قونداقی عرشه ناز ائدن فاطمه نون بالاسیدی
آدی حسیندی عاشقان شاهیلرون آقاسیدی
کیمدی حسین که عالمی لرزیه سالدی صولتی
کیمدی حسین جهانیده داغ کیمی وار صلابتی
کیمدی حسین که بوقدر واردی اونون جلالتی
پور علیدی بو آقا قلبیلرون صفاسیدی
کیمدی حسین که آفتاب نازینی گویلره چکر
کیمدی حسین که عاشقان وصفینی دیلره چکر
اللها خاطر هر نه یی عشقیله چولره چکر
جانینه من فدا اولوم دردیلرین دواسیدی
عالم ذرده عشقیله امضا وئروب خداسینه
صبر ائلرم دئدی آقا کرب و بلا بلاسینه
دینیمی قویمارام چاتا واللهی انتهاسینه
بو سوزومون بیانه سی ،باخ هله گور هاراسیدی
بو گل عشق جنتون کیمسه بو یولدا درمیوب
سویلدی بو جهادیمه کیمسه کمک که گلمیوب
سویلدی یاحسین او دم غم یمه زینب ئولمیوب
من سنه یاورم اخا جان گوزوون فداسیدی
وقت ائله وقتیدی آقام یاوری یوخدی عرصه ده
یالقیزیدی حسین ولی قاتلی چوخدی عرصه ده
تکبیرینون جوابی حیف داش یا که اوخدی عرصه ده
خیمه دن عرشه قوزانان مظلوم حسین صداسیدی
سوز عطشدن آسمان نیتی وار یاغیش یاغا
آلندینی داش ائدوب یارا، قانی سوزوردی توپراقا
کیمسه یوخیدی تا دئیه گوزله ئوزوندن ای آقا
اف اولا اهل کوفیه سکه و زر گداسیدی
گون هئچ اوتانمیور باتا بلکه سرینلسین هوا
باجیسی تلیدن دئیور گوزله ئوزوندن ای اخا
زینب ئولیدی آلندیوی کوفه لیلر ائدوب یارا
خسته قوناقه احترام میزبانین جفاسیدی
دامنی قوزادی حسین پاک ائده گوزدن القانی
قویدی کمانه حرمله فوری سه شعبه پیکانی
تیتردی اللری ولی دوتدی نشانه مهمانی
اوخ ائله بیل او سرورین الده قالان دواسیدی
اوخ که آتیلدی غیضیله،اوخ ئوزی وا حسین دئدی
پارچالیوبدی قلبینی اهل سما حسین دئدی
گوزلرینه الین قویوب فاطمه یا حسین دئدی
وای بالا وای سسی گئلن فاطمه نون صداسیدی
دوشدی یئر اوستونه حسین جرئتی تاپدی اهل شر
کور ائلیوبدی گوزلرین وعده ی پول و سیم و زر
گوزلور آقام که تلیدن قتلگه باجی گلر
باجینون اوخشاماقلاری گوزلرینون ضیاسیدی
قتلگه دوشوب حسین وئردی ندن گلوب گئدن
یوخدی نه سو وئرن اونا، یوخدی بیری کمک ائدن
سینه سی یاره دی خدا رحم ائلمور عدو ندن؟؟؟
تا دیلر که ال چکون فاطمه نون بالاسیدی
سینه آغیراشیب گوروب قاتلی چکدی خنجری
ایستوری باش کسه اسور خوف بو ایشدن الری
کسدی باشی او بی حیا درده سالوب پیمبری
علت بو آغیر ایشین باشداکی رهی هواسیدی
اهل جنان باشا وئرور قلبی جهانی هداغلیور
خیمه ده خردا طفلیلر بیر بیرینی قوجاغلیور
اهل حرم نوا ائدور ، اما باجیسی آغلیور
چاره سیدی یوخدی نینسین قارداشینون عزاسیدی
باشسیز اولان جنازه نی اوخشادی لشگر آغلادی
اوخ یاراسی سیزلادی سینه ده شش پر آغلادی
باجیسینون صداسینه یاره لی مادر آغلادی
قارداشینون آخان قاتی ساچلارینون حناسیدی
سویلوری زینب ای سالان دردیلره منی حسین
پوزدولار اهل کین ندن غنچه و گلشنی حسین
آلدیلار آخر اهل کین مندن عجب سنی حسین
قلبیمی داغلیان حسین پیکریوین یاراسیدی
- سه شنبه
- ۱۲
- مرداد
- ۱۴۰۰
- ساعت
- ۱۳:۳۳
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه