مه لقادن آیریلماز
جوار رحمتوون ترکین ائتمزیدی یقین
اَلولی سینه سی کرب و بلادن آیریلماز
خیالینون قوشی قانلو مناده سیر ایلیور
وجودی محبس ویران سرادن آیریلماز
بابون سنی منه کرب و بلاده تاپشوردی
اودورکی زینبی عهد و وفادن آیریلماز
گلنده محملون ایچره منیله همدمیدون
تاپوبدی خو سنه روحیم صفادن آیریلماز
نجه قویوم سنی تنها گئدیم بو مأوادن
وفالی عمّه غریب اقربادن آیریلماز
گوزل بالا منه مشکلدی دردی آیریلقون
رضا ولیک اورکده قضادن آیریلماز
چتین دوام ائده زینب سنون فراقونده
اگر چه هجر اودی من بینوادن آیریلماز
شیرین دیلون نمکین سوزلرون قراریم آلیب
دادی، دوزی دیلوون حبّذادن آیریلماز
نه نه مون اوخشاری سالدون منی یامان درده
ئولم وجودیمی بو غمفزادن آیریلماز
نه مدّتیدی گوزتلیدون اکبرون یولینی
دیلون قیامته جن یا اخادن آیریلماز
علی و اکبری جنّاتده یقین تاپدون
غم اهلی رسمدی یوخسا نوادن آیریلماز
اسیر لر اولوب آزاد بند مهلکه دن
خمار گوزلری عصمت نمادن آیریلماز
بو شهرون ایچره چوخ اولدون بالا مصیبته توش
بلا نه سرّدی اهل ولادن آیریلماز
رقیّه دور گئدور آل عبا خداحافظ
آنوی عمّه لروی سال یولا خداحافظ
سنی بو شهرده نصب ایلدیم نماینده
عزیز جانوه جانیم فدا خداحافظ
بیزیم قصاصیمیزه انتقامه پنجه وی آچ
یزید کاخینی ایله فنا خداحافظ
خدای لم یزلون چوخدی بیزلره لطفی
ائدر بو قبروی عالی بنا خداحافظ
گلر قوناقلارون اقصی نقاط دنیادن
علیل و منعم و شاه و گدا خداحافظ
کیمون علاجی ئوزولسه جهاندا هر یردن
بیلر بو درگهی باب الرجا خداحافظ
تاپیلماسا بیرینون دردینه دوا سویلر
گئدیب رقیّه دن آلّام شفا خداحافظ
بالاجا اللروون احترامینه آللّه
روا ائدر کیمی ائتسون دعا خداحافظ
اوشاقی اولمیانا قرضداره ملتمسه
دوا ایله گله هر مبتلا خداحافظ
قسم سنی وئره هر کیم حسینه فاطمیه
هامونی سال یولا حاجت روا خداحافظ
وارون بیر عدّه قیزیم بی قرار زوّارون
آدون گلنده ائدللر نوا خداحافظ
یازالّار آدوی بیر قاره پرچمون اوسته
آدوا هیئت ائدللر به پا خداحافظ
اولار اهالی ایراندی شیعه مملکتی
بیزه حقیقی دوتانلار عزا خداحافظ
کرامتون اولا زوّار اهل ایرانه
حمایت ایله اولاردان بالا خداحافظ
بهار عمروی تئز صدمه ی خزان ویردی
سولان شکوفه ده یاس وفا خداحافظ
اَلی اورکده گوزی قارداش انتظاری چکن
ایاقلار آبله قلبی یارا خداحافظ
بوکم تاپیلمادی آغ خلعت آغ کبوتریمه
کفنی بختی مثالی قرا خداحافظ
لطیف پیکری آماج تازیانه لره
شهیده قبره گئدن بینوا خداحافظ
وئرن خرابه ده جان باغری قان رقیّم وای
دوداقی قانلی قولاقی یارا خداحافظ
زمانه قویمادی آسایشون دادین بیله سن
یات ایندی بلبل شیرین ادا خداحافظ
یقین رقیّه دئدی عمّه جانه خوش گلدوز
عوض وئره سنه حیّ یگانه خوش گلدوز
حلال ائدون منی چوخ اولدی زحمتیم هاموزا
گئدون یوروب سیزی گتدیم فغانه خوش گلدوز
گورن بیلن ائشیدن هامیا سلام آپارون
قبیله اهلینه خرد و کلانه خوش گلدوز
سیزون بو خدمتوزه منده بیر دعا ائدرم
بالوزی یورمیا رنج زمانه خوش گلدوز
یتیم اولمیا دنیاده هئچ کیمون بالاسی
نه مسکنی اولا ویرانه خانه خوش گلدوز
آنام بتول سیزه اجر بی کران وئرسون
دیلیم تشکّره گلمور بیانه خوش گلدوز
منیم دیلیمجه علی اکبره سلام آپارون
جوان خوش خط ابرو کمانه خوش گلدوز
دیون باجون سنی گوزلیدی گلمدون یاتدی
گوزون یوموبدی ولی جاودانه خوش گلدوز
علی علی دئدی قوش تک قفسده جان وئردی
آدوی ائتدی دیلینده ترانه خوش گلدوز
مریض هجر ئوزی بی آب و دانه زنداندا
غریبه گئتدی مزاره شبانه خوش گلدوز
علی اصغره ده غملی بیر پیام آپارون
دیون بو صحبتی اول بی زبانه خوش گلدوز
اوپون منیم طرفیمدن اونوندا قنداقین
ولی اشاروز اولا بو مکانه خوش گلدوز
منی چوخ ایستین عبّاس عمومیدا گورسوز
گورون نولوبدی او قدرت نشانه خوش گلدوز
طریق مهر و وفادن کناره دوشمزدی
باتیب گمانم اودا جسمی قانه خوش گلدوز
اونون اوزون قولی غیرتلی همَّتی واریدی
بویوک بلا وئریب اوز اول جوانه خوش گلدوز
محالدی گوز ائویندن سالا کناره منی
بو سوز یاراشماز همان قهرمانه خوش گلدوز
گلنده درد و غمیم جوشه ناگران دیلده
یازاردی اشکیم اوجا پهلوانه خوش گلدوز
و بیرده چاتدوز ایلیکی مدینه ده باجیما
باشینا قاره سالار سوز بهانه خوش گلدوز
دئسه هانی دیلی شیرین رقیّه اوخشامیون
دیون او قالدی قوناق شامیانه خوش گلدوز
"صفا" کچن گئجه هئچ یاتمادی رقیّه جانی
گوروم عوض نه وئرر نازدانه خوش گلدوز
- دوشنبه
- 4
- مرداد
- 1400
- ساعت
- 21:35
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه