نه کربلا کی حسین قانینه باتان یریدی
همان او یردی کی مقصودینه چاتان یریدی
نه کربلا کی علمدار اولوبدی سقاسی
همان او یردی کی عباسی اوخلانان یریدی
نه کربلا کی باتوب قانه شبه پیغمبر
همان اویردی کی میداندا دوغرانان یریدی
نه کربلا کی دوتوب طوی عموسی قاسمنه
همان او یردی کی قاندان حنا یاخان یریدی
نه کربلا کی علی اصغر ایچمدی سویونی
همان او یردی کی آلتی آیلیق اوخلانان یریدی
نه کربلا کی چیخوب تله زینب آغلاردی
همان اویردی کی قارداشینا باخان یریدی
نه کربلا کی فراتی آخاردی صحرایه
همان او یردی کی مشک اوسته اوخ آتان یریدی
نه کربلا کی قاچاردی رقیه سی چولینه
همان او یردی کی گوشواره سین سالان یریدی
نه کربلا کی یتوب عرشه صوت لیلاسی
همان او یردی که شهزاده سی یاتان یریدی
نه کربلا کی ربابون او یرده صود امری
همان او یردی کی عطشان قاناد چالان یریدی
نه کربلا کی گونون ایسسینده جبریلی
همان او یردی کی شاه اوسته پر آچان یریدی
نه کربلا کی عمر سعد و شمر و حرمله سی
همان او یردی کی ایمانینی ساتان یریدی
نه کربلا کی غمین جمع اولا اگر شعرا
همان او یردی کی سوز سفره سین آچان یریدی
نه کربلا کی قوتارماز بلاسی « صادقی » یاز
همان او یردی کی زینب ساچین یولان یریدی
- پنج شنبه
- 7
- مرداد
- 1400
- ساعت
- 12:10
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه