ایلیور نوا کلّ ما سوا
وا محمّدا وا محمّدا
خیره النساء سسلیور بابا
وا محمّدا وا محمّدا
عرش طاقینه چکدیلر قرا
باشلیوب عزا اهل نُه سما
گوگده انبیا یرده اولیا
اولدی همصدا ئولدی مصطفا
نوح ناخدا سسلیور الا
ویردی سین و یا دینه جان فدا
اولدی غم فزا عالم فنا
وا محمّدا وا محمّدا
کعبه آغلیور حق حبیبینه
سینه داغلیور ئوز غریبینه
وای دیور صفا بی نصیبینه
مروه یاس دوتوب عندلیبینه
غملی دور حَرا دین خطیبینه
تکیه ایلیوب دیل شکیبینه
دوشدی عالمه شور من بکا
وا محمّدا وا محمّدا
یرلر آغلیور گوگلر آغلیور
لوح و کرسی و دفتر آغلیور
گون کسوف ایدوب اختر آغلیور
دیل نوا ایدور دلبر آغلیور
وا نبی دیور حیدر آغلیور
فاطمه آچوب معجر آغلیور
وای دیور بابا ای غم آشنا
وا محمّدا وا محمّدا
عالم آغلیور آدم آغلیور
مشعر و مَنا زمزم آغلیور
حوریلر دوتوب ماتم آغلیور
انس و جنّ لر با هم آغلیور
هاجر اوخشیور مریم آغلیور
کیم اولوب انیس غم آغلیور
کُلّ مایشا ایلیور نوا
وا محمّدا وا محمّدا
شیعه نونده وار حقی آغلاسون
غمگسار اولوب سینه داغلاسون
قاره پوش اولوب قاره باغلاسون
مصطفی عزاسین سوراخلاسون
غم دیزین ایوینده قوجاقلاسون
اشک غم عذارینه باغلاسون
یاسلی دور بو گون روح انبیا
وا محمّدا وا محمّدا
- سه شنبه
- 5
- مرداد
- 1400
- ساعت
- 10:55
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه