منیم جوان مسافریم غریبه ی وطن ننه
هارا گئدورسن ای منیم باشیما ال چکن ننه
دئینمیرم اورک سوزون گوزوم یاشی دایانمیور
بدنده کی یارالاری باخیر گوزوم ، سایانمیور
بو ئولمگیوی واللهی بالان حسین اینانمیور
حسینه آغلیوم و یا سنه گلین ئولن ننه
حسن نه گورموشی مگر که هی دیور امان آنا
کتاب عمری اودلانان قاپیسی باغلانان انا
او لحظه سیلی دیجگین گوزونه قان دولان انا
حسینه آند اولا ئولر حسنده غصه دن ننه
یارالی جسمی مدفنه شبانه ایلیروک روان
سوزوب ستاره ،آی کوسوب پوزولدی نظم آسمان
کفن بویاندی قانیوه سینون یاراسی ويردی قان
بو یاره باغلانان دگول یاراسی قان وئرن ننه
اتام ویرنده غسلوی سیزلادیم یواشجا من
سنه کفن گیندیروب غریب و مونس محن
دیدیم اورکده آی ننه تزیدی سن گئین کفن
کفن یاراشمیور سنه منیم جوان ئولن ننه
سنی توانیدن سالوب جفای ثانی آغلادیم
قاپی دالیندا محسنون چیخوبدی جانی آغلادیم
بهاری وقته غنچه وین چاتوب خزانی آغلادیم
دیل آچ دانیش اورک سوزون منه دیل اورگئدن ننه
قضا ائدوبدی ائتدیگین بلانی گوندریب قدر
دلیل بو شهادته ائوینده اولدی میخ در
گوزون فداسی بوش یرین بو دورت بالاوی ئولدورر
قوجالدی باغبان که چون صولوب گل چمن ننه
نه سریدور که آچمادین اورکده ساخلادین سوزی
کفن چکیلدی گورمدیم دوباره اول صولان یوزی
بوکوینگین قضیه سین تاپانمیرام سوزون دوزی
مگر یوخی حسینوین بو ائوده پیرهن ننه؟
- شنبه
- 16
- مرداد
- 1400
- ساعت
- 13:2
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه