ای بشر ایستوسن عالمده آدین زنده قالا
هم بو دنیا هم او دنیاده ده باشون اوجالا
سعی قیل یاخشی یاشایشدا چالش قالما دالا
بش گونین عیش و نشاطینه چوخ آلانمیاسان
بیر گونه بش یوز ائل آواره قالوب یانمیاسان
نفس عماریه عقلین گوجونی ساتمیاسان
آللانیب یا که جهاندا بیرین آلاتمیاسان
ذره سرمایه وه دنیاده حرام قاتمیاسان
حرمتون آرتاجاق آسوده بیر انسان اولاسان
پاک دور نطفتون الله سنی اعلا یارادیب
خلقتین مزرعه سینده گل رعنا یارادیب
قدرتون هر نه دن آرتیخ دی توانا یارادیب
یرلری گویلری تسخیره بشر سن چکوسن
هر نه ای علمیله زنجیره بشر سن چکوسن
عصر فرهنگ تمدن ده مگر جاهل اولار
عاقلا قادر و داناده مگر کاهل اولار
حق گلر گون کیمی پامال اورگون باطل اولار
عمر سرمایه دی هیچ کیمده ولی قالمیاجاق
یوز مین ائل عمر ایده انسان گینه فیض آلمیاجاق
ایلیوب حضرت خاتم اوزی منبرده بیان
خواب غفلتده یاتان لار هامیسی قویدی زیان
آنلاسین گونده نچه مرتبه قرآن اوخویان
دوتمیا مفته اروج قیلمیا بیهوده نماز
چون اونی صبح و مسا گوزلوری هر اهل نیاز
گیت علی شیر خدادن یولین اورگش عملین
بیر دوز احسانیوه دنیا بویی باغلانماز الین
عمرون آخر چاتاجاق باشه گلنده اجلین
مطمئن اول ملک الموت آلاندا جانوی
اوندا بیر بیر سایاجاخلار اوزیوه احسانوی
خوش اونین حالینه احسانینه خاطر آزالا
جرم و تقصیری مجازاتی ثوابین یازالا
خلق اونین مجد و جلالیله مزارین قازالا
ظاهرا قبر اولی باطنده ولی قصر عدن
قورتولار اهل بهشت اولسا هامی واهمه دن
آختار عمرونده "امینی"اوزیوه راه نجات
ثبت اولا نامهٔ اعمالیوه شأن و درجات
قالما آواره عوض اولسا حیاتیله ممات
یول دوز اعمالیله هموار اولاجاقدور اُلنه
رد اولار جمله موانع لر او یولدان گلنه
- جمعه
- 22
- مرداد
- 1400
- ساعت
- 14:20
- نوشته شده توسط
- یوسف اکبری
ارسال دیدگاه