دوتور بیر عده افراد بشر دورد اللی دنیانی
ییور مینلر ضعیف و ناتوان لار هی اورک قانی
قناعتجیل یازیخ حرصین دیشین یوز دفعه سیندیرسین
چکور اصراف ایدنلر کامینه امواج دریانی
جهان چوخ عبرت انگیز اولماقیندان دم وریر یاران
ولیک عبرت آلان بو دهر فانی دن گورون هانی
غبار آلود بیر آئینه دور انسانلارین عمری
سحر ذرات گونلن بیللنیر آخشام اولور فانی
بساط عیش لر سرگرم ایدور انسانی بش اون گون
سالور اثنای یولدا سیندیرور تز عهد و پیمانی
او گون جبریله باخما اسمعیله گتدی قوچ قربان
بو گون دوران دونوب انسانلارین انساندی قربانی
حریم کعبه دن سیلکیب الین وارستگی گیتدی
گلوم حجاج یوزدن بیر قالور حفظ ایتسین ایمانی
دولان بیر یاخشی مومن تاپ دیسین الله یاغش گوندر
قبول ایتسین دعاسین حق اونون حقینده بیر آنی
کرامت راه و رسمین یردن اورگشمک زمانیندن
گیچور مین دورت یوز ائل هاردان تاپوم مقداد و سلمانی
جهانین وار یوخی یا آز چوخی مطرح دگول ایندی
او مطرح دور که ظالملر فقط آلسینلا میدانی
بشردن با دوشوب تنها قالان شردی شرارت دی
شعور و عقللر الان وروللر قتل فرمانی
"امینی" چوخ یازیب پوزماخ نتیجه بخش اولا بولمز
اوزون چوخ یورما بسدور کورلاما دفترله دیوانی
- جمعه
- 22
- مرداد
- 1400
- ساعت
- 18:34
- نوشته شده توسط
- یوسف اکبری
ارسال دیدگاه