من حسینون اوغلیم آدیم علیدور اکبرم
مرتضایه نور عینم مظهر پیغمبرم
جدیمیز شمس رسالتدی خدا محبوبیدور
من ولایت آسمانینده بیلون بیر اخترم
عبدُوَد تک پهلوانی ئولدوروب جدیم علی
گوردوز عیناً بکریلن دعوا ائدنده صفدرم
مرحبین قانین توکن دلبندیم آگاه اولون
پور حیدر کی او گون سویلردی شاه خیبرم
لٰافتیٰ الّا علی نازل اولوبدی شأنینه
لٰا شَبابْ الّا« علی اکبر» دیوبدی مادرم
ارث دور بیزده شجاعت بیزده دور جود و کرم
دینه خاطر صلح ائدن من مجتبای دیگرم
من حسین بن علینون تیغ زن فرزندیم
قابض الاَرواحوزم امر ایلسه گر سرورم
ایسته دوز یوز دوندره عباس امامیندن دونن
بسلیوب چون نان زهرادن بو اولدی باورم
شمری مایوس ایلدی جیردی امانین نامه سین
سیندراردی دیشلرین امر ایلسیدی رهبرم
فنّ دعوانی عموم عباسیدان اورگنمیشم
آل هاشم ماهیدور منده او ماهه نوکرم
خارجی آد قویموسوز سیز اهل بیت اطهره
دیلمی فرض ایلیسوز یا رومی تک کج محورم
دینینن اولدوز مقابل شرم ایدون ای کوفیان
کیم ویروب فتویٰ دیوبدور من بو دینه کافرم
دست بیعت ویرمیشم دینه حمایت ایلییم
گر اوخیله لانه زنبور اولا بو پیکرم
گلموسوز پیغمبریله سیز بوگون جنگ ایلیسوز
گوموسوز من خاتم پیغمبرانه بنزرم
امر قرآندور مسلمانه که دینون ساخلاسون
دینون احکامیندن اوتری ای شیاطین مضطرم
شیری سیز قورخوتمیون ای روبهان، شمشیریلن
فن شمشیرو سنان و خنجره من ازبرم
امرائدیدی گر امامیم جنگ ائدم اشراریلن
گورسدردوم قعر سُفلانی گورردوز آذرم
مین نفر اولسا مقابل یوخ هراسیم حربیدن
یوز مین اولسا لشکروز من تک اوزوم بیر لشکرم
کربلا دشتینده قان دریاسینی خلق ایلرم
عرصه هیجاده اللهیم بولور که محشرم
ایلرم زیر و زبر دعوایه اقدام ایلسم
نحس باشلاردان منیم لبریز اولار دور و برم
ری هواسی مست ائدوبدی سعدین اوغلون گورموسوز
تک قویون منلن او شیطانی گورون من نیلرم
آند اولا اللهه وورام بیر قلج اول کافره
صفحهٔ تاریخیدن نحس آدینی محو ایلرم
باغلادوز سو یوللارین سیز اهلبیت مضطره
گرچه مخیمده دوشوبدور پیچ و تابه اصغرم
ایچمز هرگز آب ذلت یر یوزین دولدورسا سو
سویلوری معناده من عطشانِ آب کوثرم
هانسی دینه معتقدسوز ای گروه کین شعار
ایلدیم اتمام حجت شاهد اولسون داورم
خیملردن آیرلاندان نیلدیم درک ائتمدوز
قوی قضاوت ایلسین سیز قومه تیغ اخگرم
بانی اولدی بو سوزه بیر حیدر آدلی نوحه خوان
هر سوز اولدوقجا دییر من بو جوانه نوکرم
«صادقی» عمرون بویی ال چکمه بو شهزاده دن
مال دنیادن گله ائتمه دئمه بی یاورم
افتخار ایله اولوبسان اهل بیتون مادحی
سویله زینت تاپدی شهزاده آدیلن دفترم
- چهارشنبه
- 6
- مرداد
- 1400
- ساعت
- 20:24
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه