توك يوزوه شوقيله اشك ترى
تاپدى شهادت حسن عسکرى
مهدى موعوده اولا تسليت
داير ائدك بزم غم و تعزيت
شركت ائدر اوغليدا با معرفت
واى بابا وايدور ديلينون ازبرى
وار خبر مستدل و مستند
زهريله مسموم ائليوب معتمد
بى كس امامى او خطاپو ولد
سالدى قوادن شه نام آورى
صاحب عصر ايليور اشكين روان
سامره ده سسليور اى شيعيان
معتمد ئولدوردى بابامى جوان
قويمادى رشد ايليه دين سرورى
گورمدى عمرينده فراغت آقا
سنّى اوتوز اولماميش ابن الرّضا
عالمى ترك ايلدى صبح عزا
يازدهمين برج ولا اخترى
آلتى ايل ارشاد ائليوب امّتى
حيف نزول ايلدى تئز دولتى
ايچدى جوانليقدا ئولوم شربتى
قبره گئديب قبله نما پيكرى
بير نفر اولمادى ديه دشمنه
نيليوب آخر بو امامون سنه
گتدون عيالين بالاسين شيونه
سيندى هماى شرفون شهپرى
عمرينون آخر لحظاتينده سو
سوز جگردن ائليوب جستجو
گتديله سو سيّد فرزانه خو
آلدى ايچه تا سونه دل آذرى
سو سؤزى آلدى اورگيمدن توان
سالدى حسينى ياديما بى امان
ايستدى سو وئرمديلر كوفيان
تشنه ويريب جان شهدا رهبرى
دشمن بى رحمده باخ كينيه
قويدى اياقين يارالى سينيه
دوشدى نفس تنگه همان ثانيه
فاطمه نون مهجه ى جان پرورى
آچدى گوزين شاه شهيدان او دم
سسلدى اى حضرت صاحب كرم
راضى اگر اولسون حسيندن نه غم
قان ندى شمشير اولا جان بسترى
يتميش ايكى يار فداكاريمه
خيمه ده آغلار قالان انصاريمه
رحم ائله محشرده عزاداريمه
آتش سوزانيدن اولسون برى
هر نه بلا گلسه رضايم خدا
يانميا احبابيمى قويما اوتا
يازديريب آدين بيزه نوكر "صفا"
عفو ائله يا رب منه بو نوكرى
نازلى رقيّه م دوشه چولدن چوله
خردا اوشاقلاريم آجيندان ئوله
هر نه حبيبيم منه بولگى بوله
شكوه يوخوم يانماسا عاشقلرى
كئچديم الهى هامى اطفالدن
اكبر شهزاده سيه خالدن
اصغر شش ماهه خوش اقبالدن
سنده گئچ عشّاق شه محشرى
- سه شنبه
- 5
- مرداد
- 1400
- ساعت
- 11:4
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه