خیال ایوینده همیشه آدون صفادی ابوالفضل
که جان ودلدن اورکلر سِوَر او آدی ابوالفضل
دلیل و مدرک اوزیلن یازیلار اهل طبابت
علاجی اولمیان امراض ایچون دوادی ابوالفضل
دچار اولاندا بلایه ویرالّا چنگ توسل
دیولله باب الحوائج یقین بجادی ابوالفضل
کسیلمیشدی علاجون عَلَم دوشنده الوندن
گوزون گوروردی بدندن الون جدادی ابوالفضل
الون الوندن اوزولدی بیر اوخ دا دگدی گوزوندن
باشون عمودیله سیندی عجب قضادی ابوالفضل
فلک تزلزله دوشدی ملک تکلمه گلدی
بشر بولنمدی اما نه ماجرادی ابوالفضل
خدای لمیزلی دن بو حکم صادر اولوندی
مرید مخلصه ورّم دیسون مرادی ابوالفضل
الون که مشکل آچان دور اوزون طبیب زمانه
آدون خلایق ایچینده چوخ آشنادی ابوالفضل
نظر او قانلی گوزونلن بویورسان عالمه بیر یول
هزار حاجته بیر یول باخش روادی ابوالفضل
خدا یولوندا وروبسن الون که شهپر آلوبسان
سنون بهشتده گویدن یرون اوجادی ابوالفضل
کرامتونده کفایت ایدر بو جمله حقیقت
بو آستانه وه شاهلار سنون گدادی ابوالفضل
منیمده چوخدی گناهیم پناه ور منه مولا
پناه عالم امکان سنه آقادی ابوالفضل
"امینی" روز و شب آغلور ایدنده ذکر مصیبت
همیشه ورد زبانی او کربلادی ابوالفضل
- شنبه
- 23
- مرداد
- 1400
- ساعت
- 12:21
- نوشته شده توسط
- یوسف اکبری
ارسال دیدگاه