القصه اوگون قافلهء غم یولا دوشدی
ایجاد ایلیوب شهر ده ماتم یولا دوشدی
گچدی قباقا اولدی علمدار ابوالفضل
آلدی اله بیر قرمزی پرچم یولا دوشدی
ظاهرده حجاز اهلینی قویدی گوزی یاشلی
در دانهءپیغمبر اکرم یولا دوشدی
باطنده ولی قلبی اوسنمشدی حسینین
علت اودی لطفین ایلدی کم یولا دوشدی
مردان بنی هاشم حسین ابن علی لن
وردی هامیسی ال اله باهم یولا دوشدی
بیر ماه بنی هاشم ابوالفضلدی بیر ده
خردا بالالار دوردی چو انجم یولا دوشدی
وقت تنگیدی قربانگه عشقین هوسینده
بنیانگر ایام محرم یولا دوشدی
قربان کسیلن وقته ورللر سو ذبیحه
دوردی هوس چشمهء زمزم یولا دوشدی
اول قدمین ناحیهء کعبیه قویدی
بیر کس دیمدی خیر اولا مقدم یولا دوشدی
بیر ده بونی فکر ایتدی که حج فیضینه چاتسا
الدن چخاجاق فیض معظم یولا دوشدی
بیر قافله که فعلاً او نون مثلی جهاندا
اولموبدی نظر لرده مجسم یولا دوشدی
آتلار هامیسی با هم ایاقین که گوتوردی
آهنگ سفر چالدی منظم یولا دوشدی
بو فلسفهءعشقی هر عاشق اوخویانماز
استادیدی چون شاه دو عالم یولا دوشدی
پیمان الست الده حسین عشقیله قیلدی
دانشکدهء عشقه مصمم یولا دوشدی
اغیار باخوب قافلیه گولدی قیتدی
دلداده لرین دیده سی پرنم یولا دوشدی
قرآن اوخونوب لحن حجازیله یول اوسته
شاهنشه دین اولدی مقوّم یولا دوشدی
- شنبه
- 23
- مرداد
- 1400
- ساعت
- 11:51
- نوشته شده توسط
- یوسف اکبری
ارسال دیدگاه