خلق ایلیوبدی اکبری پروردگار عشق
وئردی حسینه اکبر اولا یادگار عشق
گنجینه کمالی آچوب ذات کبریا
بیر گنجی گوردی خلق ایلیوب عین مصطفی
لایق گوروب او گنجی حسینه ائدوب عطا
شعبان آیندا ایلدی سرمایه دار عشق
حسن و جمالی گوردوله طاهایه بنذیری
صولتده مرتضا کیمی مولایه بنذیری
آهو باخیشدی گوزلری زهرایه بنذیری
لیلا ایوینده آچدی گل اولدی بهار عشق
اکبر اولوبدی باغ ولانون درآمدی
اولدی کمال و حسن وجمالون سرآمدی
هرکیم گوروب دئیردی بو نور محمدی
خلقتده جدی تک نه گوزلدور نگار عشق
تدریس ائدوب آتاسی بو شاگرده بیر زمان
جنگ و فنون رزمی عموسی ائدوب بیان
دوران دولاندی اکبر اولوب تازه بیر جوان
باغلاتدی کربلایه حسین کوله بار عشق
یوم بلا یتیشدی صحابه اولوب شهید
یالقوز قویوب امامی او گون لشکر پلید
اکبر گوروب آتاسی قالوب بیکس و وحید
رخصت آلوبدی رزمه اولوب رهسپار عشق
شمشیری الده غیظیله چون اژدر ژیان
گلدی دایاندی مرکز میداندا اول جوان
هر کیمسه گوردی جنگینه یوخ قدرت وتوان
این المفر دئینلر اولوبلار شکار عشق
لشکر بو شیری سید مختاره اوخشادوب
یا مرکب اوسته حیدر کراره اوخشادوب
بیر عده سی عموسی علمداره اوخشادوب
کیم باخدی گوردی جنگه چکور انتظار عشق
حاضر اولوبدی جنگینه بکر آدلی پهلوان
اولدی مقابل اکبره اول ابله زمان
سسلندی آچ گوزون بو نه غفلتدی ای جوان
گل بوردا ائتمه سن آناوی غصه دار عشق
میدان جنگدور نه دبستان ، رجوع ایله
گئت خیمه گاهه گون کیمی اوردا طلوع ایله
کیمسن مگر نه فن واریندور شروع ایله
گر سنده واردی جنگه بیر آز پشتکار عشق
اکبر آچوب او دمده یوزوندن نقابینی
گوستردی ظلمه چهره چون آفتابینی
تا بکره معرفی ایلیوب بوترابینی
معلوم اولوب او ناکسه ایل و تبار عشق
سسلندی بکره من نوه شاه خیبرم
آدیم علیدی پور حسین سبط اکبرم
سن باخ بصیرتیله شبیه پیمبرم
جدیمدی عالمینه اولوب تاجدار عشق
دیندن دفاعی قافله سالاریم اورگدوب
جنگ و فنون رزمی علمداریم اورگدوب
سن باشلا ، بو مرامی سپهداریم اورگدوب
دعواده کیمده واردی گوراخ ابتکار عشق
شمشیری غیظیلن چئخادوب بکر نابکار
بو فکریلن که شیری او روبه ائدر شکار
ایش دوندی بکری گوردولر اولدی غمین و زار
اکبر ائدوبدی ضربتینی چون مهار عشق
نوبت یتیشدی اکبره آلدی قلج اله
سالدی اودمده لشکر کفاره ولوله
سسلندی یاعلی گل اوزون سن مددایله
بکرین آیردی باشینی ائتدی نثار عشق
ئولدوردی بکری باطله حق تاپدی تا ظفر
بیر لحظه گوردی تشنه لیق ایلور اونا اثر
گلدی خیامه ، وئردی حسین زینبه خبر
لیلاینی سسله اولدی بالام انتصار عشق
اکبر قیتدی گلدی آتانون سراغینه
مرکبدن اندی دوشدی امامون ایاقینه
دوردی ایاقه قویدی دواقون دوداقینه
یعنی بابا عطش آلور الدن قرار عشق
«شیدا » حیا ایله سوزی چوخ ائتمه آشکار
قلب امام عصری ائدر غصه داغدار
الله بولور نه اولدی نه حاله قالوب اولار
هم اکبر اولدی هم آتاسی شرمسار عشق
- پنج شنبه
- 7
- مرداد
- 1400
- ساعت
- 21:35
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه