اذن میدان وئر عمو منده گئدوم اکبر کیمی
حقی اثبات ایلیوم تا شبه پیغمبر کیمی
وار آتامدان نامه الده قویمیام قوم پلید
حجت حقی مبادا ایلسون بیرگون وحید
امر ائدوب یا محضرونده قاسمی اولسون شهید
یا دولانسون باشیوه ای شمس دین اختر کیمی
خیمه لرده دوزمرم لیلا سالا باشه قرا
قاسمون اما آناسی ائتمیه داد و نوا
گل آنامی ایلمه مخیمده لیلادن جدا
قوی دئسون ایوای بالام وای لیلی مضطر کیمی
عجزیله درگاهیوه من گلمیشم چون مستمند
گرچه سن راضی دگورسن قاسمه یتسون گزند
خیمده وئردی آنام بیر پهلوانی دستبند
بوش یولا سالسان منی سوللام گل احمر کیمی
گرچه سنیم آزدی اما چون شجاعت بیزده دی
فن رزمه آگهم علم و درایت بیزده دی
اوز آتامدان ارثدور تا کی شهادت بیزده دی
قویمارام صدمه یتیشسون دینیمه صفدر کیمی
قاسمون سال بوینونا لطفا عمو بیر آق کفن
قلبیمی یاندیردی اکبر داغی ای شاه زمن
انتقامین قوی آلوم کفاریدن بو چولده من
حشری برپا ایلیوم خیبر شکن حیدر کیمی
گوردی یوخ چاره حسین امر ایلدی ای بی بدل
دیدگاهونده شهادت امری« کیف فی المثل»
تا دیوب شیرین دیلیله « عمی اهلا من عسل »
گل دوداقوندن ئوپوپ آچدی قولون شهپر کیمی
قاسمی آلدی قوجاقه سینه سین بیر داغلادی
میندیرنده مرکبه باخدی دویونجا آغلادی
آلدی بازوبندینی محکم قولوندا باغلادی
گئت دئدی اللهه تاپشوردوم سنی اکبر کیمی
رخصت آلدی تا عموسیندن او گون اول نوجوان
مرکز میدانیده گون تک اولوب نوری عیان
لشکر کوفه گوروب رزمه گلور شیر ژیان
مجتبایه بنذوری نطق ایلیر اول سرور کیمی
یاد ائدوب اول کلامینده او حی داوری
شاد ائدوب جنتده هم زهرانی هم پیغمبری
بیر شجاعت گوستروب شوقه گتوردی حیدری
مرکبین اوسته دایاندی مالک اشتر کیمی
ایلدی اول چولده قاسم آیری بیر غوغا بپا
کیم مقابل اولدی شهزاده ائدوب فورا دوتا
ارزقین اوغلانلاری تا اولدی لشکردن جدا
بیر به بیر روبه لری ئولدوردی شیر نر کیمی
ارزق شامی اولوب اول حالیده چوخ خشمگین
آلدی بیر نیزه اله بیر تیغ تیز سهمگین
سسلدی من ایلرم زهرا بالاسین شرمگین
ایلرم ایمدی خزان گلزارینی صرصر کیمی
مرکز میدانیدن اولدی او ملعون آشکار
بو خیالیلن که شیری ایلیر روبه شکار
بیر سیاست ایشلدوب تا ارزقه اول نامدار
خم اولوب ارزق بو شمشیرون چکوب آذر کیمی
ارزقی نصف ایلیوبدور تا هدف گلدی اله
لشکر کفاره قاسم سالدی آیری ولوله
ایله بیر دشت بلا ایچره اولوبدور زلزله
ایلدی اول عرصه نی دشمنلره محشر کیمی
ارزقی ئولدوردی اخیامه گلوب اول نوجوان
العطش دیلده دییردی ای عمو جان الامان
عاقبت بولمم نه اولدی ایلمه « شیدا » بیان
سولدوروبدور قاسمی عدوان گل پرپر کیمی
- جمعه
- 8
- مرداد
- 1400
- ساعت
- 10:41
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه