اوغلون حسنم آی ننه غملر منیم اولدی
بیر باد سموم اسدی خزان گلشنیم اولدی
من جعدیه آللّه نه یامانلیق ایلمشدیم
منلن یاشیب جانیمه آخر غنیم اولدی
چوخ عالی مثلدور اونی سچدیم سوز ایچیندن
دوز سوزدی ییریمیش آغاجی قورد ئوز ایچیندن
ویردی منه بیر اود جگریم یاندی عیالیم
چک ساحل امنه منی زهرا کوز ایچیندن
مشغولیدیم آسایشه راحت ئوز ایویمده
واردور نه بیلیم دست خیانت ئوز ایویمده
ظاهرده بیر عورت کی منیم همدمیمیدی
اولدوردی منی ایتّدی جنایت ئوز ایویمده
شیرین یوخیدان دوردوم ایاقه گیجه یاری
گوردوم قوریان لبلریم اولموش سو خماری
بیر کوزه سو کی جانیمه پیک اجلیمیش
ایچجک منی دوندردیله تز قبلیه ساری
حسرت قالا دنیا سویونا جعده الهی
قویماز چاتا کامینه اونی قاسمون آهی
آغلار بالامی قویدی او ملعونه جهاندا
هیچ بیر دیمدی وار بو امامون نه گناهی
بو غصّه ده قارداشلاریمون قدّی بوکولدی
بیر داغ گینه زینب بی یاره چکیلدی
اکبادیمی یاندیردی آنا زهر هلاهل
گلدی جگریم آغزیما طشت ایچره توکولدی
دور گل باجی زینب اورگون قانه دولانسون
گی قاروی یاندی جگریم جعدنی یانسون
بیدار ایله قاسمده عزا رختی گینسون
ایوای بابا وای ناله سی افلاکه دایانسون
دنیا بویی اولسمده اورکده غمیم اولدی
قاتل ئوز ایویمده منیم ئوز محرمیم اولدی
گوردی منی زهرا نه نه م اولدوردیله مظلوم
یر ویردی جوارینده بقیع مدفنیم اولدی
واجبدی غمین شیعه هر ایل ایلیه تازه
ایراندا اوجالد نالوی قوی گتسون حجازه
مظلوم آقامون حالینه قان آغلا اوتانما
تابوتیده اوخلاندی مگر هانسی جنازه
- سه شنبه
- 5
- مرداد
- 1400
- ساعت
- 10:57
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه