ای شیعه نون آقاسی عجب چوخدی طاقتون
آخر چاتار باشا نه زمان وقت غیبتون
مین دوت یوز ایلدی شیعه چکور انتظاریوی
لطفا گل ایله عالمه جاری عدالتون
عجل دینده شیعه بیر آمین دئسن اگر
امکانی یوخ یتورمیه حق استجابتون
نذر ایلیرم اگر بو آز عمروم قوتولماسا
بیر لحظه گلسن اولسا نصیبیم حمایتون
گلم دالونجا صبح و مسا یابن فاطمه
تا حشریده بو کلبه یتیشسون شفاعتون
لطفا عنایت ایله قلم ایستوری یازا
دفترده ای حبیب خدا شان و شوکتون
سن وارث خداسن ایا صاحب الزمان
یازمیش کتاب حقیده قائم عبارتون
ای افتخار نه فلک و جمله عرشیان
وار مصطفایه شکر اولا مولا قرابتون
ای مرتضایه گوزلری بنذر امیر عشق
گوندن عیاندی عالمه نور امامتون
ای یادگار حضرت زهرا هایانداسان
گلمیش زمانی عالمه گوستر صلابتون
ای مجتبای دیگر آل عبا آقا
گل وئر جهانه صلح و صفانین بشارتون
ای شاه کربلا کیمی ظلمه باش اگمین
مین لشکر پلیده مقابلدی صولتون
ای زینت زمین و زمان ای سفیر عشق
ای فخر ساجدین تک اولوبدور عبادتون
سن باقرالعلوم بو دین سن بو عصریده
بسدور قیام حشره تک علم و دیانتون
ای صادق زمانه گل ای حجت خدا
یایدیر جهانه سن آقا شیعه شریعتون
موسی ابن جعفرین بالاسی ای اسیر عشق
یاندیردی قلب شیعه نی غیبت اسارتون
جدون رضا کیمی سن آقا چوخ رئوف سن
درک ائتمیوبدیلر هله چوخلار ولایتون
ای وارث جواد الائمه آتان کیمی
مشهوریدور زمانه ده جود و کرامتون
ای هادی بشر یر اوزونده قیام ایله
بیت خداده اوج ائده صوت هدایتون
ای پادگان ظلمه آتاسی اسیر اولان
گرچه یازوبلار اوچ یوز اون اوچدی جماعتون
لطفا قیام ایله اله آل ذوالفقاریوی
آز لشکریله عالمه گوستر شجاعتون
« شیدا » چوخ ایستیوردی سنون وصفیوی یازا
اوز دفترینده گوستره عشق و محبتون
بیر سوز تاپانمیوب سنه تا گلدی ماه عشق
چوخ شرمگین اولوبدی زمان ولادتون
گوز یاشلی آلدی خامه اله ایلدی دعا
گوستردی حق بو نوعی بو کلبه عنایتون
یاز دفترونده یوسف زهرادی حجتیم
یوسف کیمین بونوندا چوخ ائتدیم ملاحتون
کیم ایستیور گوره نه گوزلدور امامینی
عجل دعاسینون السون چوخ قرائتون
بیرده اجل گلونجه هله اولما ناامید
اوز محضرینده ایسته بقیعنون زیارتون
باب کرمدی بوش یولا سالماز گداسینی
کیم خواهشینده آرتیرا گر استقامتون
- پنج شنبه
- 7
- مرداد
- 1400
- ساعت
- 21:34
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه