سینم اوسته باشووی قوی قیزیم
سیزی ترک ایدور نگران ننوز
غم و غصه دن یورولوب گیدور
قره ساچلاری آغاران ننوز
یغیشون کناریمه اگلشون
سارالان جمالوزه بیر یاخیم
گوزوزون یاشین ایلیم دوا
سینمون یارالارینا باخوم
منه سیز باخون سیزه من باخوم
سوزولن ستاره کیمی آخوم
لحظات آخر عمریده
گوره سیزلری یاری جان ننوز
قاپیمیز یاناندا باشیم چکوب
نقدر فشار و غم و جفا
قاپی قول قابیرقامی سیندیروب
سینمه دگوبدی آغیر یارا
یارا یوخ اولار سایلور منه
سند ارادت مرتضی
گوز ایوینده ضربت سیلیدن
آپارور قیامته قان ننوز
من امام اول عالمون
اورگینده اودلی پیامیم
دل چاه کوفیه ساخلانان
غمینون شکسته کلامیم
رسن ارادت حیدرین
هله ده اسیره ی دامیم
بو سوزی اولنده دیور گیدور
اورگینده دردی قالان ننوز
بو اول گیجه آناسیزلیقوز
بیلورم ایدر سیزه چوخ اثر
دل داغداروزه فرقتیم
سالاجاقدی صبحه کیمی شرر
بوچتین گیجوز قوتارار بالا
آچیلاندا غصه لی بیر سحر
ننه وای دیون ایلیون نوا
چون اولوبدی الده جوان ننوز
بیله آغلیون کی عم اوغلومون
دل پاره پاره سی یانماسون
اوجالوب نوا سسی نیمه شب
گیدوب عرش حقه دایانماسون
جسدیم مزاره گیدن زمان
منی اولدورنلر اویانماسون
گیده قبره ظلم زمانه دن
گوگرن یوزونده نشان ننوز
آناسی اولن قیز اوغول گرک
اوتوروب بیر ایوده بیر آغلاسون
هره بیر غمین یادینا سالوب
یوزه سیل اشکینی باغلاسون
گیجه لر حسینیمی قویمیون
اویانوب ایوی گزوب آغلاسون
چون حسینیم آغلاسا قبریده
ایلیر نوا او زمان ننوز
بالامین یانیقلی نوالری
بو شکسته قلبیمه اود وورور
بوشالور دولور قره گوزلری
سسی بوسینان دیلی سیندیرور
مین امید و خواهشیلن سیزه
ننه سیز حسینینی تاپشیرور
اورگینده کی غم و محنتی
یوزینه سرشکی یازان ننوز
ایتوروب مداری فلک فلک
توکولور ستاره لریم منیم
سیزه گوزلریم کیمی آغلیور
بدنیمده یاره لریم منیم
دانیشانمورام دوداقیم اسور
دانیشور اشاره لریم منیم
آناسسلوسوز قولاقیم آلور
دیه بیلمیور سیزه جان ننوز
بو مریضه فاطمه هرقدر
غم و غصه چکدی کیچیلمدی
صفحات دفتر سینه دن
غم و درد و محنتی سیلمدی
اورگی ورملدی غصه دن
ره چاره سین تاپا بیلمدی
اوزی درد الینده نولوب گیدور
هامیی درده نسخه یازان ننوز
- سه شنبه
- 19
- مرداد
- 1400
- ساعت
- 10:33
- نوشته شده توسط
- یوسف اکبری
- شاعر:
-
حاج غلامرضا هادی اردبیلی
ارسال دیدگاه