ئوزوم گوردوم گلستانیم صولاندا
ئوزدم گوردوم حسین قانه باتاندا
ئوزوم گوردوم عدونین خنجر الده
ئوزوم گوردوم حسین آتدان دوشنده
ئوزوم گوردوم نوای حق اوجالدی
ئوزوم گوردوم قیزیم زینب قوجالدی
ئوروم گوردوم خزان یللر اسیلدی
ئوزوم گوردوم باشی دالدان کسیلدی
ئوزوم گوردوم اورک قانی سوزولدی
ئوزوم گوردوم حسین باشی اوزولدی
ئوزوم گوردوم کسیلدی ال بیلکدن
ئوزوم گوردم توخاندی اوخ اورکدن
ئوزوم گوردوم ملکلر باش آچوبلار
ئوزوم گوردوم نقدر اوخ،داش آتوبلار
چوخور یر دولدی از بس داش دوشوبدی
یوز اوسته زینبیم قارداش دوشوبدی
قلم یاندی ز بس یاندیردی سوزلر
اورک دولدی محندن دولدی گوزلر
چاتوب زینب گلوبدی ال باشیندان
باخور گورمور اثر یوخ قارداشیندان
دیدی عطرین گلور بس هارداسان سن
هما تک اوچمش هانسی باغداسان سن
قرض صراف عشق اول قاشی تاپدی
چوخور یءرده باجی قارداشی تاپدی
ءوزون سالدی داغیلمیش سینه اوسته
دیدی من خسته قارداش سنده خسته
بیلیم سیندی حسین آهیم اوجالدی
گوزون آچ زینبون گور نه قوجالدی
نه باشون وار نه ده بوسه یءرون وار
سینه نون اوسته دوزلومش نیزه اوخلار
ن باشون وار دوداقیندن ءوپوم من
اقلی گوی ایاقیندن ءوپوم من
پوزولموش گلشنه احوالی بنظر
منای عشقه بو گودالی بنظر
اولا افسوس گل عشقیم صولوبدی
قفادن باشی الله ذبح اولوبدی
دیدی قارداش سنن یا سهو ایدورم
منه دیندیر باشون اوسته ءولورم
ندن چرخ و فلک دویمور جفادن
ندن شمر باشیوی کسدی قفادن
"خدایی" باشه وئر اربابه آغلا
محرم گلدی باشه قاره باغلا
- دوشنبه
- 11
- مرداد
- 1400
- ساعت
- 17:29
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه