دور حسین گلدی باغری قان زینب
شامدن گتدی کاروان زینب
اربعینوندی قبروون اوسته
ایلیور اشکینی روان زینب
ایلیوب الده زلفینی پرچم
آهینی تیغ جان ستان زینب
اوخیور شوریله سرود ظفر
بنت مولای مؤمنان زینب
دمبدم سویلیور بحول اللّه
اولدی پیروز و کامران زینب
دشمنی ئوز ائوینده خوار ائتدی
بیلدیلر کیمدی شامیان زینب
قهری وار ذوالفقاردن کسگین
شیعه ی نابه مهربان زینب
کیم حسینون اولا عزاداری
اونا شافعدی بی گمان زینب
شأنی والا بتوله نایبه دی
بخت اجلالی جاودان زینب
ئوزی حلّال مشکلات قزی
گره کوری تئز آچان زینب
دائماً یاد ائدیب غمین آغلار
ایندیده صاحب الزمان زینب
بیر بئله باجی قارداشین نه غمی
سنه قرباندی شیعیان زینب
گلدی کرب و بلایه واویلا
حشر دیگر ائدیب عیان زینب
وئردی اوّل سلام قارداشینا
وای حسینیم دیوب ویریب باشینا
طاقتی اولمادی قدم آتسون
سورونوب چاتدی قبرینون داشینا
اُسرا گوردی زینبین حالین
خون دل قاتدی جمله گوز یاشینا
بلی عشّاقی حال بحراندا
قویالار خوشدی کامل ئوز باشینا
مرقدین اوپدی تربتین ایله دی
گوزونه سرمه وسمه ده قاشینا
دئدی قارداش روا دگل یولداش
اولا بی مهر یار و یولداشینا
سنه خو تاپموشام ازل گوندن
چاتموشام ایندی اللی دورد یاشینا
شیشه ی عمر پر بهامی فلک
چالدی خصمانه تیره داش قاشینا
آلیب آغوشه قبروی حرمون
اوخشیوب مرقدون اوزوک قاشینا
اورگیم قان اولاردی هجرونده
قالمادی یاخجی اولدی ایل باشینا
باجوی غصّه مرگ ائدردی بو غم
گلدی دیداره جان فشان زینب
گلمیشم بزم غم قورام قارداش
شوریله دشتی دولدورام قارداش
صدر مجلسده سیّد سجّاد
بیر طرفده اوزوم دورام قارداش
اولماسا قاره تیره آهیمدن
قبرون اوسته عَلم ویرام قارداش
اوخشیوب آغلیام دویونجا سنه
قلب مهجوریمی یورام قارداش
بیر حسینیّه کربلاده ویراق
بیر عزا شمعی یاندیرام قارداش
او قدر آغلیام چیخا جانیم
عشقه بو جانی تاپشیرام قارداش
کربلادن گئدنده قویمادیلار
آغلیام دیلده وار یارام قارداش
اودی بو نسگلون اورکده قالیب
وای حسین وایه آغلارام قارداش
قویالار کاش ئولونجه بوردا قالام
واردی بوردان صورا هارام قارداش
بو گوزل قبروه باجون قربان
دیرم دیلدن آتمارام قارداش
کاش بو قبرون اوسته جان زینب
وئره جانانه ارمغان زینب
عترتون قیددن خلاص ائتدیم
سنه بیر عدّه میهمان گتدیم
هاموسی قاره پوش یاسلی دیلار
خسته دیللرده الامان گتدیم
شامدن کربلایه جن آغلار
هاموسی اولدی باغری قان گتدیم
بیری بیماردی بیری رنجور
چوخینی زار و ناتوان گتدیم
گون قباقینده هاموسی سارالیب
نه دیوم گلشن خزان گتدیم
چوخی یولّاردا گئتدی دنیادن
قالان اطفالی نیمه جان گتدیم
دیمیوب دیللرینه ایستی غذا
غملرین ایلیوب نهان گتدیم
بوته ی امتحاندن چیخدی
گنج عصمتلریم عیان گتدیم
اولمادیم شرمگین فاطمه دن
وئردیلر یاخجی امتحان گتدیم
صدقه گتدیلر بولار یمدی
آفرین دیلده بی کران گتدیم
نه چکیب گور بو خسته جان زینب
عمری بیر غملی داستان زینب
یا حسین درده مبتلا باجوام
هامیدان چوخ غم آشنا باجوام
تلّیدن قتلگاهه سرعتله
قاچان اَل باشدا بینوا باجوام
شمریله کشمکش ائدن وقته
اللری دوغرانان اخا باجوام
قاتلون ذبح ائدنده حنجروی
عرشه آهیم سالان نوا باجوام
بیر گون عرضینده یدّی قارداشین
ایکی اوغلین وئرن فدا باجوام
گه قاچیب خیمه گاهه گه تلّه
آل اطهاره همصدا باجوام
قویمادیم سیندیرا سنی دشمن
فتح ائدن شامی مه لقا باجوام
کوفه شهرینده اهل بازاری
ایلین خوار برملا باجوام
بئله فکر ائتدیلر باجون قوجالیب
گوردیلر بنت مرتضی' باجوام
قویمادیم پرچم قیام یاتا
مثل عبّاس باوفا باجوام
بیر نظر سال "صفایه" سن بیل حسین
طبع شعری اولا روان زینب
- دوشنبه
- 4
- مرداد
- 1400
- ساعت
- 21:38
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه