باغلانوبدی سو یولی عترت پیغمبره
خیمه ده سو صخبتی اتش سالوبدی دیلره
بیر طرفده نهر اخور بیریاندا اصغر تشنه دی
خردا قیزلار الده جام لای لای دیولر اصغره
مهر زهرادی بو سو بیگانه لر غصب ایلیوب
قویمویور سو یول سالا باغدا سارالمیش گلره
سو اگر گل ایچسمه رنگ سولار باشین ایر
صحبته دیل آچماز هیج ، ناز ایلیر بلبلره
رسمیدی خردا اوشاقه صود وءرلر رام اولار
آج قالا ایلر شکایت آغلاماقلا مادره
بو گجه آلمیش قوجاقه اوخشیور بی کس رباب
عرض اءدور قربان اولوم اوغلوم آخیلمش گوزلره
بسدی دیرناق ورما اوغلوم یوخ صودوم شرمندیم
قحط اولوب دریا کنارینده سو اوغلوم بیزلره
نه روادی خلق ایجه سو تشنه قالسون میهمان
یوخدی هیچ رحم و مروت اف اولا قاتلره
ایستیرم گوزیاشیله تشنه دوداقین تر اءدوم؟
کاش اولا قربان انا اوغلوم گویرمیش لبلره
کوفه لیلر مثلی نهرین یوخ وفاسی نیلیوم؟
نهریدن سو گلمیری چولده یانان اهولره
بیر طرفده جاری اولدون قان اولیدون ای فرات
ساقی شرمنده اولور دوشدی نجه مشگلره
اجنبیلر دال اولیدی قامتیز ظلم اءتمیون
ظلم بیش از حد اءدورسوز سیز آل اطهره
بو حسین ریحانه ی زهرادی چوخ اینجیتمیون
طاقت قلب نبی و نور چشمدی حیدره
گءتدی عرشه قونداقی وقتی گوز اچدی قارداشیم
مرجع تقلید اولوب مولا بوتون عالملره
وقت او وقت اولدی سوسوزلوق دیندیریردی اصغری
ماهی تک آغزین اچور هی یالوارور دریالره
یعنی بیر قطره سودان احسان اءدون بو دیلسیزه
بیر باخین قونداقه باغلانمیش خردا اللره
عفو اءله یافاطمه سو قیمتی اولدی گران
اصغری سیراب اءدوب بیر اوخلا نامرد میزبان
حرمله وءردی دیزین قویدی کمانه اوخ باجی
حال و احوال ربابه آغلادیم من چوخ باجی
اوندا کی ایریلدی پیکان چیلدن فریاد اءدوب
یول ایتیرمیش درنالار تک راه بی راهه گءدوب
سانجیلوب ناگه ال اوسته تشنه جیرانه او دم
نهرین اوسته آغلادی عباسیله قانلی علم
حنجره باخ ،بیر اوخا باخ ،فکر اءله باش ایریلار
دیسه گویا ءوز رکابیندن دوشر قاش ایریلار
ءوپدی اهسته بوغازین اوخ دءدی اصغر اویان
سو یرینه ایچ قانین بلکه بو قانیله دویان
تیتردی قونداقیده اسدی ایاقیله الی
هی اتاسی بوس اءدور سسلور دیور یاندیم علی
ای فرات روسیاه آخ هر نقدری ایستوسن
اصغریمی چاتمادین دیلسیز ءونی ءولدورموسن
ای" خدایی" سنده آغلا گوی کبوتر آغلاسین
ایستدی شاه غنچه سین ءوز سینه سینده ساخلاسین
- جمعه
- 15
- مرداد
- 1400
- ساعت
- 19:31
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه