دور گلدی باجون قبروه مهمان آنام اوغلی
سالدی منی چوخ مُشکله دوران آنام اوغلی
هر درد و بلایه باجون اولدی متحمّل
بیر خطبیله ظلم اوین ایتّدی متزلزل
اوضاع دمشقی ایله قیلدیم متحوّل
تخت اوسته یزید اولدی هراسان آنام اوغلی
طعنیله یزید ایستدی ویرسون بیزه یاره
ایتّدیم آناسی هند جگر خواره اشاره
بیلدی سفرا کیمدی نسبده یوزی قاره
بد نام آناسین ایلدیم اعلان آنام اوغلی
چون عاجز اولوب منطقه حیوان صفت انسان
سجّاده باخوب صادر ایدوب قتلینه فرمان
یالوارمادیم عجزیله جری اولسون او نادان
ویردیم بو سنق لشکره فرمان آنام اوغلی
دوردی قره معجر قوشونوم بیردن ایاقه
آغلاشدی هامی ضجّه چکن عورت اوشاقه
شرمنده اولوب فوری باشین سالدی اشاقه
بیلدیم کی اولوب دیلده پشیمان آنام اوغلی
شرم ایله دیدیم ای خلف هند جگر خوار
دورموش قاباقوندا باش آچوق عترت اطهار
بو مجلسه گلسه نه دیر احمد مختار
فکر ایتدیم اولوب حالی پریشان آنام اوغلی
بیزدن چکوب ال طشت زره سالدی نظاره
گوتّدی بیر آغاج لبلروه ایتدی اشاره
پیغمبر اوپن لبلروی ایلدی پاره
گوردیم کی قزل طشته آخور قان آنام اوغلی
ویردی یارا بیر لبلره فرزند اُمیّه
جدّیم اوپوب هر دم اونی سسلردی بُنیّه
قان طشته آخاندا ئوزین ئولدوردی رقیّه
مندن تز او قیز سسلدی جان جان آنام اوغلی
آغوشیمه چکدیم تز او رنجور فراقی
غیرتّدن اسور گوردوم او طفلون ال ایاقی
ایستوردی دانشسون سوزه گلموردی دوداقی
قالموشدی کسوک باشوه حیران آنام اوغلی
قانلی باشا باخدیقجا یوزه اشکین الردی
جانیم سنه قربان بابا سویلردی ملردی
بلمزدی قولاق یاره سینی هی تزه لردی
گور اوندا نه چکدیم سنه قربان آنام اوغلی
نوح عمری ایدم گر اَلَرم عارضه قانیاش
اولدی او یتیمه گجه گوندوز منه یولداش
شیرین دیلی بیر قوّتدی قلبیمه قارداش
ویرانه ده جان ویردی او جیران آنام اوغلی
چوخ مشکله دوشموشدی خواتین الهی
هیچ بیر بالامون اولمادی تأمین رفاهی
نیلر گوروم اعدایه یتیم قزلارون آهی
جان ویردیله چوخلاری آجیندان آنام اوغلی
شامون نقدر واردی فرومایه نفوسی
بیر شامی کنیز ایستدی محنتلی عروسی
اولسیدی قزون فاطمه نون اوردا عموسی
تهمت ویران اولمازدی کماکان آنام اوغلی
چوخ نیش زبان ویردیلا اولاد رسوله
هر طعنه لی سوز قویدی اثر قلب ملوله
حرمت قویان اولمادی صبایای بتوله
اولسون اولارون خانه سی ویران آنام اوغلی
سالموشدی یزید اوز حرمین حصن حجابه
پوشش یوخیدی منظر اعداده ربابه
چاتموشدی او هنگامه ده تکلیف ترابه
مستوریدی توپراقله نسوان آنام اوغلی
ظلمت گجه نون وار بلورم صبح امیدی
رسوای جهان ایلموشم نسل یزیدی
قالماز بلوط آلتیندا آیون نور سفیدی
بو شرحی "صفا" ایلسه عنوان آنام اوغلی
- دوشنبه
- 4
- مرداد
- 1400
- ساعت
- 21:47
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه