کوی عشّاقه گزور یول تاپا پنهانی گوزوم
آختارور طُرفه رخ جلوۀ جانانی گوزوم
شوق دیداری سالور جانمی شور و شعفه
قاب قوسینه چکور طایر ایقانی گوزوم
بیت اکرمدی بو مطموره نه بیت الحزنیم
قصر فردوس گورر گوشۀ زندانی گوزوم
حبس هارونده وار لطف خدای ازلی
کشف ایدیب منظرۀ روضۀ رضوانی گوزوم
حبّذا نفس نفیس علوی زاده لره
بیر پشیزی گوره زینهار بو دنیانی گوزوم
موسی کاظمی ایستوردی عدو خوار ایلسون
تاپدی بو مخمصه دن سینۀ سینانی گوزوم
خط ریحانمی بو حادثه تدمیره چکوب
حظّ وصله آپارور قلزم حرمانی گوزوم
جنت تجری من تحت الانهاره گرک
شاهد اولسون بو تن عاریه سلطانی گوزوم
کلک تقدیروه تسلیم و رضایم به قضا
نار نمروده ویرر منظر ریحانی گوزوم
بیر سیه چال کی اوردا منه مسکن ویریلوب
اون بیر ایل گورمیوب اوردان مه تابانی گوزوم
گرچه اوز عترتیمی گورمگه قلبیم تلسور
حق رضاسیله خوشام گورمسه نسوانی گوزوم
سسلنر سلسله جسمیمده دیور یا قدّوس
دولدورار قانه دونن اشکلیله دامانی گوزوم
بخت یار اولسا آدامسیزلاریما باش چکرم
نیلرم گورمسه اول جمع پریشانی گوزوم
گونده مین دفعه ویرور قلبیمه هجران اودی اوت
سوندورر اشکیله بو شعلۀ سوزانی گوزوم
ایندی معصومه دیور گلمدی بیچاره بابام
گورمیوبدی اونی بیر مدّت طولانی گوزوم
گه رضانون آدینی یاده سالوب اودلانورام
کاش بیرده گوره سلطان غریبانی گوزوم
همنوادور منلن کنده و زنجیر ستم
سیر ایدور حکمتله مکتب قرآنی گوزوم
گل مسیب ئولورم دردیمه بیر چاره ایله
آختارور گیزلین اولان دردینه درمانی گوزوم
شکّی یوخدور بشرون جسمی رطوبتده ارور
یوخ امیدیم گوره بوندان سورا بطحانی گوزوم
جرئت ایتمور گله بیر کس بو غریبون یانینا
فرش ایده مقدمینه لشگر مژگانی گوزوم
گر ملاقاتیمه صدّیقه آنام گلسه گورر
پیشواز ایلیه جک اشکیله مهمانی گوزوم
سند نامرده دین یوخ ندور آیا گنهیم
حیف اولا گورمدی بیر مرد مسلمانی گوزوم
منی اهل حرمیمدن آیران وقته عدو
گوردی گویا ملشور بیر سوری جیرانی گوزوم
خبره انسان اولا گر خیره اولا گوزلزیمه
شرح ایدر ما وقع قصّۀ هجرانی گوزوم
چکلیب گوزلریمون نوری گمان ایلیورم
بیر شبه رؤیت ایدر حبسده انسانی گوزوم
زندگی دن منی محروم الیوب والی شوم
تیره و تار گورر عالم امکانی گوزوم
منی ای پیک اجل درک ایله قوی راحت اولوم
احتضار اوسته گزور مقدم طاهانی گوزوم
گه دوشور یادیمه زهرانون عزیز اوغلی حسین
قصد غربتله گزور قانلو بیابانی گوزوم
جان ویرر گوشۀ سردابده بیچاره بالون
قان دولان گوزلروون کاش اولا قربانی گوزوم
اختر هفتم برج علوی ایلده « صفا »
نوحه یازدیقجا گزور سفرۀ احسانی گوزوم
- سه شنبه
- 5
- مرداد
- 1400
- ساعت
- 14:24
- نوشته شده توسط
- یوسف اکبری
- شاعر:
-
حاج ناصر تبسمی اردبیلی
ارسال دیدگاه