ای گل بدنی باشسیز یرلرده قالان قارداش
وی نیزه لر اوستونده گون تک اوجالان قارداش
ای شاه جهان قارداش
گل نطقه اوخی قرآن قرآن سسیوه قربان
قوی خلقی تحیر ده اعجاز یولین بیر آن
منده سوروشوم بیر بیر اول نامه یازانلاردان
علت نه اولوب دوندی سوز اولدی یالان قارداش
ای شاه جهان قارداش
الله نجه گور دوتدی بو کوفهء ویرانی
قویدیلار ایاق آتدا اسلامیله قرآنی
الدوردی رعیتلر شاهنشه دورانی
اولده بولار سالدی اخیامه تالان قارداش
ای شاه جهان قارداش
مشغولیدون عشقیله سن راز و نیاز وندا
سرگرمیدون ای عاشق معشوقه نماز و ندا
گوردوم دایانیب شمرین شمشیری بوغازوندا
من قالدیم امانسیز اول ورمزدی امان قارداش
ای شاه جهان قارداش
گوگ قاره گینمیشدی یر قانه بویانموشدی
اطفال تالانموشدی اخیامده یانموشدی
دود شرر آهیم افلاکه دایانموشدی
دنیا گوزومه بیردن گورسندی دومان قارداش
ای شاه جهان قارداش
بسلنمشیدون قارداش سن گللرین اوستونده
سایون واریدی دائم بلبلرین اوستونده
ای وای منه یاتمشدون بس کللرین اوستونده
پر قو لرین اوستونده نازیله یاتان قارداش
ای شاه جهان قارداش
زهرا ننه مین سولدی یکسر گل و گلزاری
پرپر داغلیب خندان گللر کمی پرگاری
الان گورورم واردی آننوندا کل آثاری
اللم قاریشوب خاک و خاکستره قان قارداش
ای شاه جهان قارداش
ای نور هدا قارداش وی قافله سالاریم
بی کس باجوام یالقوز یوخ کمسه مددکاریم
چکمه نظرون مندن اول محرم اسراریم
چون واردی آرامیزدا چوخ سر نهان قارداش
ای شاه جهان قارداش
سیندیردیلا پیمانی بو کوفه نین اشراری
شمشیر به دست اولدی هر حمله سنه ساری
بی عاطفه عورتلر اللرده کی داشلاری
بولدوکلرین ایلوللر مردان و زنان قارداش
ای شاه جهان قارداش
ای راهنما رهبر آهسته گیت آهسته
باخ زینبه یول گستر سیرینده جدا اوسته
طفلان ملک منظر پر بسته و دل خسته
دلدن یانوب آغلوللار ایلولله فغان قارداش
ای شاه جهان قارداش
من قالموشام حیرتده بولمم بو نه سودا دی
قول باغلی اسارتده پیغمبرین اولادی
پیشاپیش امتده آبادی به آبادی
آواره و سرگردان هم اشک فشان قارداش
ای شاه جهان قارداش
از بس که غمیم دردیم بی حد وحساب اولدی
قلبیم یاخلوب یاندی کوز اوسته کباب اولدی
هر نوحه""امینی""دن بیر نسخه کتاب اولدی
هم نوحه دیین آغلار هم نوحه یازان قارداش
ای شاه جهان قارداش
- جمعه
- 22
- مرداد
- 1400
- ساعت
- 12:1
- نوشته شده توسط
- یوسف اکبری
ارسال دیدگاه