خامه تشبیه ایلدی صفحه نی بیر میدانه
مرغ طبعیم هیجانیله گلوب جولانه
پر آچوب اوج ائلدی بلبل خوشخوان کیمی
صبحدم سالدی ئوزین غصه لی بیر بستانه
نجه بستان کی ئولوب صاحبی گللر سارالوب
بیر گولی گوردی یانور اشکی آخور دامانه
او گلون گلدی کنارینده او دم اگلشدی
نه گوروب آز قالوری عمری یته پایانه
دیله گلدی ادبیله سوروشوب اول گلدن
موسم وصلیده سویله نه گلوب باغبانه
باغبان ئولسه بو مرسومیدی گللر سارالار
نه گلر بلبل او باغه نه گلر پروانه
سوز بورا چاتدی گوروب گل اله دی گوز یاشین
بئله دیل آچدی او دم بلبل خوش الحانه
کربلاده پوزولوبدور بو باغین شاخه لری
یاز دیوم باغیمیزی دوشدی نجه طوفانه
باغبان باغ رسالتده حسینیدی ئولن
کشتی دینیده بنزردی او کشتیبانه
نوحیمی دعوت ائدوبلر او شقی کوفه لیلر
چوخ عجب لطف ائلیوبلر بیله بیر مهمانه
یتیشن وقتیده اوًل سو یولون باغلادیلار
سالدیلار گللریمی خارجی تک زندانه
ظلمیلن نچًه گون اولدوخ او چولون مهمانی
قسم اللًهه او جدًیم گتورن قرآنه
بیر به بیر دوغرادیلار گللریمین شاخه لرین
نه گله رحم ائلیوبلر نه او دم باغبانه
باغبان ئولدی بو گللر پوزولوب آغلادیلار
دستگیر اولدولار اول لشکر بی ایمانه
دئمورم یولدا نه گلدی باشیما سوز چوخدی
ظلمیله کوفه و شام ایچره چکوب هریانه
گه شمادت ائلیوب باشیمیزه توکدولر اود
کی بو ظلمی ائلمز هیچ کسه بیر بیگانه
گتوروب شامیده ظلمیله اسیر ایلدیلر
گللره مسکن اولوب قورخلی بیر ویرانه
بیرگجه گلدی قوناق باغیمیزین باغبانی
باشینی گوردی گوزون آچمادی بیر دردانه
سسلدیم گل بالا یات سینمون اوسته یارالی
پر آچوب گوردوم او دم روحی گئدوب رضوانه
گلدی غساله او دم غسل وئره بو گلومه
تاپمادیم بیر کفن اولسون او تن بی جانه
اوزوم اوز اللریمیلن گلومی دفن ائلدیم
آغلارام یاده دوشنده او گل نالانه
« صادقی » طبعون عجب بیر گولونن سوز آچدی
که دانشدوقجا یانار هم تانیش هم بیگانه
- پنج شنبه
- 7
- مرداد
- 1400
- ساعت
- 12:34
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه