سن امیر دوسَراسَن منه لبیک حسین
دیَرَم تا نَفَسیم وار سنه لبیک حسین
گوهر عشق یقین قیمتنی سندن آلوب
مُسلم وحُرّ و زُهیر، عزّتینی سندن آلوب
بلکه قرآن ئوزیده دولتینی سندن آلوب
ساتمارام عشقوی اَهریمنه لبیک حسین
سن کیمی دلبر اولان یرده چَمَن نیلیورم
ئوپرم تربتووی، مُشک خُتَن نیلیورم
قبله دورکربُ بَلا، کعبه نی من نیلیورم
گئجه گوندوز دیرَم یک تَنَه لبیک حسین
سائلون شاهلیق ایدر اُلفَت دیرینوندن
عرفا حَقّی تاپار معرفت آئینه وندن
قتلگاهونده آقا ئوپدی مَلَک سینوندن
دیدی جبریل امین دَه سنه لبیک حسین
نه پَریم واردی نه پَروازِ هُمالیق بَلَدَم
نه زَریم واردی نه تَزویرو ریالیق بَلَدَم
سیفی ام، درگه عشقونده گدالیق بَلَدَم
ئورگدوب کاتب عشقیم منه لبیک حسین
اوخورام نوحه وی هربَزمیده طوفان ایده رَم
خیمۀ تعزیه وی روضۀ رضوان ایده رَم
یوسفی دَبدَبۀ عشقووَه حیران ایده رَم
یازارام اشکیله پیراهنه لبیک حسین
گورمز اَبنای بَشرسن کیمی بیرکاشف راز
گوزل آدوندی اورکلردن ایدن عقده نی باز
قانلی محرابده که ذکر و دعا فیض نماز
حشر اولونجا تاپاجاق دامنه لبیک حسین
- چهارشنبه
- 20
- مرداد
- 1400
- ساعت
- 20:54
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه