مأموریدی شمر ابن زیادین طرفیندن
گیچدی پولا خاطر ادبیندن شرفیندن
شیر اوغلونا روباه صفت خامه گتوردی
یازدیردی ابوالفضله امان نامه گتوردی
تل اوسته گلوب دیو خطا دیده دایاندی
اما او گلیشدن هامی گوزلر نگراندی
میدان بلا غرق دی اندوه و غمیلن
توأم غم و اندوه له درد و المیلن
بو مسئله مینلرجه آغیر داغدان آغیردی
باخ شمره حسین قالدی ابوالفضلی چاغیردی
سسلندی گل ای طایفه مه مفخر ابوالفضل
گل من سنی دنیایه ایدوم سرور ابوالفضل
آفاق جلالت ده گورونسون آدون عباس
دنیا بویی راحت یاشاسین اولادون عباس
بو دب دبه بو سلطنت آخر بیله قالماز
گر قالسادا عباس سنون شأنون اوجالماز
اعراب سنی گرچه برازنده تانولار
اما بو حسینه گوزلیم بنده تانولار
بیهوده بو صحرای غم افزاده دولانما
آزاد قیل اوز جانوی چوخ ساده دولانما
بو سوز بلی عباس علی نی غمه سالدی
طاقت گتوره بولمدی چون صبری آزالدی
تعظیم ادب قیلدی حسینین قباقیندا
ور اذن دیدی شمری سالیم دین قباقیندا
اذن اولسا اونین بند حیاتین ایله قیرام
الدورم اوزین آلام امان نامه نی جیرام
وجدانی آتیب باشدان او قرآنی ایاخلور
کفریله وروب ال اله ایمانی ایاخلور
القصه وزیرین سوزینه شه قولاق آسدی
آغوشین آچیب قارداشینی باغرینا باسدی
فرمایش ایدوب ای هنر عنقاسی ابوالفضل
منطقله بیانون کسر الماسی ابوالفضل
امیدیمین آفاقینه سن آی سان ابوالفضل
من شمس حقم سنده منه تایسان ابوالفضل
اشرار زمن طرز تفکرده آزیبلار
با اینکه سنه قارداش امان نامه یازیبلار
غم ایلمه ایندی سنیلن قول قولا سالام
هر سمته اوزون ایتسون اراده یولا سالام
گیت آل او امان نامه نی چوخ اولما مکدر
مندن صورا قوی امن ده قالسین بو حرملر
واضح دیورم من سنه بو مطلبی قارداش
گوزلرسن آنام نایبه سی زینبی قارداش
سالدی آشاقا باشینی تز معدن غیرت
عرض ایتدی امان الدورور آخر منی غیرت
مین دفعه یولوندا منی گر دوغراسا دشمن
هر شقه می بیر دار آغاجیندان آسا دشمن
ایمانمی حق دینمی دینار آلا بولمز
سندن منی دنیا گله آیری سالا بولمز
وار منده آتام شیر خدا قانی حسینیم
شمرین یخارام باشینه دنیانی حسینیم
قلبینده غرض مهر و وفا مشعلی یاندی
شمرین قباقیندا گلوب عباس دایاندی
مابین ده چوخ مسئله رد و بدل اولدی
نه صلحی قبول ایتدی نه جنگ و جدل اولدی
دوغراندی امان نامه توکولدی یره یکسر
سسلندی حیا ایله قییت مرکبی قیتر
گیت مرکبوی مرکز میداندا دولاندیر
عار ایلمه تز مطلبی سعد اوغلونا آندیر
دنیا سیزی بازیچهٔ ایام ایده
جاقدور
بوندان بیله گوندوزلروزی شام ایده جاقدور
وار قدرتیم ایندی نه دیسم ایلرم ای شمر
آتدان سالارام گردنوی پیلرم ای شمر
باش اگدی ابوالفضله قباقینده سیخلدی
سانکه باشینا عالم لاهوت یخلدی
قیتردی آتین کور و پشیمان ایله گیتدی
هر قدر تلاش ایلمیشدی یله گیتدی
جانلار او ابوالفضل علم پروره قربان
اولام دیدی من پادشه محشره قربان
سالدی اوزینی مقدم سلطان جهانه
قویدی دل کفاری جهاندا یانا یانه
اما عوضینده دیدی من راحتم ایندی
بس دور منه زهرا قیزی نین قلبی سویندی
اولده که اوز عهد و وفا باده سین ایچدی
صوندان ایکی قول ویردی گوزوندنده که گیچدی
عیسی لره دم چاتدی ابوالفضل دمیندن
نصرانی اوپور ایندی الیندن علمیندن
بیر ایش گوروب اوز گوردوگینه آلدی نتایج
معناده آدین سسلدیلر باب الحوایج
کیم درده دچار اولسا دوا ایسته سین اوندان
هم تسگره کرب و بلا ایسته سین اوندان
هیهات "امینی" دویا خان کرمیندن
دنیا جه صفا گورموش او زیبا حرمیندن
- شنبه
- 23
- مرداد
- 1400
- ساعت
- 17:34
- نوشته شده توسط
- یوسف اکبری
ارسال دیدگاه