آدون صفای دل و جاندی یا جوادالائمه
سوزون حقیقته برهاندی یا جوادالائمّه
امیر ملک شرف سن جهانه روح فزاسن
وصی مسند توحیدی امام رضاسن
مدیر مکتب دین عارف رضاً بقضاسن
یوزون قمر کیمی تاباندی یا جوادالائمّه
او کردگار که اوندان تاپوبدی جلوه بو خلقت
او خالقیکه بشیکده مسیحه ویردی رسالت
سنه ده یدی یاشیندا ویروبدی حکم امامت
مَلک حریموه درباندی یا جوادالائمّه
سنون قاپوندا اوجالدی لوای حق تولا
سنون درایت فکرون ویروبدی دینه تجلی
فلاسفه ، حکما سندن آلدی درس سجایا
قاپون دل اهلینه رضواندی یا جوادالائمه
آپاردی فیض کلام اهلی بحر معرفتوندن
چتین بشر یازا بیلسون کمال و معدلتوندن
اولوبدی مات یقین انبیاده منقبتوندن
مسیح شأنوه حیراندی یا جوادالائمّه
نوابغ وحکما شأنوه عیار گورنمز
محیط دهر وقارون کیمی وقار گورنمز
سنون نظیروی بو چشم روزگار گورنمز
سوزون طلیعه قرآندی یا جوادالائمّه
چتیندی نور خدا شرح وبسطی مدح رساده
آدون همیشه زبانزدی مکتب فقهاده
دریغ ایگرمی بش ایل عمرون اولدی دارفناده
غمونده خلق نواخواندی یا جوادالائمّه
اوگونکه مکر و جنایات معتصم یرین آلدی
فساد دختر مأمون جهانه ولوله سالدی
پیمبری گلی سندردی شاخه دن یره چالدی
بو فتنه دن جگرون یاندی یا جوادالائمّه
اوجالدی دست جنایت ایدوب معنادی مسرور
حدیث دردوی دست قضا ایدنمدی مستور
جگروی ایله دی پاره پاره زهریلی انگور
قلوب شیعه الولاندی یا جوادالائمّه
یازوبدی امر شهادت سنه امیر اَعاظم
گیدنده جنته روحون ملک لر اولدی مُلازم
اولوبدی جسموه مدفن جوار موسی کاظم
گوزوم بومحنته گریاندی یا جوادالائمّه
دیمگه دردوی قاصردی جمله نطق و بیانلار
دوشوب شراره غمونده تمام خرمن جانلار
عزا دوتوب سنه قان آغلیار شرفلی جوانلار
کیم اهل دیلدی پریشاندی یا جوادالائمّه
بوگئجه اهل طریقت ویروبدی شوکتین الدن
بوگئجه مسجد و منبر ویروب صلابتین الدن
بوگئجه امت حیدر ویروبدی عزتین الدن
جوان قوجا هامی نالاندی یا جوادالائمّه
روادی دل گئجه گوندوز گله غمونده نوایه
عنایت ایله آقا سنده گل بو بزم عزایه
دولاندیریم سوزی منده بو یرده کرب وبلایه
گورک حسین نجه دوغراندی یا جوادالائمّه
یارالی جدون اله خاتم وقار تاخیدی
گون ایستیوردی باتا، خیمه خیمه اولدوز آخیدی
حسین یانیدی سوسوزدان، گوزی فراته باخیدی
او لحظه قلبی ده اوخلاندی با جوادالائمّه
- چهارشنبه
- 20
- مرداد
- 1400
- ساعت
- 21:37
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه