اکبرین گوردوله شمشیری نه برق آسا دی
خلق ایدور لشکر بیداده فقط بیدادی
جمله سرکرده لرین فکری قالیب حیرتده
گورجگین صورت زیبانی قد شمشادی
حضرت ختم رسالت اونا ارثیه وروب
خَلقاً و خُلقاً او شهزاده ایله طاهادی
صورت احسنی آئینه اولوب توحیده
حسنی یوسف دن او طاها گلی نین زیبادی
کشتی نوح زمان لنگ دی بیر طوفاندا
کربلانین چولی طوفان زده بیر دریادی
اوندا عنقای هنر قلهٔ طوفاندیدی
احسن احسن بو جوانین یاشاسین استادی
باشلیوب آیهٔ تطهیری چکوب تفسیره
عنکُم الرِّجس دیور واردی اونون هرزادی
خواب غفلت ده یاتبسوز دیدی ای شام اهلی
گوز آچون غرق دی پیغمبریزون اولادی
اولموسوز امر یزیدیله جری ای لشگر
بو حسین بن علی دور آناسی زهرادی
ایندی واجب دی اطاعت ایدسوز بو شه دن
آیهٔ پاک مودت ده گلبدور آدی
آختارون آیه نی دقت له باخون قرآنه
سبط پیغمبر رحمت اوزی في القُربی دی
من طرفدار شه دین و حقیقت بینم
گلمیشم حامی قرآنه آلام آزادی
ورمیون زادهٔ مرجانیه دست بیعت
چون او نامرد خطا کاریدی هم ترسادی
تیغ برانیمی قالخزمامیش افلاک گلون
یار اولون بیر اصیل انسانه بو خوش سودادی
گوردی یوخ دینه طرفدار اولا بو لشگردن
بختی اقبالی گلوب هیچ کیمه یار اولمادی
ال گیدوب قبضهٔ شمشیره غرض میداندا
چالخانیب بیر بیره دریا مَثلی اول وادی
برق شمشیر بلادن بیری جان قورتارمور
عرصهٔ جنگ و جدل دن یارانان بلوادی
باش گیدور بیر یانا قول بیر یانا پیکرلردن
دولدوروب عرصه نی سرکرده لرین فریادی
توز دومان قالخوری یردن یاغوری قان گوگدن
بیر بیرین اوسته قالور تل ویرور اوجادی
صوت تکبیرینه مخیمده حسین عشق ایلور
قهرمان لار گلوب آلسین اله بو اسنادی
بکرین اوغلانلاری بیر بیر قویوب یوز میدانه
باشلاری گوگده او ملعونی لرین اوینادی
الغرض بکری او برنامه غضب لندیردی
اکبرین تیغ شرر بار و دهن فولادی
انتقام آلماقا گلمیشدی علی اکبر دن
عدل شمشیرینه توش اولدی عدو جلادی
اکبرین وصفینی عاجزدی قلم لر یازسین
بو هله عهدینه ناقابل اولان ایفادی
شیردور قاف شجاعت ده دوتوبدور مأوا
مرحبا هر نه شجاع وار اولارا مولادی
سن "امینی" سوزه ور خاتمه چوخ طول اولدی
چوخلارین طاقتی بو مسئله دن فرسادی
- شنبه
- 23
- مرداد
- 1400
- ساعت
- 17:42
- نوشته شده توسط
- یوسف اکبری
ارسال دیدگاه