جلیلیلن واریمش چون خلیلین عهد و پیمانی
یازلمش دور او پیماندا آپارسین جمله فرمانی
گیدور قربانگه عشقه اوز اوغلی اسمعیلیلن
گلوب نطقه دیور الله قبول ایله بو قربانی
دایانمش یول کنارینده پی فرصت گزور شیطان
دمادم شیطنت ایلور چکه اسماعیلی یولدان
قدم گوتدوقجه ابراهیم گهی صاقدان گهی صولدان
دلینده ذکر یا الله دوروب داشلیردی شیطانی
غرض بار گرانیدی او مأوانی دولاندیردی
ذبیح اللهی بازار محبت ده دایاندیردی
ایدبدور مطلبی روشن آتا اوغلونا آندیردی
دیدی اجرا ایدم قصدیم بودور فرمان یکتانی
گچبدور چوخ مراحل دن عمل هنگامینه چاتدی
رضای حق اله گلسین باشیندان هر نه ای آتدی
اورک قانیله گوز یاشین او حضرت بیر بیره قاتدی
بقدری آغلادی اشکین توکوب ایسلاندی دامانی
دعای ابراهیم در منا
آیرمش دی جوان اوغلون او بیر نحویله هاجردن
دعا ایلوردی صبر اولسون عطا خلاق داوردن
مهیا اولدی چکسین تا الین اول ماه منظردن
یوزین دوتدی گوگه خنجر الینده مرد روحانی
خطاب ایتدی منه یار اول منیم ای یار و دلداریم
سنه ییر بنده یم بند بلایه بند اولوب کاریم
اوزون واقف سن اسراره الیمده بیر بودور واریم
سنون امرونله اجرایه قویوم ور اذن اجرانی
او دمده اسمعیل آچدی گوزون ابراهیمه باخدی
اوخور ذبح آیه سین گوردی گوزی اولدوز کیمی آخدی
ایله شدت له آغلاتدی آتانی یاندریب یاخدی
دیدی صبر ایت الون ساخلا بابا گر اولسا امکانی
واریمدور بیر سوزوم دلده سنه ای مهربان سرور
بولورسن ال ایاق چالام چکنده بوینوما خنجر
آچیخ قالسا یوزوم شاید ساتاشسین بیر بیره گوزلر
الون تترر گوزون قورخار وررسن باده احسانی
جواب خنجر به ابراهیم در منا
الیمده هم ایاقیمده گرک بند طناب اولسون
یوزیمده گوزلریمده قوی اقلا بیر حجاب اولسون
کسنده باشیمی سعی ایت ایشونده چوخ شتاب اولسون
رضایم قصد قربت لن توکولسون جسممین قانی
خداوند امرینی اجرا ایدوب القصه پیغمبر
الین قالخزدی قربانین کسه گوردی اسور اللر
نه اندازه تلاش ایتدی بوغازین کسمدی خنجر
وریبدور سنگ سخت اوسته بولوبدور سنگ خارانی
گوروب سس گلدی خنجردن که آرام اول جوشوب اسمه
ندوم چارم ندور آخر بو آدابیله بو رسمه
خلیل ایستور کسم اما جلیل امر ایلیور کسمه
اوزومده مات و حیرانم ندن بولمم بو جریانی
خلیل الله او گون عشقین کمالیله نشان وردی
طریق عشق و عرفاندا اورکدن امتحان وردی
اودور حق اسمعیله اُول حوادث دن امان وردی
قوتاردی خنجر آلتیندان اوزون آزاد اولوب جانی
حضور جبرئیل در منا
او مأوایه به اذن الله سمادن جبرئیل اَندی
کنارینده گوزل بیر قوچ نمایان اولدی گورسندی
آچلدی اسمعیلین ال ایاقی دوردی ترپندی
همان قوچ اولدی قربانی وروب سودایه پایانی
سوینجک مرکبین میندی چاپردیب اُول ملک منظر
گوزتلوردی یولون حاصل تاپوب اوز اوغلونی هاجر
باخوب گوردی بوغازینده
قویوب بیر آز اثر خنجر
ایدوب فریاد و واویلا دولوب چون ابر نیسانی
دیدی اوغلوم غبار آلود اولوب بیله گوزون قاشون
یوزونده یول سالوب آخر آخوب از بس که گوز یاشون
آنان جانی دوزنمزدیم کسیلسیدی اگر باشون
چکنمز هر آنا درد و ملال و رنج هجرانی
اگر من بلبل اولسیدیم گزردیم گل سراغوندا
قالانمازدیم قفس لرده یاتاردیم اوز بوداقوندا
اُلوم ایستردیم الله دان دوزنمزدیم فراقوندا
الونجه مسکن ایلردیم اوغول کوه و بیابانی
- شنبه
- 23
- مرداد
- 1400
- ساعت
- 12:9
- نوشته شده توسط
- یوسف اکبری
ارسال دیدگاه