من ربابم سالارام یاده علی اصغریمی
توکرم صفحه رخساره بو اشک تریمی
طاقتیم یوخدی داخی غم گتوروب جانه منی
گئجه گوندوز ائلیوب ئولماقی دیوانه منی
نیلمشدیم بو فلک ، قویدی یانا یانه منی
ائتدی آغلار بالاما حشره کیمی گوزلریمی
من دییردیم نئچه مدت صورا اصغر دیل آچار
گل دریب خردا الیلن سینمون اوسته ساچار
نه زمان بیرده دییردیم آنا آردینجا قاچار
منی سسلر دییرم جان ، آچارام اللریمی
چون یوخیدی دیلی دردون دییَه مه پاره بالام
ال ایاق چالدی فقط آغلادی بیچاره بالام
باغلادیم اللرینی یاندی عجب ناره بالام
دیدیم ایوای بالا ، محزون ایلدیم ائللریمی
حرمله چکدی آرامیزدا بیزیم خط فراق
سندروب بال و پرین اصغریمین غنچه سیاق
اوخلادی جنّته پیغمبره گوندردی قوناق
قویدی حسرت او گُله خیمده بلبلریمی
من او گوندن یانارام ایوای اوغوای دییرم
سوسوز احوالینه یاننام بالاما وای دییرم
اوتوروب گون قاباقیندا اونا لایلای دییرم
بلکه آرام ایلیم بو دل غم پروریمی
من کیمی « صادقی » داد ایلیوری صبح و مسا
دییور ای کاش اولا جانیم او سوسوز جانه فدا
گرچه وار جرمی خدایا سن اوزون ایله عطا
اصغرین خاطرینه عفو ائله بو نوکریمی
- جمعه
- 8
- مرداد
- 1400
- ساعت
- 11:48
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه