زینبم جان اوسته قارداش گوزلریم یار آختارور
گَل حسین داده باجون غربتده غمخوار آختارور
شامه من تبعید اولاندان مونسیم گوزیاشیدی
الده قانلی کوینکون مهجور غم یولداشیدی
محفظ اول پیراهنه دائم اورگیم باشیدی
عطروی روحیم قمیصوندن پدیدار آختارور
آچمیشام گوز بو جهانه گوز آچان ساعت سنه
ایلیوب روحیم قسم اوز جانوه عادت سنه
احتیاجیم وار حسین بو آخرین ساعت سنه
گل ملاقاتیمه گوگلوم فیض دیدار آختارور
غربت اولکه من مریضه بی کس و بی اقربا
نه گونوز وار همدمیم نه شام وقتی آشنا
نه پرستاریم نه بیر کس حالیمه واردور یانا
دردینه درمان سنی جمله گرفتار آختارور
زندگیدن نا امیدم جاندن دای دویموشام
نهضت خونینوه منده حسین جان قویموشام
عافیت رختین تن درد آشنادن سویموشام
ایندی مقراض اَجَل بو دیده خونبار آختارور
اولدی بو وسعتده دنیا زینبه آهن قفس
اللی ئیلدی سینه دن خارج اولار مشکل نفس
یدّی قارداش باجیسیدیم قالمیشام بی دادرس
باجیلار مشکلده اخوان فداکار آختارور
جان دوداقیمده گوزوم یولدا ئوزوم ائلدن اوزاق
پیکریم خسته سینم داغلی یریم غملی اطاق
گوزلریم قان زلفیم آشفته گرفتار فراق
چاره هر بیچاره دن بو چاره ناچار آختارور
گوزلریمدن اشک غم اولدوقجا روز و شب روان
سسلرم عبّاس آی غیرتلی قارداش هارداسان
سسلدیم از بس سیزی امداده قلبیم اولدی قان
گل طبیبیم گل سنی بسترده بیمار آختارور
گرچی نعمتدی منه رحلت ولی دل واپسم
علّتی واضحدی چون بو شهرده من بی کسم
نیلرم من جان وئرن ساعت حسینی گورمسم
جان وئرنده چون هامی بیر ماه رخسار آختارور
ای صبا کرب و بلایه ایله راهی آهیمی
با خبر قیل حال زاریمدن کمکسیز شاهیمی
دفنیمه گلسون اوجالتسون دشمن ایچره جاهیمی
مزد اشعارین « صفاده » فیض سرشار آختارور
- سه شنبه
- 5
- مرداد
- 1400
- ساعت
- 14:22
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه