روضه پیغمبره زینب یتیشدی دلغمین
عرض قیلدی گوئیا یا رحمه للعالمین
آند اولا بو قبر پاکه گلمیشم جانه بابا
گور نه احواله سالوبدور اهل بیتی اهل کین
چوللره سالدی بیزی دشمن وطندن ایلدی
عاقبت اولدوخ اسیر لشکر شمر لعین
سوکنارینده بابا قارداشیمی ئولدوردولر
گوز قباقینده اونون سندردیلار بال و پرین
قاسم و عباس و جعفر بیر به بیردوغراندیلار
ارباً اربا ائتدیلر ایستی قوم اوسته اکبرین
قویدولار حسرت ربابی صود امر جیرانینه
ووردولار میداندا اوچ شعبه اوخیله اصغرین
پارچالانمش باشلارین نوک سنانه ووردولار
غارته ال آچدیلار یاندیردیلار مخیم لرین
زینبون قدی کمان اولدی او چولده غصه دن
عمروده اولماز گوره بو ظلمی بیر کیمسه یقین
احتیاجی یوخ دییم گوردون اوزون نه حالیله
عترتون قول باغلی گئتدی شامه ای سلطان دین
بیر یهودی کوچه سینده باشلارا اود توکدولر
عرشه اوج ائتدی نوای عترت حبل المتین
داش آتان کیم اود توکن کیم ال چالان کیم ، بیزلری
چکدیلر بیر مجلسه شربه اولا مثلی چتین
پای تختینده بابا ، قارداشیمون گَتدی یزید
خیزرانیله اشاره ائتدی راس انورین
ووردی ظلمیله دوباره پارچالاندی لبلری
قیزلاری آز قالدی ئولدورسون او یرده اوزلرین
گرچه گلدیم جانه اما تشنه لب قارداشیمون
اول یزید بیحیادن آلدیم آخر کوینگین
دویموشام من آند اولا زهرایه عمرومدن بابا
گل دعا ایله آلا بو جانیمی جان آفرین
گر چه سوز چوخدی ادامه وئرمه « شیدا » مطلبه
یاندی دفتر چکدی بس که خامه آه آتشین
- جمعه
- 8
- مرداد
- 1400
- ساعت
- 11:41
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه