حُرّبن ریاحی دور آدیم چوخدی گناهیم
سندن صورا بوچولده داخی یوخدی پناهیم
من سد ائلدیم عترتیوه راه فراتی
من لرزیه سالدیم هامی اطفال و بناتی
الله منه تیز گوندره اسباب مماتی
شرم ایلورم اطفاله دوشه بیرده نگاهیم
من فکر ائلمزدیم بئله عالم اولاجاقدی
بولمزدیم آقا بوردا سیزه غم اولاجاقدی
یا عترتیوه ناله و ماتم اولاجاقدی
چوخ ظلم ائدوب اولادیوه بو اهل سپاهیم
ای وای منه آغلاتمشام اول ختم مآبی
بو ظلمیله نقد ایلمیشم نار و عذابی
محشرده اگر قهراً اولا حقدن عتابی
جبران ائلمز گر اولا دریای میاهیم
من ایلمیشم یولدا سیزه قصد جسارت
بیر قطره سودان اوتری عجب اولدی اهانت
عفو ایله بو بیچارنی گر قویمادی حرمت
شرمنده دی سندن آقا بو روی سیاهیم
بو سوزده باخوب حرّه طرف شاه ولایت
قوخما دئدی یوخ ذره وجودینده عداوت
من عفو ایلدیم ،تاپدون عجب یرده سعادت
چوخ سویلمه غفلتده گئدوب سالیله ماهیم
آزدور کمگیم گر اولا سندن منه یاری
بیر آز آزالار زینبیمین ناله و زاری
چوخ چکمز اونون غارت اولار دار و نداری
آتلار ایاقیندا داغلار عزّت و جاهیم
چوخ غم یمه سن تاپسان اگر فیض شهادت
یا باشیوه خنجر یاراسی ائتسه اصابت
بیر تحفه واریمدور سنه ، اولماز اونا قیمت
هر کیمسه سوروشسا دئنه لطف ایلدی شاهیم
ویرمزدی قلم «صادقی» بو صفحیه رونق
معناده دمی حرّ وئروبدور سنه الحق
سن ایستیه سن گر اولاسان سوزده موفق
چوخ یالوار اِلٰهَه ده حسینی اولا راهیم
- پنج شنبه
- 7
- مرداد
- 1400
- ساعت
- 11:8
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه