اى بقيع اى غملى قبرستان سلام اولسون سنه
اى بقيع اى مدفن خوبان سلام اولسون سنه
اى نبىّ اكرمه آرامش جان فاطمه
اى پيمبردن سورا دائم پريشان فاطمه
قول يارا يوز نيلى قلبى غصّه دن قان فاطمه
اى سحاب رحمت سبحان سلام اولسون سنه
اى امام جعفر صادق امام بردبار
پور زهرا موسی کاظمدن عالی یادگار
زهریله مسموم اولوب زهرایه اولدون همجوار
پاسدار مکتب قرآن سلام اولسون سنه
ای علی بن حسین ای شهریار ملک دین
کربلا بیماری سن عبّاده زین العابدین
قبرون اوسته آغلیور بیر عدّه زوّارون حزین
سنده بیزدن حامی اول هر آن سلام اولسون سنه
ای امام باقر ای مفتاح ابواب علوم
بیلمدوک اولدی ندن خائن سنه عمّال شوم
لشکر جهل ایلیوب کنز خفیّاته هجوم
ای اولونجه حقّه پشتیبان سلام اولسون سنه
ای امام مجتبی' وی منبع جود و سخا
کشته ی دست جفاسن روحوه روحیم فدا
جعده بیر ظلم ایلدی غرق عزا اولدی سما
زینبی آغلار قویوب دوران سلام اولسون سنه
داد او ساعتدن توکولدی طشته اکبادون عیان
آل هاشم باشون اوسته باشلادی داد و فغان
قاسمی آغوشه چکدی زینب اولدی نوحه خوان
هی دیدون عمّون سنه قربان سلام اولسون سنه
گلدی بیر بیر جمع اولوب قارداشلارون اطرافوه
اوخشادی زینب اولار آغلاشدی قلب صافوه
گوردیلر عارف دگولمیش همسرون الطافوه
لبلرون قانلیدی ویردون جان سلام اولسون سنه
جعده نین ظلمین فلکده ایلیور تعقیب آقا
قسمت اولدی قبروه گلدیم عزادار اولماقا
بقعه سیز قبرون گورنده تز دوشندیم تپراقا
اود دوتوپ یاندیم من نالان سلام اولسون سنه
شیعه لر توزلی مزاره باخدیقیجا اشک الور
گوز گزور اطرافی امّا غم غم اوستوندن گلور
وای آقام سسلور هامی شدّتله آهو تک ملور
سینه لر اودلی اورکلر قان سلام اولسون سنه
کلب بیر حیواندی بیر لقمه اگر ایتسون عطا
بیر عطایه ذوق ایدر بیر عمر گورستسون وفا
بی وفا عورت اولاندا گور نجه ایلور خطا
سنکی ایلردون مدام احسان سلام اولسون سنه
ایتمسیدی انجم بختون مداریندن افول
اوز الونله قاسمی میدانه ایلردون نزول
اوغلوون نعشین قاتاندا تپراقا سُمّ خیول
او آقا سسلردی سن جان جان سلام اولسون سنه
کربلاده قاسمون نعشی دوشن ساعت یره
پیکری آتلار ایاقینده قاریشدی بیر بیره
نسگل اولدی شاه دینه گور نجه بو خاطره
سسلدی گت اکبره مهمان سلام اولسون سنه
جانمیز اولسون فدا شهزاده قاسم جانینه
چون اودا قانین قاتیب میداندا اکبر قانینه
وار یری چنک توسّل گر ویراخ دامانینه
ای آلان خوش رتبه ی شایان سلام اولسون سنه
هاردا بیر طوی غملی اولسا اوردا قاسم یاد اولار
نقل محفل شیعیانه قاسم داماد اولار
گوز توکر یاش دیل یانار نسگل مبارکباد اولار
طوی حناسی قان اولان قربان سلام اولسون سنه
شکر اولا آللّهمه قسمت اولوب بیت عتیق
همسفردی من "صفا" ئیله نچه خالص رفیق
ناصر و منصور یوسف پور آذر اوچ صدیق
دوردمیزدن ده مه تابان سلام اولسون سنه
- دوشنبه
- 4
- مرداد
- 1400
- ساعت
- 21:53
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه