رقیه آغلاما قزیم خرابیه بابان گلوب
بو نیمه شبده نیمه جان بیبیوه تازه جان گلوب
بولوبدی سن خرابه ده مریض سن عیادته
محبتون تلسدروب دوداقلاریندا قان گلوب
سپهر معرفتده ای گوزل ستاره آغلاما
خمار خمار باخوب بیله بودلفکاره آغلاما
سن آغلیاندا قلبیمه دوشور شراره آغلاما
من آغلیوم که غنچهء تریم گوروب خزان گلوب
قناد چالوب اوچانموسان قنادی بسته بلبلوم
ایدوبدی غصه لر سنی قفسده خسته بلبلوم
اولوبدی باغدا گلشنون گلون شکسته بلبلوم
شکسته گلدن اوتری دل شکسته باغبان گلوب
افقده گل جمالینی دومان دوتان آییم گلوب
دومانلی اولکه لر گزوب دولانمادا تاییم گلوب
گچیبدی بایرامیم ولی کسیلمیوب پاییم گلوب
دونوب خرابه جنته هامی بهشتیان گلوب
حسینیمون محبتی عیان اولوبدی زینبه
ولیک من اوزومده چوخ تعجبم بو مطلبه
هلال احمریم گلوب سلامه فوج کوکبه
اونیله ترک آسمان ایدوبدی کهکشان گلوب
بابان گلوبدی سنده گل رقیه کشف راز ایله
دانش دلون فداسیم منی ده سرفراز ایله
گچن زمانلارین کیمی دانیشماساندا ناز ایله
نقدری نازون اولسا بیر اوقدری ناز آلان گلوب
اسیر عشق یاریدون کمند یاره دوشموسن
تاپونجا یار محفلین بیوک فشاره دوشموسن
کوسوبسن اولما یاریدن ندن کناره دوشموسن
اوزون گل آل کناریوه اویار مهربان گلوب
اوقدری آغلادون دیدون گرک چراغ وصلتی
بابا ملا روشن ایلیم گوروم او ماه طلعتی
کمال وصله چاتموسان او کوسمگین چوخ علتی
بو آشنا تاپولمیان مکانه آشنان گلوب
یاواش یاواش دوروب خانم ایاقه گوزده گوز یاشی
آچبدی یول او حضرته ایکی گوزی ایکی قاشی
اگیلدی اوپدی باغرینا باسوب او ذبح اولان باشی
دیدیله دینمیون دله او مرغ نغمه خوان گلوب
دل آچدی بلبل بلا حزین حزین گلوب دله
او صورت مبارکین قانین کولین سیله سیله
صفا گتورموسن دیدی محقرانه منزله
بویور گوروم یانونجا بیر نفر ده جان آلان گلوب
چکردیم انتظاریوی مریضیدیم گیچن گجه
نیازمندیدوم سنه نه یاخشی قالموسان گجه
چکیدی زحمتیم فقط بیبیم توان حدّیجه
که هرزمان سوزوم اولوب بیر عمه مه گمان گلوب
((امینی))سن رقیه نین تاپوبسان آستانه سین
طبیبهءزمانه سین صفالی داروخانه سین
دیار شامده آچوب مطب عارفانه سین
غم و ملالیلن گیدن گلنده شادمان گلوب
- پنج شنبه
- 21
- مرداد
- 1400
- ساعت
- 19:48
- نوشته شده توسط
- یوسف اکبری
ارسال دیدگاه